Efesa 2 - U TIENU MAAMA TILI 2013

Yi ñani mi kuuma nni ki kua li miali nni

¹ Yogunuba, yi den tie tinkpiba kelima yi tagili leni yi tuonbiadi po.

² Lanyogunu yi den ŋua ŋanduna na yema sanbiadu leni mi fawaama nni paaciami bado, yua yaa yantiali n tuuni moala U Tienu yiekaaba pala nni.

³ Tikuli den kpa tie yeni, ki tiendi nani laa niba n tiendi maama moala, ki ŋua ti gbanandi bonbuakaala, ki tiendi ti gbanandi leni ti yantiana n bua yaala kuli. Bi den mali ti ke ti tie U Tienu pali n be yaaba yaa po, nani bi nisaaliba kuli yeni.

⁴ Ama U Tienu ninñingbadima yabi, o bua ti hali boncianla.

⁵ Lani yaa po, tin den tie bi tinkpiba kelima ti tagili po, o den guani ki puni ti li miali leni Kilisiti. Li tie o ŋanbili paabu yaa po, ke yi faabi.

⁶ O taani ki fiini ti leni Kilisiti, ki duoni ki kaani ti leni o tanpoli diema nni, wani Jesu Kilisiti yaa niinni.

⁷ O den tieni lani kuli ki baa doagidi o ŋanbili n yabi kaa pia bianu maama, hali yaa yogini n baa ti cua, kelima o ŋanma ti po Jesu Kilisiti nni.

⁸ Li tie li ŋanbili-paabu yaa po, ke yi faabi. Yi baa la kelima li dandanli yaa po yo. Laa ñani yi yaa kani, li tie U Tienu paabu yo.

⁹ Laa tie a tuona po ka. Lanwani, oba kuli n da kpiagi o yuli li po.

¹⁰ Ti tie U Tienu nuu tuonli. O tagi ti Jesu Kilisiti nni, ke tin yaa tuuni a tuonŋama, wan den tuodi ki jagi ke tin yaa tuuni ya.

Bi niba kuli tua yenma Kilisiti nni

¹¹ Yin tiadi mani line, bi den mali yi ke yi tie nilanba. Ban yi yaaba a junga, kelima bi niba n tieni yaala bi gbanandi nni, den teni ke bi yi yi a jifola.

¹² Lanyogunu yi den foagi leni Kilisiti. Yii den pia liba Isidayeli buolu diema nni. Yi den tie canba U Tienu leni Isidayeli buolu ŋantaado nni, yaala n ŋua wan den niani ba yaa ñoanianu. Yi den ye ŋanduna nni, kaa pia suginmiba kuli, kaa pia ŋantaadi leni U Tienu.

¹³ Ama moala Jesu Kilisiti nni, yinba yaaba n den kpa ye foagima yeni, yi nagini U Tienu kani kelima Kilisiti soama po.

¹⁴ Kilisiti n tie ti yanduanma, o taani nibuolilie, Jufinba leni bi nilanba ke bi tua nibuoliyendu. O den puni o gbanandi, ki mudi yaa goanli n den paadi ti leni tiyaba, lani n tie ti yibalindi.

¹⁵ O den bolini li bali maama leni man den pia yaa kuana kuli, ki taa laa nibuoliedi ki tagi nibuopaanyendu wani o ba yaa niinni, ki tieni mi yanduanma.

¹⁶ O den tieni yeni ki baa teni ban mangi leni U Tienu, ki tua nibuoyendu, kelima li dapoanpoanli po, wan den bolini ti yibalindi naankani.

¹⁷ Wani Kilisiti den cua ki wangi mi yanduanma yaa Laabaaliŋamo, yinba yaaba n den ye foagima leni yaaba n den ye koanma nni.

¹⁸ Wani yaa po, tikuli pia u sanu ki baa fidi ki pundi Baa kani, Fuoyenma nni.

¹⁹ Lanwani, yii go tie nilanba leni canba ka, yi ji tie tanpoli diema yaaba, ki taa buolu leni U Tienu nigagidiŋanba, ki tie U Tienu deni yaaba.

²⁰ Yi tie nani a tanmaakaana yeni, ke bi ŋuani yi yaa tanpuuli n tie U Tienu tondiba leni o saawalipuaba po. Jesu Kilisiti wani o ba n tie laa tanpuuli tanjigi.

²¹ O yaa niinne ke laa dieli maa bonŋanla, ki kpedi ki tua U Tienu dieli yaali n gagidi ki ŋani o po.

²² Bi ŋuani yimoko o yaa niinne, ke yi taani ki tie U Tienu yekaanu, kelima o Fuoma po.