Efesa 1 - U TIENU MAAMA TILI 2013

Kilisiti leni o Nitaanli 1—3 I fuondi

¹ Mini Poli, yua n tie Jesu Kilisiti tondo kelima U Tienu yanbuama po, n diani li tili ki fuondi yinba yaaba n tie bi nigagidiŋanba leni Jesu Kilisiti nidugikaaba, ki ye Efesi dogu nni.

² Ti Baa U Tienu leni o Diedo Jesu Kilisiti ŋanbili leni o yanduanma n yaa ye leni yi.

U Tienu n puni ti yaa seli kelima Kilisiti po

³ Tin pagi U Tienu yua n tie ti Diedo Jesu Kilisiti Baa. Wani n puni ti U Tienu Fuoma seli kuli Kilisiti nni, tanpoli po.

⁴ U Tienu den tuodi ki gandi ti Kilisiti nni, hali ke ŋanduna daa den tagi, ke tin yaa tie yaaba n gagidi ki ŋani, kaa pia tagiliba kuli o nintuali. O buama po,

⁵ o den tuodi ki bili ke tin baa mu bimoanmu bali, kelima Jesu Kilisiti yaa po. O yanbuama leni o yanjagiŋanli yaa po yo, ke o den tieni yeni.

⁶ Lanwani, tin yaa pagi o ŋanbili yaali n pia ti kpiagidi, wan puni ti yaali kelima o Bibuadiga po.

⁷ Ti baa mi daafaabima o niinni kelima o soama po leni ti tuonbiadi sugili, nani o ŋanbili n yabi maama po.

⁸ U Tienu den wuli ti po laa ŋanbili, ke li yabi ki puni ti mi yanfuoma leni mi bandima kuli.

⁹ O den doagidi ti po o yanbuama bondoaginkaala, wan den tuodi ki bili yaa yanjagiŋanli Kilisiti nni.

¹⁰ Lani n tie ke u yogunu yaa pundi, wan taani li bonla kuli, yaala n ye tanpoli po leni yaala n ye ŋanduna nni kuli, ke likuli n tua yenma, ke Kilisiti n yaa die likuli.

¹¹ Li tie wani Kilisiti yaa niinne, ke U Tienu tieni li bonla kuli nani wan den kpa jagi ki bili maama. O den gandi ki gagidi ti, ke ti tua o yaaba.

¹² O den tieni yeni ke tinba yaaba n den kpa bili ti suginma Kilisiti nni, n yaa pagi o.

¹³ Yimoko n den gbadi i moamoani maama, lani n tie o Laabaaliŋamo yua n cuani yi po mi tindima, yi den tuo ki daani Kilisiti. O yaa niinni, U Tienu den tieni yi po mi maalima, lani n tie U Tienu Fuoma Yua, wan den niani u ñoanianu ke o baa pa yi yua.

¹⁴ U Tienu Fuoma Yua yeni tie ti po i kpaaligi U Tienu diema ŋalimano po, yaala n doagidi ke U Tienu baa faabi ti cain, ke tin yaa pagi o kpiagidi.

Poli jaandi Efesi yaaba po

¹⁵ Li tie lani yaa po ke min den gbadi yi dandanli o Diedo Jesu po maama leni yi buama bi nigagidiŋanba kuli po,

¹⁶ n tuondi U Tienu yi po kaa cedi, ki taagi yikuli yela min jaandi yaa yogunu.

¹⁷ Ti Diedo Jesu Kilisiti Tienu, wani Baa yua n pia ti kpiagidi kuli, n teni o Fuoma n yendi yi yantiana, ki go doagidi yi po U Tienu, yin bandi o moamoani.

¹⁸ N go miadi o ke wan yendi yi yantiana nuni, ke yin fidi ki bandi yaa suginma n tuugi leni o yiinu leni wan bili o nigagidiŋanba po yaa ŋalimano, ke o pia ti kpiagidi.

¹⁹ N go miadi o ke yin bandi, o paalu yuu n tuuni tinba yaaba n dugi o po yaa niinni n yabi hali ke li kandi maama.

²⁰ O paalu yuu n tuuni ti niinni yeni tie wan den soani leni yuu, ki fiini Kilisiti bi tinkpiba siiga ke o go ye ki fo, ki kaani o o jienu, tanpoli po.

²¹ Wani Kilisiti ka lankani ki die mi diema danba, li bali danba, bi paatieba leni bi diediba kuli. O yeli cie yeli kuli, yaa yogunu n tie ne leni yuu n baa ti cua kuli.

²² U Tienu bili li bonla kuli wani Kilisiti taana tiipo ke o die la, ki teni ke o tie wan yini yaaba kuli yudanciamo.

²³ Kilisiti Nitaanli yeni tie o gbanandi, ki tie o yedagidikaama, wani yua n dagidi bikuli po li bonla kuli nni.