Danieli 9 - U TIENU MAAMA TILI 2013

Danieli jaandi ki mia U Tienu o buolu po

¹ Dariyusi Asuerusi bijua n den diedi Babilonni diema,

² ke li binli bindi, mini Danieli den cogi U Tienu maama tila. N den bandi ke Jerusalemi baa yaa tie diegbena ki pundi hali bina piilele, nani o Diedo n den waani o saawalipualo Jeremi maama.

³ Lani n den loli bu ñoabu ki lani li paboanli tiadi, ki wuli n yuli po mi fantanpienma, ki jigidi n nunga ki diidi o Diedo U Tienu, ki jaandi ki miadi o todima.

⁴ N den mia o Diedo n Tienu, ki tuo ki doagidi n buolu tuonbiadi, ki yedi o: «O Diedo, fini U Tienu yua n yabi, ki pia li fangili, fini yua n kubi ŋan den kuani yaa ŋantaado, ki ye leni yaaba n kubi a ñoamabonbilikaana, ki ŋanbidi yaaba n bua ŋa po.

⁵ Ti tieni ti tuonbiadi, ti tudi a po, ti tieni yaala n bia ki yie a bali, ti lebidi ki ŋaa a bali maama leni a ñoamabonbilikaana.

⁶ Tii den cengi a naacenba bi saawalipuaba, yaaba n den maadi leni ti badiba, ti badijaba, ti baanba leni ti diema yaaba kuli a yeli nni.

⁷ Fini o Diedo, a tiegi. Ama tinba Juda yaaba, Jerusalemi dotieba leni Isidayeli yaaba kuli, ti ye leni i fe dinla. Ti siiga yaaba n ye koanma nni leni yaaba n ye foagima, ŋan den deli ki yadi yaaba mi diema nni kuli ye leni i fe, kelima ti den ŋaa a maama.

⁸ O Diedo, tinba, ti badiba, ti yudanba leni ti baanba, tikuli ye leni i fe, kelima ti tieni a po ti tuonbiadi.

⁹ Ama fini ti Diedo ti Tienu, a gba ti po mi ninñima, ki tiendi ti po sugili, ba ke ti yie a bali maama.

¹⁰ Tii cengi fini ti Diedo ti Tienu yedima, ki tuo ki ŋoadi a naacenba bi saawalipuaba n den waani ti yaa bali maama.

¹¹ Isidayeli yaaba kuli miidi a bali maama, ki lebidi ki ŋaa, kaa cengi a yedima. Lani n teni ke yaa solindi leni yaa tundifala n diani a naacemo Musa bali maama tili nni baa ti po, kelima ti den tieni ti tuonbiadi fini U Tienu po.

¹² A tieni ti ŋan den yedi ke a baa tieni tinba leni yaa badiba n die ti kuli yaala. A luni ti o falabiado nni. Yaa fala n baa Jerusalemi dogu yeni, bi daa kpa laa o kaanuba ŋanduna nni.

¹³ Laa yebiadima ŋmaa ti, nani lan diani Musa bali maama tili nni maama. Ama ba lani kuli, tii mia ke fini o Diedo n je sugili, tii kuani ti yama ki faami a moamoani po.

¹⁴ Li tie lani yaa po yo, ke a teni ke laa yebiadima ŋmaa ti, kelima fini o Diedo ti Tienu tiegi, ŋan tiendi yaala kuli nni, ama tii cengi a yedima.

¹⁵ O Diedo ti Tienu, a yeli den ñani ki kpedi nani lin tie maama dinla, kelima a den ñani tinba a buolu Ejipiti nni leni a nuu paalu. Ama tinba, ti tieni ti tuonbiadi ki tudi a po.

¹⁶ Ti Diedo, nani a ninñingbadima n yabi maama po, ŋan jiini a pali a dogu Jerusalemi a joagagidikaali po. Ti tuonbiadi leni ti baanba tudima teni ke yaaba n lindi ti kuli fali ti, ki yuandi Jerusalemi leni a niba.

¹⁷ Moala ti Diedo ti Tienu, cengi a naacemo miabu, ki mangi a nunga a kaangagidiŋamu po, ban den bolini yuu yeni.

¹⁸ N Tienu, cengi, diidi ki le ti diegbena, diidi a dogagidiko. Tii cua a kani ki mia ŋa, kelima ti teginma po ka, ama kelima a ninñingbadicianma po.

¹⁹ Ti Diedo, cengi ti! Ti Diedo, pa ti sugili! Ti Diedo, cengi ti bonŋanla. N Tienu, jaligi ki tieni la kelima a yeli po, ki tiadi a dogagidiko leni a buolu yuu n gagidi po.»

Maleki Gabriyeli bundi Danieli po Jeremi saawalo fuuli

²⁰ Danieli go den pugini ki yedi: «N den baa ki jaandi ki tuo ki doagidi n tuonbiadi leni n buolu Isidayeli yaaba tuonbiadi, ki miadi o Diedo n Tienu o joagagidikaali po.

²¹ Min den jaandi yeni yaa yogunu, Gabriyeli, min den kpa laa yua li bonlekaala nni yeni, den yugi ki jaligi ki cua n kani ku yenjuagu padili yogunu.

²² O den maadi leni nni, ki waani nni: ‹Danieli, n cua ki baa doagidi a po saawali yeni fuule.

²³ Ŋan cili ki jaandi ki miadi U Tienu todima yaa yogunu, U Tienu ñoamabonli ñani, ke n cua ki baa waani a li, kelima U Tienu bua ŋa. Moandi ki gaa li ñoamabonli yeni, leni li bonlekaala mo n bua ki yedi yaala.

²⁴ Li bili binalele taalima piilele a buolu leni a dogagidiko po. Lanyogunu bili ke mi yiema n gbeni, Ke mi tudima n baa u bianu, Ke ti tuonbiadi n baa sugili, Ke yaa teginma n baa yaa ye hali yaa yogunu kuli N doagidi ke li bonlekaala leni U Tienu saawalipuaba Den soagini yaala kuli n tieni, Ke u kaangagidiŋanmoanu mo n go gagidi.

²⁵ Lanwani, ŋan bandi ki gaa min baa yedi a yaala ne: A yaa cili ki coadi hali mi maama n ñani ki yedi, ke Isidayeli yaaba baa guani ki kuni bi denpo, ke bi go baa guani ki maa Jerusalemi, ki pundi hali o yudangagidika cuama, li baa yaa tie binalele taalimilele. Bi go baa yaa maa Jerusalemi ñiana ki go lindi yaala n baa yaa guu ŋa bu toabu po, lan pundi hali binalele taalima piiluoba n milie. Ama li yogunu baa yaa tie fala yogunu.

²⁶ Laa binleleeda taalima piiluoba n milie yeni yaa pendi, bi baa kpa o nigagidika, ke oba kan gaa o. Yaa bado n baa ti cua toagola baa bolini u dogu yeni leni U Tienu kaangagidiŋamu. O bado yeni bolinma baa cua nani yaa ñingola n koadi yeni. Li bili ke mi bolinma baa yaa tiendi hali bu toabu juodima.

²⁷ O bado yeni baa kuani o ŋantaado leni u paalu leni yaa niba n yabi, ki dagidi leni ba a binleleedi-juodikaana nni. O baa teni ke U Tienu padijuukaana leni o pienma pada n da go yaa padi hali ki pundi binataa leni boagidima. Wani o bolinka yeni baa yaa tiendi yaa tuoncagindi n bia ki pendi hali yaa bolinma n bili n baa o yuli po.› »