Danieli 8 - U TIENU MAAMA TILI 2013

Danieli bonlekaliela: petonli leni ŋuabuali

¹ O bado Belitisasari bali bintaali, mini Danieli go den laa li bonlekaala, min den kpa laa yaala yeni puoli.

² Min den laa li bonlekaala yeni yaa yogunu, li den tie n po nani ke n ye Elami diema dociamu Susi nni yeni. N bonlekaala nni, n den sua ke n ye Ulayi kpenu kani.

³ Min den diidi yaa yogunu, n den laa ke li petonli se u kpenu boanjaali kani, ki pia yinfoagalie. Yenli den foagi ki cie liyali. Yaali n den yuandi ki pudi den foagi ki cie lilieli.

⁴ N den laa ke li petonli yeni to leni li yina, ki tiegi nintuali leni nujienu leni nuganu. Yangiba kuli mo kan den fidi ki tuogi leni li lan gedi kaanu, oba kuli kan den fidi ki gaa wan paadi yaaba. Li den tiendi lin bua yaala kuli, ke li paalu pugidi.

⁵ Min den kpaagi min nua yaala po yaa yogunu, li ŋuabuali den ñani nintuali po, ki tiini ki gaandi ki tinga nni. Li den jaligi hali ke li taana ki siigi ki tinga. Li ŋuabuali yeni den pia li yincianli li nuni siiga.

⁶ Li den pundi min den laa yaa petonli, ke li se li boanjaali kani ki pia yinalie yeni kani. Li ŋuabuali yeni den sani ki libi li leni li fidu kuli.

⁷ N den laa ke li pundi li petonli kani ki fiini li pali ki tuoni li, ki kua li yinlieda yeni kuli, ke li petonli yeni ki fidi ki tuogi leni li, ke li gedi kaanu. Li den guli li petonli yeni ki ŋmaa li, oba kuli ki den fidi ki gaa li li ŋuabuali yeni kani.

⁸ Li ŋuabuali yeni paalu den pugidi boncianla. Ama lin den pundi li paalu banlu, li yincianli den kua. Yinciamanaa den pudi, ki sedi li kaanu ki teli nintuali leni puoli, ganu leni jienu po.

⁹ A yinnaada yeni niinni, yintoali den pudi yaali n wa ki cie akuli. Li den pugini li paalu boncianla, ki teli ganu po leni puoli po leni yaa diema n ŋani ki cie mi diema kuli yaa po.

¹⁰ Li yinli yaali n den pudi yeni den tuogi leni tanpoli yaaba, ki teni ke bi siiga bi tianba leni a ŋmabila siiga a tiama baa tinga nni, ke li ŋmaa bikuli.

¹¹ Li den tuogi leni tanpoli gola Yudaano, ki teni ke baa go padi daali kuli pada o po. Li go den biidi o kaangagidiŋamu.

¹² Bi den cedi ke li yinli yeni diedi li toagoli leni daali kuli padili, kelima ti tuonbiadi po. Li yinli yeni den luni mi jaanmoanma tiipo. Lin den tiendi yaala kuli den cuoni lipo bonŋanla.

¹³ N den gbadi ke maleki maadi. Malekitoa den buali o: ‹Li bonlekaala n waani ke yaala n baa tieni yeni, baa waagi ki pundi u laa yogunu? Bi baa sieni daali kuli padili, ki pundi hali u laa yogunu? Yaa bolinma n bolindi baa yaa ye hali u laa yogunu? Bi baa yaa ŋmaadi u kaangagidiŋamu leni tanpoli gola hali u laa yogunu?›

¹⁴ N den gbadi ke yaa maleki n kpa maadi yeni guani ki yedi: ‹Li baa yaa tie yenjuadi leni tiŋaadi tudalie n kobitaa (2 300). Li yaa puoli, bi go baa gagidi ki ŋanbi u kaangagidiŋamu.›

Maleki Gabriyeli bundi Danieli po o bonlekaala

¹⁵ Mini Danieli, n den diidi li bonlekaala yeni, ki bua ki bandi li bundima. Lani, yua n naani leni o nisaalo den cua ki sedi n nintuali.

¹⁶ N den gbadi u nialu ke u ñani Ulayi kpenu siiga nni, ki kpaani ki yedi o: ‹Gabriyeli, bundi o joa ne po li bonlekaala yeni.›

¹⁷ Gabriyeli den nagini min se naankani. Wan den nagini yaa yogunu, ti jawaandi den cuo nni, ke n baa ki labini. O den yedi nni: ‹Danieli, a tie nisaalo, ama ŋan bandi ke yaa bonlekaala n tie ne, waani mi juodima maama fuule.›

¹⁸ Wan den maadi leni nni yaa yogunu, n da den baa ki laabi ke ti jawaandi den pugini n po, ke n pabi. O den sii nni ki fiini ki sieni nni.

¹⁹ O den yedi nni: ‹N baa waani a yaala n baa cua U Tienu pabienli juodima yogunu, kelima li bili o pabienli juodima n baa cua yaa yogunu no.

²⁰ Ŋan bi laa yaa petonli ke li pia yinalie yeni, tie Medi leni Persi yaaba dieme.

²¹ Li ŋuabuali yaali n pia ti kobidi yeni, tie Gireki yaaba diema. Yaa yincianli n ye o nuni siiga yeni, tie Gireki yaaba badikpialo.

²² Li yincianli yeni n den kua ke yaa yinnaada n pudi ki gaa li kaanu yeni, tie dieminaa, yaama n baa fii ki gaa mi diekpiama kaanu. Ama laa dienaadima kan yaa pa, nani mani mi diekpiama n den pa maama.

²³ Mi dienaadima yeni paalu yaa tuoni mi bianu, ke ti tuonbiadi danba yiema biagi ki pundi mi bianu, yaa bado yaa nunga n bia, ki bani i janbi baa fii.

²⁴ O paalu baa yabidi, ama li kan yaa tie o yaa fidiceli po ka. O baa cuani yaa bolinma n pia ki lidiga. O bonla kuli baa yaa cuoni o po bonŋanla. O baa bolini bi paatietianba leni U Tienu nigagidiŋanba,

²⁵ Kelima o nunfanbiadibu po, o baa baa ki boandi nitoaba. Ti japaadi baa kua o niinni wan bolini bi niba boncianla, yaaba n ye leni mi yanduanma. O baa fiini mi yiema bi badiba Bado po. Ama o baa bodi ke nisaalo nuu ki sii o.

²⁶ Ŋan laa ke bi maadi yaa tiŋaadi leni yaa yenjuadi maama li bonlekaala nni yeni, tie moamoani. Ama ŋan yaa kubi li bonlekaala yeni lan yaa tie ŋasiili, kelima li maadi yaa yogunu n ye hali liiga yaa po yo.

²⁷ Lanyogunu mini Danieli den tadigi ki yiagi danaba. Min den paagi, n den fii ki go tuuni o bado tuonli. Ama laa bonlekaala den wudi n gbanu, kelima mii den gaa lan bua ki yedi yaala.› »