Danieli 7 - U TIENU MAAMA TILI 2013

Danieli n baa yaa bonlekaala 7—12 Danieli bonlekakpiala: ti yannaaditi

¹ Babilonni bado Belitisasari bali binkpiali nni, Danieli den dua o duanu po, ki dangi ki laa li bonlekaala. O den yuandi ki diani ti dangidi yeni ki togidi ti maama fuuli.

² O den yedi: «Ku ñiagu n den laa li bonlekaala n dangidi nni, ke yaa faalu n ñani ki tinga ñoakunnaadi kuli, den figi ki fiindi mi ñincianma.

³ Yanciandinaa den ñani mi ñincianma nni. Yangiba kuli ki den naani leni kiyaga.

⁴ Ki yankpiaga den naani leni o yangbanlo, ama ki pia i fiabi nani jiebani yeni. Min diidi yaa yogunu, bi den ŋabi o fiabi ki teni ke o yaadi ki sedi taanalie nani o nisaalo yeni, ki puni o o nisaalo yantiali.

⁵ Ki yanliega den naani leni yaa fuayanbiadiga n yi ursi. O den se kaliyendu yaa taana po, ki babi kalitaa. Bi den yedi ke wan fii ki ŋmani ti nandi boncianla.

⁶ Li yaa puoli, n go den nuali ki laa yantoaga ke ki naani leni o naamunpieno. O den pia ti bonyugiditi yaa fiabi boninaa o puoli po leni yulanaa. Bi den dini o li bali.

⁷ Ku ñiagu yeni, n bonlekaala nni, n go den laa ki yannaaga, yaaga yaa noanlima n pia i jeje hali boncianla. Ki yanga yeni den pia u fidu hali ke li kandi, ki pia a ñinciama ke a tie kudi. Laa yanga den ŋmani kan cuo yaala ki padi padi la, ki ŋmaadi kan ki ŋmani yaala. Kaa den naani leni ti yantaadikpiadi. Ki den pia yina piiga.

⁸ Min den diidi a yina yeni yaa yogunu, n den laa ke yintoali, yaali n wa ki cie aya, pudi a siiga ki ŋabi ya n den kpa ye yeni siiga yinataa. Ki yinbiga yeni den pia i nuni nani o nisaalo yeni, ki go pia bu ñoabu ki maadi mi japaamaama.

U Tienu jia ti buudi

⁹ N go den nuali ki laa ke bi sieni li bali kalikaani, ke jakpeloba cua ki kali. O tiayiekaadi den pieni paipai. O yudi mo den pieni nani mi kunkunyoma yeni. O bali kalikaanu den yieni nani mi fantanlanma yeni. Li bali kalikaanu n den maa yaa kaanda po moko den yieni nani u mupienu yeni.

¹⁰ U mu den puubi ki ña o nintuali nani u kpenu yeni. Niba tuda tuda den tuuni o po, tuda tuda kaa pia bianu den se o kani. Bi bujiaba den kaa ki poabidi a tila.

¹¹ N go den diidi. Ki yinbiga yeni n den maadi yaa japaamaama po, den teni ke bi kpa ki yannaaga yeni. Bi den luni ki nandi u mu nni, ki buoni ti.

¹² Bi den gaa yaa yandi n sieni yaa bali, ama bi den cedi ke bi baa ki ye ki fo ki pundi hali yogunuba.

¹³ N go den laa ku ñiagu bonlekaala yeni niinni, ke yua n naani leni o nisaalo ye ti tawadi po, ki kpendi ki tiegi o jakpelo yeni. Bi den ciani o ke o pundi o kani.

¹⁴ O den dini o nisaalo yeni li bali, ki puni o ti kpiagidi leni mi diema. I nibuoli, mi diema leni i mabuoli yaaba kuli den tuo ki ŋua o. O bali baa yaa ye hali yaa yogunu kuli, li kan baa gbenma, o diema mo kan bodi abada.

Danieli baa o bonlekakpiala bundima

¹⁵ Mini Danieli yama den yagi boncianla. Min den laa yaa bonlekaala den pia n po i jeje boncianla.

¹⁶ N den nagini yaaba n se yeni siiga yendo kani, ki mia ke wan bundi n po, ki waani nni li bonla yeni kuli, n tie yaala moamoani. O den waani nni, ki bundi n po la, ki yedi:

¹⁷ ‹Ti yanciannaaditi ne, tie dieminaa, yaama n baa ti fii ki tinga nni.

¹⁸ Ama tanpolijoma Tienu nigagidiŋanba baa ti yuandi ki gaa mi diema, ki yaa die ma hali yaa yogunu kuli.›

¹⁹ Li yaa puoli, n den bua ki bandi cain ki yannaaga bundima moamoani. Kaa den taa leni ki lieba. Ki noanlima den pia i jeje boncianla. Ki den pia yaa ñina n tie kudi leni yaa taajenbiñadi n tie kumoandi. Ki den ŋmani kan cuo yaala, ki padi padi la, ki ŋmaadi kan ki ŋmani yaala.

²⁰ N go den bua ki bandi ki yannaaga yeni n den pia yaa yinpiiga, ki yuli po leni yaa yintoali n go den pudi, ki ŋabi yinataa yeni maama fuuli. Laa yinli n den pia i nuni ki go pia yaa ñoabu n maadi mi japaamaama, ki yabidi ki cie li yinliela. N go den bua ki bandi li yaa maama fuuli.

²¹ Min den diidi yaa yogunu, li yinli yeni den tuogi leni U Tienu nigagidiŋanba bu toabu ki paadi ba,

²² hali ke o jakpelo den cua ki jia ti buudi ki puni wani tanpolijoma Tienu nigagidiŋanba i moamoani. U yogunu n den pundi, bi nigagidiŋanba den baa li bali.

²³ Min den buali yua yeni, den yedi nni: ‹Ki yannaaga yeni tie mi dienaama, yaama n baa je ŋanduna diema kuli, ki padi padi ki yaa ŋmani ma, ki go yaa ŋmaadi ma.

²⁴ Yina piiga yeni, tie badiba piiga yaaba n baa ŋoadi ŋoadi biyaba mi diema yeni niinni. Li yaa puoli, baditoa baa fii. O kan yaa taa leni yaaba n den kpa fii yeni, o baa jiini badibitaa.

²⁵ O baa maadi ki sugi tanpolijoma Tienu, ki yaa mabindi o nigagidiŋanba. O go baa jagi ke o baa lebidi wani U Tienu niba jaanma yogini leni bi bali maama. Bi baa lu U Tienu nigagidiŋanba yeni o nuu nni, hali lan pundi binataa leni boagidima.

²⁶ Li yaa puoli, li bujiali baa tieni, ban gaa ki yannaaga yeni bali kuli, ki bolini ka yaa yogunu kuli po.

²⁷ Bi baa teni U Tienu niba, wani tanpolijoma Tienu nigagidiŋanba yeni yaa diema n ye ŋanduna nni kuli bali leni mi kpiagidi, ban yaa die. Bi diema baa yaa ye hali yaa yogunu kuli. Ŋanduna bali danba kuli baa tuo bi maama ki yaa tuuni bi po.›

²⁸ Li maama gbenma n yeni. Mini Danieli yama den yagi, i jeje den cuo nni, ke n tugusoama sani ke n nunga gbidi. N den kubi mi maama yeni n pali nni.