Danieli 6 - U TIENU MAAMA TILI 2013

¹ Medi yua Dariyusi den gaa li bali ki pia piiluoba n binalie.

Danieli yudanlieba bua ki janbi o

² Dariyusi den sua ke li ŋani wan gandi niba kobiga n piilie ki dini ba li bali, ban yaa tie guveneerinba yaaba n baa kali mi diema nni kuli, ki yaa die ki go gobidi.

³ O go den gandi yudancianbitaa, guveneerinba yeni n baa yaa wangi yaaba mi diema maama kuli n cuoni maama, ke o bado ŋantaado oba kuli n da poadi. Danieli den tie laa yudanciantaadiba siiga yendo.

⁴ Danieli den cie o yudanlieba leni guveneerinba yeni kuli, kelima o den pia li yantiaŋanli ki cie bikuli. Lani, o bado den jagi ke o baa dini Danieli li bali, wan todi o ki yaa die mi diema kuli.

⁵ Ama Danieli yudancianlieba leni guveneerinba den lingi ban baa kuli o leni yaala mi diema ŋantaadi nni. Ama baa den baa kuli ban baa kuli o leni yaala, kelima o den tie nimoano. Baa den laa o kani tudimiba kuli.

⁶ Lanwani, bi jaba yeni den yedi: «Ti kan le tin baa kuli Danieli leni yaala, li yàá tie o Tienu bali maama nni yaa ka.»

⁷ Li yaa puoli, bi yudancianliediba leni guveneerinba yeni, den jaligi ki gedi o bado kani ki yedi o: «O bado Dariyusi, ŋan yaa ye hali yaa yogunu kuli.

⁸ Tinba mi diema yudancianba, guveneerinba, bi cancantieba leni a koanbala kuli taani yanyenma, ki sua ke li ŋani ŋan ñani li ñoamabonli, ki teni ban kpaani, ki yedi ke dana piitaa bianu oba kuli n da jaandi ki kpiagi tienuba bi nisaaloba kuli, li yàá tie fini o bado. Yua n yie laa ñoamabonli kuli, ban lu o i yangbanli buogu nni.

⁹ Moala, o bado, ŋan ñani laa ñoamabonli, ki tieni a maalima ke li kan lebidi, nani Medi leni Persi diema yaaba bali maama n kan lebidi maama yeni.»

¹⁰ Lanwani, o bado Dariyusi den ñani li ñoamabonli yeni, ki tieni o maalima.

Bi luni Danieli i yangbanli buogu nni

¹¹ Danieli n den bandi ke laa ñoamabonli diani, o den kuni o denpo. O tanpodieli diebona den tiegi Jerusalemi. O den luodi a. Li tanpodieli yeni niinni, Danieli den gbaandi ki jaandi ki miadi U Tienu taalimitaa daali kuli, nani wan den maani ki tiendi maama.

¹² O yibalinba yeni den jaligi ki kua o dieli nni, ki sua ke o gba ki jaandi ki miadi o Tienu.

¹³ Lanwani, bi den gedi o bado kani ki maadi leni o li ñoamabonli yeni maama, ki yedi o: «Ŋaa den bili ke yua n jaandi ki kpiagi tienuba, yaa ka nisaaloba, kaa tie fini o bado, bi baa lu o i yangbanli buogu nni?» O bado den guani ki yedi: «Yeni de! Li bili ki kan lebidi mo, nani Medi leni Persi yaaba bali maama n kan lebidi maama yeni.»

¹⁴ Lanwani, bi den yedi o bado: «Danieli, ban den cuo Juda yaaba siiga yua, waa nua fini o bado ke a tie puu, waa fangi ŋan bili yaa ñoamabonli. O jaandi o Tienu taalimitaa daali kuli.»

¹⁵ O bado n den gbadi laa maama, o pali den biidi boncianla. O den bili o yama nni, ke o baa faabi Danieli. O den moandi wan fidi maama kuli, hali li yenjuabaanli ki bua ki faabi o.

¹⁶ Ama bi jaba yeni den jaligi ki guani o bado kani, ki yedi o: «O bado, ŋan tiadi ke Medi leni Persi yaaba bali maama bili, ke o bado n ñani yaa ñoamabonli bi yaa mabilikaama kan lebidi.»

¹⁷ Lani, o bado den teni ke bi cuani Danieli, ki luni o i yangbanli buogu nni. O bado den yedi Danieli: «A Tienu, ŋan ŋua yua yaa yogunu kuli n gaa ŋa!»

¹⁸ Bi den cuani li tanli ki biini ku buogu ñoabu. O bado den taa o ñoagima yaama n pia o maalima, ki go taa o paatieba yaa ñoagima yaama n pia bi maalima, ki ñii ki tabini, ke liba kuli n da lebidi Danieli po.

¹⁹ Li yaa puoli, o bado den guani ki kua o diegu nni. O den dua waa dini, mi guama den yie o, waa den tuo ke o puoba siiga oba kuli kua o kani mo.

Danieli ñani i yangbanli buogu nni

²⁰ Lan den fii ki faa, o bado den jaligi ki gedi i yangbanli buogu po, hali ke li daa yendi.

²¹ Wan den nagidi ku buogu, o den tiani leni li paboanli ki yini Danieli, ki yedi: «Danieli, U Tienu yua n fo naacemo, wani a Tienu, ŋan ŋua yua yogunu kuli, fidi ki gaa ŋa i yangbanli kani?»

²² Danieli den guani ki yedi: «O bado, ŋan yaa ye hali yaa yogunu kuli.

²³ N Tienu soani o maleki ke o mubini i yangbanli ñoana. Baa tieni nni bonbiadiliba kuli, kelima o sua ke mii pia o po tagiliba kuli. Mii tudi fini o bado mo yaa po.»

²⁴ Lani, o bado pali den mangi boncianla, ke o teni ke bi ñani Danieli ku buogu nni. Ban den ñani o, baa den laa o po poagilimiba kuli, kelima o den dugi o Tienu po.

²⁵ O bado den teni ke bi cuani yaa jaba n den kuli Danieli yeni, ki luni ba i yangbanli buogu nni, bani, bi puoba leni bi bila. I yangbanli den cuo ba ki toadi toadi ba, hali ke bi daa pundi ku buogu tinga.

²⁶ Li yaa puoli, o bado Dariyusi den soani i nibuoli, mi diema, i mabuoli leni yaaba niba n ye ŋanduna nni kuli kani, ki yedi ba: «Mi yanduanma n yaa pugidi yi po.

²⁷ N bili ke yinba yaaba n ye n diema nni kuli, n fangi Danieli Tienu bonŋanla, Kelima wani n tie U Tienu yua n fo, O baa yaa ye hali yaa yogunu kuli. O bali kan baa gbenma abada, O baa yaa die hali yaa yogunu kuli.

²⁸ Wani n ciadi ki faabidi, Ki tiendi sinankeeninba leni mi bancianma, Tanpoli leni ki tinga nni kuli. Wani n gaa Danieli i yangbanli kani.»

²⁹ Danieli bali den pugini o bado Dariyusi bali jama nni leni o bado Sirusi yua n den tie Persi diema yua yaa bali jama nni kuli.