Danieli 5 - U TIENU MAAMA TILI 2013

O bado Belitisasari jaanjecianma

¹ Dayenli o bado Belitisasari den tieni mi jaanjecianma, ki yini o paatieba ke bi pundi niba tudili. O den ñuni mi daama leni ba.

² Wan den ñuni mi daama yeni, o den yedi ke ban cuani o kani o baa Nebukanesa n den fie yaa wula leni yaa ŋanjilifa tadiñokaamu U Tienu diegu yaagu n ye Jerusalemi nni, ke wani o bado, o paatieba, o puoba leni o puoconcona n ño mu niinni.

³ Lani, bi den taa wula tadimu, ban den fie yaamu, U Tienu diegu yaagu n ye Jerusalemi nni ki cuani, ke o bado, o paatieba, o puoba leni o puoconcona ñuni mu niinni.

⁴ Bi den ñuni duven ki pagi bi buli yii n tie wula, ŋanjilifa, kumoandi, kuboandi, daadi leni tana kuli.

⁵ Lanyogunu o nisaalo nubianli den leti ki diani o bado dieli bilinu po, ban den boali yuu leni li muanli. Li nubianli yeni den diani ki kuu u fidisantuankaanu. O bado den laa li nubianli yeni ke li dangi.

⁶ Lani, o nunga den gbidi, o yama mo den yagi, o gbanu den wudi, o duna mo den pua aya.

⁷ Wani o bado den tiani ki yedi ke ban yini Babilonni banda: a baabuula, bi buligbandanba leni a lingida ke ban cua o kani. Lani, o bado den yedi Babilonni banda yeni: «Yua n fidi ki cogi yaa diani n tie ne ki bundi n po kuli, n baa teni ban lani o ti badijatiamoandi leni u wula laanu. O baa tua o nitaalo mi diema bali danba siiga.»

⁸ O bado banda kuli den nagini, ama baa den fidi ki cogi i diani yeni ki bundi o po.

⁹ Lani yaa po, o bado Belitisasari yama den yagi ke o nunga mo gbidi ki pugini. O paatieba moko den jie ki duodi.

¹⁰ O bado naa den gbadi o bado leni o paatieba fuugu, ki kua ban den taani mi jaanjiema po yaa dieli nni, ki yedi: «O bado, ŋan yaa ye hali yaa yogunu kuli. A yama n da yagi, a tugusoama mo n da sani.

¹¹ O joa ye a diema nni, ke U Tienu Yua n Gagidi ki ŋani banma ye o niinni. A baa n den ye yaa yogunu, bi den laa o niinni mi yanyendima leni u fanu leni yaa yanfuoma n tie U Tienu Yua n Gagidi ki ŋani yaama. Lani yaa po yo, ke a baa o bado Nebukanesa den tuni o a lingida, a baabuula, bi buligbandanba leni bi ñoagidanba kuli yuli,

¹² kelima bi den laa ke wani Danieli, o bado n den lebidi yua yaa yeli ki yini o Belitisasari, pia li yantiaŋanli, mi bancianma leni mi yanfuoma, ki fidi ki bundi ti dangidi leni mi kpanjañuanma, ki go fidi ki galiti yaala n gali. Lani yaa po, ŋan teni ban yini wani Danieli, o baa bundi a po laa diani n yedi yaala.»

Danieli bundi o bado po i diani yeni n yedi yaala

¹³ Bi den cuani Danieli o bado kani. O bado den buali o: «Fini n tie Danieli, ban cuo yaaba siiga, n baa o bado n den ñani yaaba Juda diema nni, ki cuani ne yeni?

¹⁴ N gbadi ke bi maadi a maama, ki tua ke U Tienu Yua n Gagidi ki ŋani banma ye a niinni, ke a pia mi yanyendima, u fanu leni yaa yanfuoma n yabi.

¹⁵ Bi cuani n kani a banda leni a baabuula ke ban cogi n po yaa diani n tie ne ki bundi n po, ama baa fidi ki bundi n po.

¹⁶ N gbadi ke fini wani baa fidi ki bundi yaa maama n ñua, ki galiti yaala n gali. To, a yaa fidi ki cogi i diani ne, ki bundi n po, bi baa lani a ti badijatiamoandi leni wula laanu. A baa tua o nitaalo mi diema bali danba siiga.»

¹⁷ Danieli den yedi o: «A kubi a paabu, bi ŋan pa nitoa. Ama ba yeni, n baa cogi i diani ne, ki go bundi a po.

¹⁸ O bado, tanpolijoma Tienu den dini a baa Nebukanesa li bali, ke o tua badiciamo ki go puni o ti kpiagidi leni ti jigidi, ki ñani o yeli.

¹⁹ Wani U Tienu n den ñani o yeli maama po, i nibuoli, mi diema leni mabuoli kuli den jie o ki digibi o nintuali. O den kpaani wan bua ki kpa yaaba, ki ŋaani wan bua ki ŋaa yaaba. O den duondi wan bua yaaba, ki jiindi wan ki bua yaaba.

²⁰ Ama wan den fiini o yuli, ki juagi o pali, ki cuoni leni ti japaadi yaa yogunu, bi den gaa o bali, ki fie o kpiagidi.

²¹ Bi den deli ki ñani o bi nisaaliba siiga. O yama den lebidi ki tua nani ti yandi yaama yeni. O den taa ki ye leni i fuaŋunbi. Bi den tendi o ti muadi ke o ŋmani nani i ne yeni, ke ku mangu soangidi o, hali ke o ban bandi ke tanpolijoma Tienu n die bi nisaaliba diema kuli, ki dindi wan bua yua li bali.

²² Ama fini Belitisasari o bijua mo, ŋaa miini a yuli, ba ke a bandi laa bonla kuli.

²³ A fiini a yuli, ki koani leni Tanpoli Diedo, ki teni ke bi cuani a kani yaa tadiñokaamu n den ye o diegu nni, ke yi ñuni mi daama mu niinni, fini leni a paatieba, a puoba leni a puoconcona. A pagi i buli yii n tie ŋanjilifa, wula, ti kumoandi, ti kuboandi, ti daadi, yaa ka a tana, yaala n kaa gba, kaa bani liba mo. Ŋaa kpiagi U Tienu yua n kubi a miali leni a cabili kuli o nuu nni.

²⁴ Lani n teni ke o soani li nubianli ke li diani i diani ne.

²⁵ Yaala n diani tie line: MENE MENE TEKEL PADISINI.

²⁶ Mi bundima nne: MENE bua ki yedi ke bi coadi. U Tienu coadi a bali dana ki gbeni a.

²⁷ TEKEL bua ki yedi ke bi biigi. U Tienu biigi a leni li bonbiigikaala ki sua ke a poadi.

²⁸ PADISINI bua ki yedi ke bi boagidi. U Tienu boagidi a diema ki teni Medi leni Persi yaaba.»

²⁹ Lanyogunu Belitisasari den teni ke bi lani Danieli ti badijatiamoandi leni wula laanu ki kpaani ki puni o o nitaalo kaanu mi diema bali danba siiga.

³⁰ Laa ñiagu liga, bi den kpa Babilonni diema bado Belitisasari.