Danieli 4 - U TIENU MAAMA TILI 2013

O bado Nebukanesa dangiliedi

¹ Mini o bado Nebukanesa den ye n diegu nni, n den ye likani leni mi yemanma.

² N den dua n duanu po, ki dangi yaa dangidi n yagi n yama. Min den dangi ki laa yaa bonlekaala, den pia i jeje boncianla.

³ N den teni ke bi yini Babilonni banda kuli, ke ban cua n kani ki bundi n po ti dangidi yeni.

⁴ A lingida, a baabuula, bi buligbandanba leni bi ñoagidanba kuli den cua. N den waani ba ti dangidi yeni ama baa den fidi ki bundi n po.

⁵ Danieli, ban den lebidi yua yaa yeli ki yini o Belitisasari, n tienu n yi maama, den yuandi ki cua. U Tienu Yua n Gagidi ki ŋani yaa banma ye Danieli niinni. N den waani o ti dangidi yeni, ki yedi o:

⁶ ‹Belitisasari, a lingida yudaano, n bani ke U Tienu Yua n Gagidi ki ŋani banma ye a niinni, bondoaginkaaliba ki paki a. Bundi n po min den laa yaa bonlekaala n dangidi nni.

⁷ N den dua n duanu po, ki dangi ki la yaa bonlekaala n tie ne: N den laa ke yaa tibu n kpedi Boncianla se ŋanduna kuli siiga.

⁸ Bu tibu yeni den kpedi ki yabidi ki pa. Bu joma den pundi hali tanpoli. Yua n den ye ba u tinbianu Den baa yaa nua bu.

⁹ Bu faadi den ŋani. Bu bonluonkaala mo den yabi ki dagidi, Ke yaala n fo kuli den baadi Li bonjekaala bu kani. Ti fuayandi den ye bu soangu nni, Ti bonyugiditi mo den tiendi Bi tiana bu beni nni, Yaala n fo kuli den baadi li jiema bu kani.

¹⁰ Min den dua n duanu po Ki dangi yaa yogunu, N den sua ke malekinba yaaba faami li bonla kuli po, Siiga yendo den ñani tanpoli ki jiidi.

¹¹ O den paagi oba ki kpaani ki yedi: Pedi mani bu tibu ne ki cuadi cuadi bu beni, Ki suodi bu faadi ki yadi bu bonluonkaala, Ki teni ti yandi n sani ki ña bu soangu nni, Ki go teni ti bonyugiditi mo n ña bu beni nni.

¹² Yin ŋa mani li ñiali leni i jiini, Ki loli li ti kumoandi leni i kuseseli. Lin yaa se li fuali moasoangidi siiga. Ku mangu n yaa soangidi li, Lin yaa ŋmani ti muadi nani ti yandi yeni.

¹³ Bi baa lebidi o yama ki teni o ki yanga yaa yama. O baa yaa tie yene hali binalele n pendi.

¹⁴ Malekinba yaaba n faami li bonla kuli po yeni n cuani li ñoamabonli yeni. Yeni de! Bani n caa u tondu yeni, ki bua ke yaaba n fo kuli n bandi ke tanpolijoma Tienu n die bi nisaaliba diema, ki dindi wan bua yua li bali, ki fiindi mi diema nni yua n tie taliga ki cie o lieba.

¹⁵ Mini o bado Nebukanesa n den dangi yaa dangidi n yeni. Belitisasari, ŋan bundi ti n po, kelima yaa banda n ye n diema nni kuli, ki fidi ki bundi ti n po. Ama fini, a baa fidi, kelima U Tienu Yua n Gagidi ki ŋani yaa banma ye a niinni.› »

Danieli bundi o bado Nebukanesa po o dangidi

¹⁶ Lani, Danieli ban go den yi yua Belitisasari, gbanu den wudi u yogunu waamu. O yama mo den yagi. Lani, o bado den yedi o: «Belitisasari, ti dangidi ne leni ti bundima n da yagi a yama.» Belitisasari den guani ki yedi o: «N daano, ti dagidi ne n yaa tie a yibalinba po, ti bundima n yaa tie a nando po.

¹⁷ A den laa yaa tibu, ke bu yabi ki pa ke bu joma pundi hali tanpoli, ke ba yua n den ye u tinbianu baa yaa nua bu.

¹⁸ Bu faadi den ŋani, bu bonluonkaala den yabi ki dagidi ke yaala n fo kuli baadi li bonjekaala bu kani. Ti fuayandi den ye bu tinga, ti bonyugiditi mo den tiendi bi tiana bu beni nni.

¹⁹ Bu tibu yeni tie fini o bado yo. A yeli ñani, a paalu yabidi, a bali kpiagidi yabidi ki pundi hali tanpoli, a diema mo yabidi ke a diedi hali ŋanduna bianu kuli.

²⁰ A go den laa ke yaa malekinba n faami li bonla kuli po yeni siiga yendo ñani tanpoli ki jiidi, ki yedi: ‹Pedi mani bu tibu ne ki bolini bu. Ama yin ŋaa mani li ñiali leni i jiini, ki loli li ti kumoandi leni i kuseseli. Li baa yaa se li fuali moasoangidi siiga ku mangu n yaa soangidi li. Ti moasoangidi baa tua lini leni ti yandi biinu hali binalele n pendi.›

²¹ O bado, ti bundima tie ke tanpolijoma Tienu bili ke line n baa cua fini n daano po:

²² Bi baa deli ki ñani a bi nisaaliba siiga. A baa yaa taa ki ye leni ti fuayandi, bi baa yaa tendi a ti muadi ke a ŋmani nani i ne yeni. Ku mangu baa yaa soangidi a. Li baa yaa tie a po yeni hali binalele n pendi, hali ŋan baa bandi ke tanpolijoma Tienu n die bi nisaaliba diema kuli, ki dindi wan bua yua li bali.

²³ Lan den bili ke ban ŋaa li ñiali leni i jiini yeni bua ki yedi, ke a yaa ti bandi ke tanpolijoma Tienu n die li bali, a go baa diedi a diema.

²⁴ Lani yaa po, o bado, tuo ki gaa n tundi ne: cedi a tuonbiadi, ki yaa tiendi yaala n tiegi. Cedi a biadima, ki yaa gba a luoda po mi ninñima, daalinba yeni a baa yaa baa ki ye.»

Ti dangidi n yedi yaala yeni tieni

²⁵ Li bonla yeni kuli den tieni o bado Nebukanesa.

²⁶ Piiga n ŋmaalilie n den pendi, o den ye ku badidiegu doangu yuli po, Babilonni niinni, ki goadi.

²⁷ O den yedi: «Mini ka maa Babilonni dogu ne, ke u tua badidogu te? U doagidi n paalu n yabi maama leni n bali n pia yaa kpiagidi.»

²⁸ Hali ke o bado daa maadi ki gbeni, u nialu den ñani tanpoli po ki yedi: «O bado Nebukanesa, cengi yaa maama n tie ne: Bi gaa a bali.

²⁹ Bi baa deli ki ñani a bi nisaaliba siiga, a baa yaa taa ki ye leni ti fuayandi. Bi baa yaa tendi a ti muadi ke a ŋmani nani i ne yeni. Li baa yaa tie a po yeni hali binalele n pendi, hali ŋan baa bandi ke tanpolijoma Tienu n die bi nisaaliba diema kuli, ki dindi wan bua yua li bali.»

³⁰ Lanyogunu liga, li bonla yeni den tieni Nebukanesa. Bi den deli ki ñani o bi nisaaliba siiga. O den ŋmani ti muadi nani i ne yeni. Ku mangu den soangidi o gbanandi. O yudi den yabidi nani jiebani kobidi yeni, o niñadi mo den noadi ki foagidi nani ti bonyugiditi taajenbiñadi yeni.

Bi guani ki teni Nebukanesa o bali

³¹ Nebukanesa den yedi: «Yaa yogunu n den bili n po n den tuoni, mini Nebukanesa den yaadi n yuli ki diidi tanpoli, ke n yama guani. N den jaandi tanpolijoma Tienu, Ki go pagi ki kpiagi wani yua n ye hali yaa yogunu kuli, Wani yua yaa diema n ki pia bianu Ke o bali mo ye nifiima n tuu nifiima.

³² Ki tinga kuli niba buli ki tie o po puu. O tiendi tanpoli yaaba leni ŋanduna yaaba kuli, wan bua yaala. Oba kuli ki ye, ki baa fidi ki yie o po Ke o kan tieni wan bua yaala, Yaa ka ki buali o: ‹A tiendi be nne?›

³³ Lanyogunu n yama den guani. Bi den guani, ki teni nni n bali kpiagidi leni n bali jilima moko. N koanbala leni n paatieba go den cua ki taa nni. Bi den guani ki teni nni n bali, n paalu mo den pugini ki cie kpiama.

³⁴ Moala mini Nebukanesa, n pagi ki go kpiagi tanpolijoma Tienu ki jigini o yeli. O tuona kuli tiegi moamoani, O bontienkaala kuli dagidi. O fidi ki jiini yaaba n cuoni leni ti japaadi.»