Danieli 3 - U TIENU MAAMA TILI 2013

Nebukanesa bili ke ban kpiagi li wula nisaali-nannanli

¹ O bado Nebukanesa den teni ke bi tieni li wula nisaali-nannanli. Li kpedima den tie nukpanduna piiluoba, li pianu mo nukpanduna luoba. O den teni ke bi sieni li, Dura tialu nni, yuu n ye Babilonni diema nni.

² Lani, o bado Nebukanesa den soani ban ban yini guveneerinba, bi cancantieba, a koanbala, mi diema ligikubida, bi bujiaba, bi saliyajiaba, bi badijaba leni bi paatieba kuli. O den soani ban ban yini ba, ke ban cua ki jaani yaa jaanma n baa gagidi o bado Nebukanesa n den teni ke bi sieni yaa nisaali-nannanli yeni.

³ Lani, bi yudanba yeni kuli den cua, ki baa taani ki jaani yaa jaanma n baa gagidi o bado n den teni ke bi sieni yaa nisaali-nannanli yeni. Bi den sedi li nannanli yeni nintuali.

⁴ O kpakpaando den kpaani ki yedi: «Yinba i nibuoli kuli niba, diema kuli niba leni i mabuoli kuli niba, bi bili yi po yaa ñoamabonli n tie ne:

⁵ Yi yaa gbadi a naatuntuna, mu yelimu, ti gogiditi, mu sielimu, a gogididajena, ti tankpelundi leni yaa baantiadi n sieni kuli fuugu yaa yogunu, yin labini mani ki kpiagi o bado n teni ke bi sieni yaa wula nisaali-nannanli yeni.

⁶ Yua n ki labini ki kpiagi li kuli, bi baa cuo o lanyogunu lige, ki lu o yaa buaga n yigidi ki tuoni niinni.»

⁷ Lani, i nibuoli, mi diema leni i mabuoli kuli niba n den gbadi a naatuntuna, mu yelimu, ti gogiditi, mu sielimu, a gogididajena leni yaa baantiadi n sieni kuli fuugu, bikuli den labini ki kpiagi o bado Nebukanesa n den sieni yaa wula nisaali-nannanli yeni.

Danieli lieba yie ke bi kan kpiagi li nisaali-nannanli

⁸ Li yaa puoli, Kalide diema yaaba siiga bi tianba den nagini, ki kuli Jufinba o bado kani.

⁹ Bi den yedi o: «O bado, ŋan yaa ye hali yaa yogunu kuli.

¹⁰ A den ñani li ñoamabonli ki yedi, ke yua n gbadi a naatuntuna, mu yelimu, ti gogiditi, mu sielimu, a gogididajena leni yaa baantiadi n sieni kuli fuugu, wan labini ki kpiagi li wula nisaali-nannanli ne.

¹¹ Yua n ki labini ki kpiagi li kuli mo, bi baa lu o yaa buaga n yigidi ki tuoni boncianla niinni.

¹² O bado, Sadiraki, Mesaki leni Abedi-Nego, ŋan den dini yaa Jufinba, ke bi tua Babilonni dobila koanbala yudanba yeni, naa tuo a ñoamabonli. Baa ŋua a tieni, baa kpiagi ŋan sieni yaa wula nisaali-nannanli mo.»

¹³ Lani, Nebukanesa pali den fii ki beni hali boncianla, ke o yedi ke ban cuani Sadiraki, Mesaki leni Abedi-Nego o kani. Bi den cuani ba o nintuali.

¹⁴ Wani Nebukanesa den yedi ba: «Sadiraki, Mesaki leni Abedi-Nego, naani li tie moamoane, ke yii ŋua n tieni, kaa kpiagi min teni ke bi sieni yaa wula nisaali-nannanli yeni?

¹⁵ Moala yin bogini mani, yi yaa go gbadi a naatuntuna, mu yelimu, ti gogiditi, mu sielimu, a gogididajena leni yaa baantiadi n sieni kuli fuugu, lanyogunu liga yo, yin labini ki kpiagi min teni ke bi tieni yaa nisaali-nannanli yeni. Yi yàá pugi li, lanyogunu liga, bi baa lu yi yaa buaga n yigidi ki tuoni niinni. U laa tienu n baa fidi ki faabi yi n nuu nni?»

¹⁶ Sadiraki, Mesaki leni Abedi-Nego den guani ki yedi o bado: «Ti kan lebidi a liba kuli.

¹⁷ Ti Tienu, tin ŋua yua n baa fidi ki faabi ti. O baa ñani ti yaa buaga n yigidi ki tuoni niinni, ki go gaa ti fini o bado nuu nni.

¹⁸ Ama ba o yàá bua ki faabi ti, ŋan bandi ke ti kan ŋoadi a tieni, ti kan kpiagi ŋan teni ke bi sieni yaa wula nisaali-nannanli yeni mo.»

¹⁹ Nebukanesa n gbadi laa maama, o pali den beni ke li kandi, ke o nunga lebidi ki biagi Sadiraki, Mesaki leni Abedi-Nego po. O den teni ke bi tongi ki buaga, ke li cie ban yen tongidi ga maama taalimilele.

²⁰ Lani, o den puogi o toatieba siiga yaaba n pia u fidu ki cie ke ban loli Sadiraki, Mesaki leni Abedi-Nego ki lu ba yaa buaga n yigidi ki tuoni yeni niinni.

²¹ Bi den loli bi jaba yeni leni bi tiayiekaadi, ki luni ba yaa buaga n yigidi ki tuoni yeni niinni.

²² O bado ñoamabonli n den pa maama leni ki buaga n den yigidi ki tuoni ke li kandi maama, u mu den liabi ki kpa yaa jaba n den luni Sadiraki, Mesaki leni Abedi-Nego yeni.

²³ Bi jataadiba yeni, Sadiraki, Mesaki leni Abedi-Nego den baa yaa buaga n yigidi ki tuoni yeni niinni ki luo.

U Tienu faabi Danieli danlitaadiba ki buaga nni

²⁴ Ti jawaandi den cuo Nebukanesa ke o fii tontoni. O den yedi o koanbala: «Tii bi loli jabitaa ka ki luni u mu nni?» Bi den guani ki yedi o: «Ti daano, yeni de!»

²⁵ O den guani ki yedi: «N nan nua nibinaa yo ke baa luo mo. Bi cuoni u mu nni, ke puu kuli ki pia ba. O ninaalo bugima tie nani tienu yene.»

²⁶ Lani, Nebukanesa den nagini yaa buaga n yigidi yeni buliñoabu kani, ki kpaani, ki yedi: «Sadiraki, Mesaki leni Abedi-Nego! Yinba tanpolijoma Tienu naacenba, ña mani ki cua ne.» Sadiraki, Mesaki leni Abedi-Nego den ñani u mu nni.

²⁷ Guveneerinba, bi cancantieba leni a koanbala den taani ki diidi, ki laa ke u mu ki fidi ki tieni bi jaba yeni gbanandi puu, bi yudi ki den juu, bi tiayiekaadi moko ki den biidi, baa den nu mu nuulu mo.

²⁸ Nebukanesa den yedi: «Sadiraki, Mesaki leni Abedi-Nego Tienu n baa ti kpiagidi, wani yua n soani o maleki, ke o faabi o naacenba yaaba n dugi o po. Bi yie mini o bado yaa ñoamabonli. Bi luni bi miana kaa tuo ki kpiagi bontoala kuli, se bi Tienu bebe.

²⁹ Lani yaa po, n bili yaa ñoamabonli n tie ne: yua n maadi yaala n bia Sadiraki, Mesaki leni Abedi-Nego Tienu po kuli, wan tie yaa mabuolu yua kuli, bi baa pedi ki jendi jendi o, ki mudi mudi o diegu mo kun tua diegbengu, kelima tientoa kuli ki ye, yua n baa fidi ki faabi o niba nanda, li yàá tie bi yaa Tienu yaa ka.»

³⁰ Li yaa puoli, o bado den pugini Sadiraki, Mesaki leni Abedi-Nego bala.

³¹ O bado Nebukanesa den soani i nibuoli, mi diema yaaba, i mabuoli kuli leni yaaba n ye ŋanduna nni kuli po yaa maama n tie ne: «Mi yanduanma n yaa pugidi yi po.

³² N sua ke li ŋani min waani yi tanpolijoma Tienu n tieni yaa sinankeeninba leni yaa bonlidinkaala.

³³ O sinankeeninba yabi boncianla. Wan tieni yaa bancianma mo pia u paalu boncianla. O baa yaa die hali yaa yogunu kuli, O bali baa yaa ye hali nifiima n tuu nifiima.