Danieli 2 - U TIENU MAAMA TILI 2013

O bado Nebukanesa dangikpiadi

¹ Nebukanesa bali binlieli, o den dangi ti dangidi. O yama den yagi, ke waa go goa.

² O den teni ke bi yini a lingida, a baabuula leni Kalide ñoagidanba kuli, ke ban waani o o dangidi. Bi den cua o bado kani.

³ O den yedi ba: «N dangi ti dangidi. N yama yagi ke n bua yin waani nni n dangidi n bua ki yedi yaala.»

⁴ Kalide banda den maadi Arameyen maama nni, ki yedi o bado: «O bado, ŋan yaa ye hali yaa yogunu kuli. Waani tinba a naacenba ti dangidi yeni, ti baa bundi ti a po.»

⁵ O bado den guani ki yedi ba: «Min jagi ki bili yaala tie, ke yi yàá waani nni ti dangidi yeni leni ti bundima, bi baa pedi ki jendi jendi yi, ki mudi mudi yi diena, ŋan tua diegbendi.

⁶ Ama yi yaa waani nni ti dangidi yeni leni ti bundima mo, n baa pa yi bu paabu boncianla leni yaa kpiagidi n yabi. Lanwani, waani nni mani, ti dangidi yeni leni ti bundima.»

⁷ Bi den guani ki yedi o miliema: «O bado n waani tinba a naacenba ti dangidi yeni, ti baa bundi ti a po.»

⁸ O bado den guani ki yedi ba: «N bandi cain ke yi bua ki baa u folu bebe, kelima yi laa ke min jagi ki bili yaa yogunu kan gandi.

⁹ Yi yàá waani nni ti dangidi yeni, buyendi n baa baa yikuli po. Yi juogi, ki baa yaa pua nni mi faama leni i boandi hali u yogunu n lebidi. Waani nni mani ti dangidi yeni, lani n baa bandi ke yi baa fidi ki bundi ti n po.»

¹⁰ Kalide banda den guani ki yedi o bado: «Laa pia ŋanduna nni, yaa nilo n baa fidi ki waani a, ŋan puogi ti yaala ne. Ti daa laa ŋanduna badicianba siiga, ba o kpiagidi leni o paalu n yabi maama kuli, yua n mabini lingido bi baabuulo bi buligbandaano ke wan waani o yaa bonla n tie ne buolu.

¹¹ O bado n puogi yaala pa, nilo kuli ki ye yua n baa fidi ki waani a, li yàá tie i tieni, yii yaa diedi n ki ye bi nisaaliba siiga yaa ka.»

¹² Lanwani, o bado pali den fii ki beni boncianla. O den ñani li ñoamabonli ke ban kpa Babilonni banda kuli.

¹³ Bi den kpaani li ñoamabonli yeni, ke bi cili ki baa kpa a banda. Bi den lingi Danieli leni o lieba ki baa bolini bani moko.

U Tienu waani Danieli o bado dangidi leni ti bundima

¹⁴ Lanwani, Danieli den maadi leni mi yanfuoma o bado guudikaaba yudaano Ariyoki yua n den ñani, ki baa n kpa Babilonni banda yeni.

¹⁵ O den yedi o: «Be yaa po ke o bado ñoamabonli bia nanda?» Ariyoki den waani Danieli mi maama yeni kuli.

¹⁶ Lani, Danieli den gedi o bado kani, ki mia o ke wan pa o u yogunu waamu wan bundi o po o dangidi.

¹⁷ Li yaa puoli, Danieli den kuni o denpo, ki ban waani o lieba Hanania, Mikayeli leni Asariya mi maama fuuli.

¹⁸ O den yedi ba, ke ban yaa miadi Tanpoli Tienu, wan gbadi bi po mi ninñima ki doagidi bi po li bondoaginkaala yeni, ke ban da taani ki bodi leni Babilonni banda yaaba n sieni.

¹⁹ Lani, li bondoaginkaala yeni den doagidi Danieli po ku ñiagu ti dangidi nni. O den jaandi ki kpiagi Tanpoli Tienu.

²⁰ Danieli den yedi: «U Tienu yeli n yaa pia ti kpiagidi hali yaa yogunu kuli. Wani n die mi yanfuoma leni u paalu.

²¹ O lebidi jama leni i yogini. O fiindi bi badiciantianba bi gbandi po, Ki kaandi toaba mo ti gbandi po. Wani n puuni bi yanfuodanba mi yanfuoma, Ki go puuni mi banma danba mi banma

²² O doagidi yaala n duagi cain, O bani yaala n ye li biigili nni, Kelima mi yenma gaani ki lindi o.

²³ N baanba Tienu, N jaandi a ki pagi a, Kelima a puni nni mi yanfuoma leni u fidu, Ki go teni ke n bandi tin mia ŋa yaala, Kelima a doagidi ti po yaala n paki o bado.»

²⁴ Li yaa puoli, Danieli den gedi Ariyoki kani, o bado n den puogi yua, ke wan kpa Babilonni banda. O den gedi o kani ki yedi o: «Ŋan da kpa Babilonni banda. Ciani nni o bado kani, ke n baa bundi o po o dangidi.»

²⁵ Ariyoki den jaligi ki ciani Danieli o bado kani, ki yedi o: «N laa ban den cuo yaaba Juda diema nni siiga, yaa joa n baa fidi ki bundi a po a dangidi.»

Danieli waani o bado o dangidi ki go bundi ti o po

²⁶ O bado den yedi Danieli, ban den lebidi yua yaa yeli ki yini o Belitisasari: «Gbadi, a baa fidi ki waani nni min dangi yaa dangidi, ki go bundi ti n po?»

²⁷ Danieli den lebidi o bado nintuali, ki yedi: «O bado, ŋan buali yaa bondoaginkaala yeni, bi ñoagidanba, a baabuula, a lingida leni bi buligbandanba kan fidi ki waani a la.

²⁸ Ama tanpoli pia yaa Tienu n doagidi li bondoaginkaala. O bado, wani n waani a, yaala n baa ti faa ki cua.

²⁹ O bado, ŋan den dua a duanu po, yaa bonla n baa ti cua yaa yogunu n tie ne yaa pendi, den kua a yantiali nni. Yua n doagidi yaa bonla n wuo den waani a, yaala n baa ti cua.

³⁰ Li bondoaginkaala yeni n doagidi n po yeni, laa tie ke n yanfuoma cie yaaba n fo kuli ka, ama li tie ke fini o bado n baa ki bandi a dangidi bundima, ki go bandi a pali n jagi yaala.

³¹ O bado, a den laa nisaali-nannancianli. Li nisaali-nannanli yeni, den yabi ki go ñuliti hali ke li kandi. Li den se a nintuali ke li bugima pia ti jawaandi.

³² Li nisaali-nannanli yeni yuli den tie wulamoano cain, li benli leni li buadi den tie ŋanjilifa, li tugu leni li pana den tie kumoandi.

³³ Li taana den tie kudi, li taafaadi moko den tie kudi, ke ti kali leni ku yoagu.

³⁴ Ŋan den diidi li nisaali-nannanli yeni, o nisaalo nuu n ki lugidi yaa tanli, den ñani li juali po ki pua li nisaali-nannanli yeni taajenfaadi yaadi n tie kudi ki kali leni ku yoagu yeni, ke ti mudi.

³⁵ Lani, ti kudi, ku yoagu, ti kumoandi, ŋanjilifa leni wula yeni, den taani ki mudi yenma, ki tua nani yaa fenma n ye u jalu nni, ku fawaagu yogunu yeni. U faalu den liebi ki ñani likuli, ke puu kuli ki sieni likani. Ama yaa tanli n den pua li nisaali-nannanli yeni den tua joacianli ki gbieni ki tinga kuli.

³⁶ N yonbidaano, a dangidi n yeni, ti bundima mo nne:

³⁷ A tie bi badiba kuli bado, kelima tanpoli Tienu puni a li bali, u paalu, u fidu leni ti kpiagidi.

³⁸ O mubini a nuu nni bi nisaaliba, ti fuayandi leni ti bonyugiditi kuli. Fini n die ba ban ye naankani kuli. Fini n tie li wulayuli yeni.

³⁹ A yaa puoli dietoama baa fii, yaama n kan pundi a yaama. Li yaa puoli, dietoama, mi bontaama, yaama n tie kumoandi baa diedi ki tinga kuli.

⁴⁰ Li yaa puoli mo, dietoama mi bonnaama, yaama yaa paalu n naani leni ti kudi, baa ŋoadi. Nani ti kudi n fidi ki mudi ki foagidi li bonla kuli maama yeni, mi dienaama yeni baa mudi ki foagidi mi diema yeni kuli yene.

⁴¹ Nani ŋan den laa, ke ti taajenfaadi leni a taajenbila poyendu tie kudi, ke poyendu mo tie yoagu maama yeni, laa diema moko boagidi yene. Ama yaala n naani leni ti kudi paalu baa yaa ye laa diema nni, nani ŋan den laa ke ti kudi kali leni ku yoagu maama yeni.

⁴² Nani a taajenbila n tie kudi ki kali leni ku yoagu maama yeni, mi dienaama yeni, baa yaa pia u fidu poyendu, ki tadi poyendu.

⁴³ Nani ŋan den laa ke ti kudi kali leni ku yoagu maama, ama bi kan yaa taa yanyenma leni biyaba, nani ti kudi leni ku yoagu n ki taa leni biyaba maama yeni.

⁴⁴ Mi diema yeni badiba yogunu, Tanpoli Tienu baa fiini dietoama, yaama n kan bodi abada. Nibuoto kan fidi ki diedi ma. Mi baa mudi ki gbeni mi diekpiama yeni kuli, ama mani miba baa yaa ye hali yaa yogunu kuli.

⁴⁵ Ŋan den laa yaa tanli, ke li ñani li juali po ke nisaalo nuu ki lugidi li, ke li pua ki mudi mudi ti kuboandi, ti kudi, ku yoagu, ŋanjilifa leni wula yeni, waani lane. U Tienu yua n die u paalu kuli, waani a yaala n baa ti faa ki cua yo. Ti dangidi yeni waani moamoani, tama mo kuli ki ye ti bundima nni.»

⁴⁶ Lani, o bado Nebukanesa den labini ki pugi Danieli, ki yedi ke ban padi a pada o po, ki go juu o po tulale.

⁴⁷ O bado den yedi Danieli: «I moamoani, a Tienu tie U Tienu ki cie bi niba n ŋua yaala kuli, ki go tie bi badicianba kuli Diedo. Wani bebe n doagidi li bondoaginkaala, kelima a fidi ki doagidi n po li bondoaginkaala yeni.»

⁴⁸ Li yaa puoli, o bado den puni Danieli ti kpiagidi, ki puni o yaa paabu n yabi, ki pia mayuli boncianla. O den dini o li bali, ke o die Babilonni leni o dobila kuli, ki go tuni o Babilonni banda yuli.

⁴⁹ Danieli den mia o bado ke o fiini Sadiraki, Mesaki leni Abedi-Nego ke bi tua Babilonni dobila koanbala yudanba. Danieli den taagi leni o bado cancantieba.