Danieli 12 - U TIENU MAAMA TILI 2013

I yanbani yogunu leni bi tinkpiba fiima maama fuuli

¹ Maleki go den yedi nni: «Li yogunu malekinba yudanciamo Miseli, yua n guu fini Danieli buolu, baa fii. Li baa yaa tie fala yogunu. Laa fala baa yabidi hali boncianla. Laa fala buolu daa kpa tieni, ki cili ŋanduna cilima ki yaa caa hali lanyogunu. Lanyogunu a buolu siiga nni, lan baa sua ke yaaba yaa yela n diani li tili nni n baa cia.

² Yaaba n goa a takula nni siiga boncianla baa fii. Bi nitianba baa fii yaa miali n kan gbeni fiima, bi tianba mo baa fii yaa fe n kan gbeni yaa fiima.

³ Yaaba n pia mi yanfuoma baa yendi, nani tanpoli yenma yeni, bani yaaba n bangi yaa niba n yabi ke bi lebidi ki ŋoadi mi teginma, baa yendi nani a ŋmabila yeni hali yaa yogunu kuli.

⁴ Fini Danieli, ŋan kubi mi maama yeni, lan yaa tie ŋasiili, ŋan da doagidi li tili yeni n yedi yaala, hali mi juodima yogunu n pundi. Li yogunu bi niba boncianla baa cogi li bi bancianma n pugini.

⁵ Mini Danieli n den diidi li bonlekaala yeni yaa yogunu, nitoaba, bonbilie den doagidi. Yendo den se li naa boanjaali po, one mo napo yaa boanjaali po.

⁶ Bi siiga yendo den buali yaa joa n yie yaa tiadi n luni leni len gaali, wani yua n den yiini u kpenciamu po yeni li bonlidinkaala yeni n baa tieni ki gbeni yaa yogunu.

⁷ Yua n den yie len tiadi yeni den yugidi o ganu leni o jienu ki tegini tanpoli, ki taa yua n ye hali yaa yogunu kuli yeli, ki poli ki yedi ke li baa yaa tiendi ki pundi binataa leni boagidima. O go den yedi ke li bonla yeni baa tieni ki gbeni U Tienu n den gagidi ki ŋanbi yaa nibuolu fidu n baa gbeni cain yaa yogunu.»

⁸ N den gbadi o maama, ama mii den fidi ki gaa ma. Lanwani, n den buali o: «N daano, laa bonla kuli baa juodi lede?»

⁹ O den guani ki yedi nni: «Danieli, ŋan da yagi a yama, kelima li baa yaa tie ŋasiili, ki puabi ki bili hali mi juodima yogunu.

¹⁰ Bi niba boncianla baa ŋuudi ki pendi paipai, ki ŋanbi nani ban yen jugi ti kudi ki ñani ti joagindi maama yeni. Bi nibiadiba baa yaa tiendi mi biadima. Bi siiga nni oba kuli kan gbadi liba, ama yaaba n pia mi yanfuoma baa gaa.

¹¹ A yaa cili ki coadi, hali ban teni ke bi cedi daali kuli padili leni ban kuani ki sieni ti caginciandi yaa yogunu, li baa yaa tie tudili n kobilie n dana piiyia (1 290).

¹² Yua n baa guudi ki pundi tudili n kobitaa n piitaa n danamuu (1 335) kuli baa baa mi yemanma.

¹³ Fini Danieli, ŋan sedi bonŋanla hali mi juodima. A baa ti fuodi ki go fii ki sedi ki gaa a panpaani ŋanduna juodima yogunu.»