Danieli 11 - U TIENU MAAMA TILI 2013

¹ Nmoko den todi wani Miseli, ki paagi o pali Medi diema yua Dariyusi bali binkpiali binli.

² Moala n baa waani a i moamoani. Diidi ki le, badibitaa go baa je li bali ki ŋoadi ŋoadi biyaba, ki diedi Persi diema. Li yaa puoli, o badinaalo baa baa mi piama ki cie bikuli. O paalu yaa pugini boncianla, kelima o piama yeni po, o baa taani o diema yaaba kuli ban tuogi leni Gireki diema yaaba bu toabu.

Nujienu leni nuganu badiba tuogi bu toabu

³ Ama o jakoando baa je li bali, ki yaa die Gireki diema leni u paalu, ki yaa tiendi wan bua yaala kuli.

⁴ Ama o paalu yaa yabidi hali boncianla, o diema baa mudi mudi ki boagidi kaaninaa, nintuali, puoli, nuganu leni nujienu. O puoliŋuani kan diedi ma, mi paalu mo kan go yaa yabi, nani man den kpa tie maama, kelima mi baa boagidi boagidi nitoaba n yaa die ma, ke laa tie o puoliŋuani.

⁵ Yua n baa diedi nuganu po diema, paalu baa yabidi ki cie o yuu. O diema baa yaa yabi.

⁶ Binaba yaa pendi, wani leni nujienu po yaa diema yaa bado baa danli. Nuganu po diema bado bisalo, baa kuni nujienu po diema bado, ki teni bi ŋantaado n yaa fo. O pua yeni paalu kan yaa ye yogunu kuli, o calo kan yaa ye, bi biga mo kan yaa ye. Wani leni yaaba n den ciani o leni o baa leni o calo yua n den baa yaa kubi o baa kpe.

⁷ O pua yeni baa diegu nni yua yendo, baa cua ki tuogi leni nujienu po bado toagoli bu toabu, ki kua o toadieli yaali n pa niinni, ki tieni wan bua maama likani, ki paadi ba.

⁸ O baa fie bi tieni leni ban den duadi bi po yaa nannana leni bi tiamoandi yaadi n tie ŋanjilifa leni wula kuli, ki gedini Ejipiti po. Lani, o baa tieni binaba kaa tuogi leni nujienu po diema bado bu toabu.

⁹ Li yaa puoli, nujienu po diema bado baa kua wani nuganu po bado diema nni, ama o baa guani ki lebidi ki kuni.

¹⁰ Nujienu po diema bado bijaba baa bogini bu toabu, ki taani yaa toagola n yabi hali boncianla. Bi siiga nni yendo baa suagi liiga ki gedi ganu po, ki yabi ki kandi nani u kpenciamu ñima yeni. O yaa lebidi ki guani ki kuni o denpo, o baa baa nuganu po diema bado toadieli yaali n pa.

¹¹ Lani, nuganu po diema bado pali baa be, wan ña ki tuogi leni nujienu po diema yaa bado. Nujienu po diema bado yeni baa taani yaa toatieba n yabi, ama o toagola yeni kuli baa baa nuganu po diema bado nuu nni.

¹² Wani nuganu po diema bado baa paadi li toagoli yeni, ki gbengi o yuli. O baa kpa bi niba tuda tuda tuda, ama ba yeni, o kan yaa pa ki caa,

¹³ kelima nujienu po diema bado baa guani, ki taani yaa toagola n yabi ki cie mi kpiama. Binaba yaa pendi, o baa guani ki cua leni yaa toagola n yabi leni yaa toatiadi n yabi boncianla.

¹⁴ Lanyogunu, bi niba boncianla baa fii ki yie nuganu po diema bado po. Fini Danieli buolu siiga nni, mi janjanma danba baa fii ki yedi ke bi baa tieni li bonlekaala yeni. Ama bi baa gbali.

¹⁵ Lanwani, nujienu po diema bado baa cua, ki pundi yaa dogu n pa kani, ki dogini mi tama man kpedi ki pundi yaa bilinciamu n gaani ki cebini u dogu yuli po, ki fie u. Nuganu po diema bado toagola leni o jakoanda, kan fidi ki koani leni o, kelima bi fidu naa dagidi maama ke bi baa fidi ki sedi o nintuali.

¹⁶ O baa tieni wan bua maama, ke oba kuli kan yie o po. O baa kali yaa diema n ŋani ki cie mi diema kuli niinni, ki yaa bolindi yaala n baa o nuu nni kuli.

¹⁷ Li yaa puoli, wani nujienu po bado baa jagi, ke o baa fii leni o diema toagola kuli ki cua ganu po yaa bado diema nni. O baa kpali ke o ŋua mi teginma, ki teni o o bisalo wan tua o pua ki bua ki janbi o, ki bolini o. Ama laa nunfanbu kan cuoni o po.

¹⁸ Li yaa puoli, o baa jigidi ki diidi yaa diema n baali mi ñincianma, ki paadi laa diema siiga mi diema boncianla. Ama toatieyudancaano baa gbeni o japaadi yeni, ki teni i fe yeni n guani ki baa o yuli po.

¹⁹ Lani, nujienu po diema bado yeni, baa jigidi ki diidi o yaa diema toadiena, ama o baa gbali. O baa kpe kaa ŋaa buolu.

²⁰ Yua n baa gaa o kaanu, baa soani nipaalo o diema nni naanpo n ŋani ki cie mikuli niinni. Ama danaba yaa pendi, bi baa kpa o bado yeni ŋasiili nni, ke laa tie toabu nni.

Nujienu po diema badibiado

²¹ Ban ki faadi yua n baa gaa o kaanu, ama o kan yaa pia badikpiagidi. O baa cua bi niba yama n dua, ke baa bangi liba kuli po yaa yogunu, ki fie li bali, kelima ti ñoamamandi leni i janbi po.

²² O baa paadi yaa toagola n cua ki baa o kuli, ki go bolini U Tienu n den danli leni yaa buolu yaa yudaano yendo.

²³ Nibuotoe baa ti danli leni o, ama o baa janbi ba. O paalu baa yaa yabidi ki pugidi, ba ke o niba ki fuu.

²⁴ Bi niba yama n dua ke baa bangi liba po yaa yogunu, o baa kua mi diema kuli siiga yaa kaanu n pia li baali ki cie niinni, ki tieni o baanba bi o yaajanba n ki den tieni yaala. O baa fagi mi diema, ki boagidi boagidi o toatieba ti fagidi leni mi piama boncianla. O baa jagi ke o baa tuogi leni yaa dogi n pia u fidu bu toabu, ama li baa yaa tie u yogunu waamu bebe.

²⁵ O baa taani yaa toagoli n yabi, ki gedi leni u paalu leni li papaali, ki tuogi leni nuganu po diema bado bu toabu. Nuganu po diema bado yeni mo baa taani yaa toagoli n yabi ki pa, ki tuogi leni o, ama o kan fidi ki tuogi leni o lan gedi kaanu, kelima bi baa juogi o po ki janbi o.

²⁶ Yaaba n taa leni o saatiagu baa janbi o. O toagoli baa sani ki yadi yadi, bi siiga boncianla baa kpe.

²⁷ Bani bi badilieba yeni baa taani saajekaanyendu, bi baa pua biyaba mi faama, kelima mi biadima n baa yaa gbie bi pala nni. Ama ban jagi yaala kan cuoni, kelima mi juodima yogunu daa pundi.

²⁸ Nujienu po diema bado baa lebidi ki kuni o denpo leni yaa piama n yabi. Ama o pali nni, o baa jagi ke o baa tieni yaala n bia, ki biidi U Tienu n den kuani yaa danliŋangu leni o niba. O go baa tieni wan den jagi yaa biadima kuli ki lebidi ki kuni.

²⁹ U yogunu yaa pundi, o go baa fii ki gedi ki ban tuogi leni nuganu po diema bu toabu. Mani wani li kan tua nani mi kpiama yeni.

³⁰ Kitim yaaba ñinbiadi baa cua ki tuogi leni o bu toabu. O gbanu baa wudi wan lebidi. Lani, o pali baa be boncianla U Tienu n den kuani yaa danliŋangu po, wan tieni o ŋantaado yeni yaala n bia. O yaa kuni o baa juogi leni yaaba n ŋaa U Tienu danliŋangu yeni.

³¹ Wan soani yaa toatieba baa bolini daali kuli padili, ki kuani ki sieni ti caginciandi U Tienu kaangagidiŋamu nni leni li kaanpaalu nni.

³² O baa tulini yaaba n ŋaa U Tienu ŋantaado yeni leni o ñoamamandi. Ama U Tienu buolu siiga, yaaba n bani wani bi Tienu yeni baa yaa se bonŋanla.

³³ Bi siiga nni, yaaba n pia mi yanfuoma ki cie, baa todi bi niba boncianla bani mo n baa mi yanfuoma. Ama bi siiga, bi baa kpa bi nitianba leni mu jugisiemu, bi tianba leni u mu, ki gedini bine ti yonbidi, ki fie bi tianba mo yaa piama. Li baa yaa tie yeni hali danaba.

³⁴ Fala yeni siiga, bi baa baa mi todima waamu bebe, kelima yaaba n baa taani bi po siiga boncianla baa taani bi po leni i janbe.

³⁵ Bi siiga bi yanfuodanba boncianla baa kpe. Bi kuuma baa ŋanbi bi buolu ki teni ban pendi paipai, nani ban yen jugi ti kudi ki ñani ti joagindi maama yeni. Li baa yaa tie yeni hali mi juodima yogunu n pundi, kelima mi kan tieni se u yogunu pundi.

³⁶ Nujienu po diema bado yeni, baa yaa tiendi wan bua yaala kuli. O baa gbengi oba ki kpiagi o yuli, ki tama ke o cie U Tienu leni i buli kuli, ki go maadi U Tienu yua n cie ban ŋua yaala kuli po mi mabiadima. Wan tieni yaala kuli baa cuoni o po bonŋanla hali U Tienu pabienli n doagidi. Lani, U Tienu n den bili yaala kuli baa tieni.

³⁷ O bado yeni kan yaa fangi o baanba tieni, bi bi puoba bubuado. O kan yaa fangi buloba, kelima o baa yaa tama ke o cie bikuli.

³⁸ O baa cedi bani, ki yaa kpiagidi yaa bulo n die i kaanpaali, o baanba n ki den bani yii. O baa kpiagi o bulo yeni leni yaa paabu n tie wula leni ŋanjilifa leni yaa tanmoana n pia mayuli, ke a dunga pa boncianla leni tiaŋantoadi.

³⁹ O bulamo yeni baa todi o, wan baa i kaanpaali. Yaaba n tuo ki ŋoadi o, o baa dini ba li bali ban yaa die bi niba boncianla ki pa ba mu tinmu boncianla mun tua bi panpaani.

⁴⁰ Mi juodima yogunu yaa pundi, nuganu po diema bado go baa tuogi leni nujienu po diema yaa bado bu toabu, ama wani nujienu po diema bado baa baa o po nani ku tafaaciangu yeni leni ti toateliti leni bi tandanba leni yaa toañinbiadi n yabi boncianla. Wani nujienu po diema bado yaa kpendi, o baa poandi mi diema boncianla nni ki kandi i biani nani a ñingola yeni.

⁴¹ O baa kua yaa diema n ŋani ki cie mi diema buoli kuli niinni. Bi niba boncianla baa kpe, ama Edomi, Moabi leni Anmoni yaaba yudanba baa cia.

⁴² O baa gaa dietoama ki diadi o diema. Ejipiti diema moko kan cia.

⁴³ O baa fie Ejipiti yaaba n pia yaa bonmoanla, yaala n tie wula leni ŋanjilifa leni bi tiamoandi kuli. O go baa diedi Libi leni Etiopi diema yaaba, ki teni ban ŋoadi o.

⁴⁴ Ama yaa laabaalo n ñani puoli po leni nujienu po baa cua ki jieni o. O pali baa be boncianla wan fii ki gedi ki ban bolini bi niba boncianla.

⁴⁵ O baa tii o badigbandiena mi ñincianma leni yaa joagagidiŋanli n pia ti kpiagidi siiga. Lani, mi kuuma baa ludi o ke oba kuli kan todi o mo.»