Danieli 10 - U TIENU MAAMA TILI 2013

Danieli bonlekataala: O joa yua n yie len tiadi

¹ Persi diema bado Sirusi bali bintaali, U Tienu ñoamabonli go den doagidi Danieli, ban go yi yua Belitisasari po. Li ñoamabonli yeni tie moamoani, ama li gbadima den pa boncianla. Danieli den baa li gbadima li bonlekaala nne.

² Lanyogunu mini Danieli den ye leni li paboanli, hali piilie n dayenli.

³ Mii den di jemanmiba, nandi bi daama ki den kua n ñoabu nni. Mii den tiendi tulale ki ŋanbidi nba, hali piilie n dayenli yeni n ban pendi.

⁴ Li bintaali yeni yaa ŋmakpialo, piilie n danaali, n den se yaa kpenciamu n yi Tigiri kpenu boanjaali po.

⁵ Min den diidi yaa yogunu, n den laa o joa ke o yie yaa tiadi n luni leni len gaali. O den ñaagi ban taa o wulamoano ki tieni yaa ñagidu.

⁶ O gbanu den ñuliti nani kilisoliti tanli yaali n pia mayuli, ke li dunga pa yeni. O nunga moko den yieni, nani mi tañigima yeni. O nuni den naani leni mi fantanlanma. O buadi leni o taana den ñuliti nani ban kpilini yaa kumoandi yeni. O nialu den naani leni yaa niligu n yabi yaa fuugu.

⁷ Mini Danieli bebe n den laa li bonlekaala yeni. Yaaba n den ye leni nni, ki den laa la, ama ti jawaanciandi den cuo ba, ke bi sani ki wuoni.

⁸ Mini bebe n den sedi ki diidi li bonlekacianla yeni. N fidu kuli den gbeni, n nunga den gbidi, n gbanu den kpe cain.

⁹ N den gbadi o joa yeni nialu, ke o maadi. Min den gba ke o maadi yeni, n den baa ki laabi ki pabi.

¹⁰ U nuu den cuo ki fiini nni, ke n gbaani, ki ñii, ki digibi.

¹¹ O joa yeni den yedi nni: «Danieli, U Tienu buado, U Tienu soani nni a kani moala ne. Lanwani, ŋan sedi ki moandi ki gaa, min baa yedi a yaala.» Wan den yedi nni yeni, n den fii ki sedi ki digibi.

¹² O go den yedi nni: «Danieli, ŋan da jie liba, kelima hali ŋan den cili yaa daali ki kuani a yama, ki bua ki bandi yaala n tiendi, ki go miini a yuli a Tienu nintuali, o gaa a miabu. Li tie a miabu yeni yaa po yo, ke n cua.

¹³ Yaa maleki n tie Persi diema yudaano, den yiedi n po hali piilie n dayenli, ama malekinba yudancianba siiga yendo, Miseli, den cua ki todi nni. Lanwani, bi den sieni nni Persi diema badiba kani.

¹⁴ O den yedi nni: n cua a kani ki baa waani a yaala n baa ti faa ki cua a buolu po, kelima li go pia li bonlekaala lanyogunu po.»

¹⁵ Wan den maadi leni nni laa maama, n den tibini ki nua tiipo, ki kan fidi ki yedi liba.

¹⁶ Lani, yua n den naani leni o nisaalo den sii n ñoacuuna. N den fidi ki yaadi n ñoabu ki maadi. N den yedi yua n se n nintuali yeni: «N daano, li bonlekaala ne po teni ke ti jawaandi cuo nni, ke n gbanu kpe.

¹⁷ Mini a naacemo baa gaa lede ki maadi leni fini n daano, kelima n fidu kuli gbeni, mii go fidi ki fuo mo.»

¹⁸ Lani, yua n naani leni o nisaalo yeni, didi go den sii nni ki paagi n gbanu.

¹⁹ O den yedi nni: «N Tienu buado, da jie liba, duani a yama. Guani ki paagi a pali ki cuo ki sieni a gbanu.» Wan den maadi leni nni yeni, n go den guani ki baa u fidu ki yedi o: «N daano, maadi, kelima a guani ki paagi n gbanu.»

^20-21 Lani, o den yedi nni: «A bani yaala yaa po ke n cua a kani bi? N cua ki baa waani a yaala n diani i moamoani tili nni. Ama n da baa n tuogi leni Persi diema maleki bu toabu. Li yaa puoli, yaa maleki n tie Gireki diema yudaano baa cua ki tuogi leni nni bu toabu. Die laa toabu nni kuli, oba kuli ki todi nni, kali yinba Isidayeli yaaba yudaano maleki Miseli bebe.