Danieli 1 - U TIENU MAAMA TILI 2013

Danieli leni o danlinba yema Babilonni diema nni 1—6 Danieli leni o lieba yema Babilonni diema nni

¹ Juda diema bado Joakimi bali bintaali, Babilonni bado Nebukanesa, den cua leni o toatieba ki baa Juda diema dociamu Jerusalemi bu toabu. Bi den gaani ki cebini u ki guu.

² O Diedo den taa Juda diema bado Joakimi ki luni Nebukanesa nuu nni, ki teni ke o taa wani U Tienu diegu tiadi ti tiandi. Nebukanesa den taa a kpaada leni mu tadimu ki gedini Sineari diema nni. O den kuani ti tiadi yeni o budieli nni, ki bili ti li ŋalimandieli nni.

³ O bado Nebukanesa den puogi o moagilimu yudaano Asepenasi, ke wan gandi Isidayeli buolu nni bi jawaaba, ki cuani ba. Laa jawaaba den tie badijabila bi bulicinbila.

⁴ Laa jawaaba kan yaa pia bi gbanu po poadoba kuli. Bi baa yaa pia mi jawaama ki fani, ki pia mi yanfuoma leni mi bancianma. Bi baa yaa tuuni wani o bado diegu nni. Bi baa bangi ba, Kalide yaaba diani leni bi maama.

⁵ O bado den bili ke ban yaa ñandi wan di yaa jiema leni wan ñu yaa daama, ki tendi ba daali kuli, ki go yaa bangi ba mi bangima hali binataa. Laa bina yaa pendi, bi baa yaa tuuni wani o bado po.

⁶ Bi jawaaba yeni siiga, den pia Juda buolu. Lani n tie: Danieli, Hanania, Mikayeli leni Asariya.

⁷ Mu moagilimu yudaano den lebidi bi yela ki yini Danieli Belitisasari, Hanania Sadiraki, Mikayeli Mesaki, Asariya mo Abedi-Nego.

⁸ Danieli den bili o pali nni ke o kan joagini o yuli leni o bado n di yaa jiema leni wan ñu yaa daama. Lani, o den mia mu moagilimu yudaano, ke wan da tieni o u paalu, ki teni wan joagini o yuli.

⁹ U Tienu den teni ke mu moagilimu yudaano mangi o nunga Danieli po, ki cengi o miabu.

¹⁰ Die o den yedi Danieli: «N daano o bado n bili, yin baa yaa di ki go ñu yaala. N jie ke o baa ti le ke yii gbengi ki pundi yi lieba. Li yaa tua yeni, yi baa kuani nni o bado biili nni, ki teni wan ti kpa nni.»

¹¹ Lanwani, Danieli den yedi mu moagilimu yudaano n den puogi yua wan yaa kubi wani Danieli, Hanania, Mikayeli leni Asariya yeni:

¹² «Canbaa, n mia ŋa, biigi tinba a naacenba dana piiga, ki yaa tendi ti ti kpinfaadi leni mi ñima bebe.

¹³ Laa dana yaa pendi ŋan boagini ti nunmu leni yaa jawaaba n di o bado jiema yaa nunmu, ki jagi tinba a naacenba po nani ŋan laa maama.»

¹⁴ O den tuo bi miabu, ki biigi ba dana piiga.

¹⁵ Ki dapiiga yeni n den pendi, bi den sua ke bi nunmu ŋanbi ki cie yaa jawaaba n di o bado jiema kuli, bi gbanu mo den noadi ki cie ba.

¹⁶ Lani yaa po, yua n den kubi ba yeni den baa ki tendi ba ti kpinfaadi ki cedi o bado jiema.

¹⁷ U Tienu den puni bi jawaanaadiba yeni, mi banma leni mi yanfuoma, u cogu leni mi bangima nni. Danieli mo go den baa fidi ki bandi ki go bundi li bonlekaala leni ti dangidi kuli.

¹⁸ O bado Nebukanesa n den bili ban cuani ban den gandi yaa jawaaba yeni kuli o kani yaa yogunu n den pundi, mu moagilimu yudaano den gedini ba o kani.

¹⁹ O bado den boe leni ba. Bi jawaaba yeni kuli siiga, oba kuli ki den pundi Danieli, Hanania, Mikayeli leni Asariya. Bi den taa ba ke bi tuuni o bado po.

²⁰ O bado n den buali ba yaala kuli yaa niinni, yaala n bua yanfuoma leni banma kuli, o den sua ke bi cie yaa lingida leni yaa baabuula n ye o diema nni kuli taalima piiga.

²¹ Danieli den tuuni yene, hali o bado Sirusi bali binkpiali binli.