Bi Bujiaba 8 - U TIENU MAAMA TILI 2013

Efrayimi buolu funi leni Gedeon

¹ Efrayimi yaaba den yedi Gedeon: «Ŋan tieni ti yaala ne mo bua ki yedi be? Be yaa po ke ŋan bi gedi ki ban tuogi leni Madiani yaaba bu toabu, ŋaa bi yini ti?» Bi den funi leni o boncianla.

² Gedeon den guani ki yedi ba: «Nmo tieni be, li yaa baa biigi leni yin tieni yaala? Yinba Efrayimi buolu bonliegikaala, ki cie tinba Abieseri buolu bonciekaala te?

³ O Diedo nan taa Madiani yaaba badiba Orebi leni Sebi ki tieni yi yaa nuu nne. Lanwani, nmo fidi ki tieni be, li yaa biigi leni yin tieni yaala?» Wan den yedi ba lani, bi pala den guani ki jiidi.

Gedeon cuo Madiani yaaba badiba

⁴ Gedeon den pundi Jurden ki duodi, wani leni yaa nikobitaadi n yegi leni o. Ba ke bi den coagi, bi den baa ki ŋua ki deli Madiani yaaba.

⁵ Bi den pundi Sukoti dogu, ke Gedeon yedi likani yaaba: «N mia yi yin pa yaaba n yegi leni nni mi jiema waamu, kelima bi coagi. N ŋua ki deli Madiani badiba Sebaki leni Salimuna.»

⁶ Sukoti yudanba den yedi o: «Naani a paadi Sebaki leni Salimuna no, ke ti baa pa a toagoli mi jiema?»

⁷ Gedeon den yedi: «To, bonŋanla! O Diedo yaa ban taa Sebaki leni Salimuna ki tieni n nuu nni, n baa taa mi fanpienma konkoni leni a kongoaba, ki padi padi yi.»

⁸ O den ñani lankani, ki gedi Penueli dogu, ki mia lankani yaaba mo mi jiema. Bimoko den guani o nani Sukoti yaaba n den guani o maama.

⁹ O den yedi ba: «N yaa ban paadi ba ki guani ki cua ne leni mi yanduanma, n baa mudi yaa diefoagili n tie ne.»

¹⁰ Sebaki leni Salimuna den ye Kadikodi dogu nni. Bi toatieba yaaba n ki ji den cie piiga n niba tudamuu (15 000) den ye leni ba. Puoli po yaaba toagoli kuli siiga bani bebe n den sieni, kelima bi siiga kobiga n niba tuda piilie (120 000), yaaba n den tie toatieba ki kubi mu jugisiemu kuli den kpe bu toabu nni.

¹¹ Gedeon den tagini yaaba n ye a gbandiena nni sanu, ki ban baa yaa toatieba n den ye leni mi yanduanma, kaa bangi liba.

¹² Madiani badiliediba Sebaki leni Salimuna den sani. Gedeon den ŋoadi ki cuo ba, ki paadi bi toatieba, ki pua ki deli bikuli.

¹³ Yoasi bijua Gedeon den ñani bu toabu, ki lebidi ki kuni ki tagini Helesi juali yaa sanu.

¹⁴ O den cuo Sukoti jawaalo, ki buali o ke o diani o po Sukoti yaaba yudanba leni u nikpela yela, ke bikuli tie piilele n nibilele.

¹⁵ Li yaa puoli, Gedeon den cua Sukoti yaaba kani, ki yedi ba: «Diidi ki le mani Sebaki leni Salimuna, yin den sugi nni yaaba yaa po ki yedi: ‹Naani Sebaki leni Salimuna ji ye a nuu nne, ke ti baa pa bi toatieba yaaba n coagi mi jiema?› »

¹⁶ O den cuo Sukoti nikpela yeni, ki taa i konkoni leni a kongoaba, ki tundi likani yaaba.

¹⁷ O den mudi Penueli diefoagili moko, ki kpa u dogu yaaba.

¹⁸ Gedeon den buali Sebaki leni Salimuna: «Yin den kpa yaaba Tabori yeni den tie lede?» Bi den guani ki yedi o: «Bi den naani leni fini, yuakuli den tie nani badibiga yene.»

¹⁹ O den yedi: «N naataani yo, n naacele bila yo. Hali O Diedo yua n fo po, yi yàá den kpa ba, n kan bi kpa yi.»

²⁰ Lanwani, o den yedi o bijakpelo Yeteri: «Ŋan fii ki kpa ba.» Ama o jawaalo yeni naa den tuo ki noadi o jugisiega, o den jie kelima o tie biga.

²¹ Sebaki leni Salimuna den yedi: «Fii ki kpa ti fini a ba, kelima o joa fidu ŋua wan da maame.» Lanwani, Gedeon den fii ki kpa Sebaki leni Salimuna. O den taa ban den lani bi yuoyuodi yaa ŋmapaan-nannana.

Gedeon miali juodima

²² Isidayeli yaaba den yedi Gedeon: «Ŋan tua ti bado, ki yaa die ti. A yaa puoli a bijua n gaa a kaanu, o yaa puoli mo a yaabili, kelima a gaa ti Madiani yaaba nuu nni.»

²³ Gedeon den yedi ba: «N kan tua yi bado ki yaa die yi, n bila mo kan tua. Li Miali Diedo n baa yaa tie yi bado, ki die yi.

²⁴ Die n bua ki mia yi miabu. Yuakuli n ñani o fagidi nni tubilenlenyenli ki teni nni.» Bi yibalinba den pia a tubilenlena ke a tie wula, kelima bi den tie Isimayeli yaabila.

²⁵ Bi den guani ki yedi o: «Ti baa teni a leni payenli.» Bi den ladi bu kpalibu, ke yuakuli ñani o fagidi nni tubilenlenyenli, ki maani bu po.

²⁶ Gedeon n den mia ki baa yaa wula tubilenlena kpiagu den pundi kilo piilie, kaa taa leni a ŋmapaan-nannana leni a tubilenlenbila leni Madiani yaaba badicianba n den la yaa kpalimoandi leni ban den lani bi yuoyuodi yaa laani.

²⁷ Gedeon den taa wula yeni ki tieni o bulo nannanli, ki taa ki kuani li o dogu Ofiri nni. Laa nannanli den tua Isidayeli yaaba kuli po bulo, ke bi ŋaa o Diedo ki ŋoadi wani. Laa bonla den tua diagu Gedeon leni o deni yaaba kuli po.

²⁸ Isidayeli yaaba den paadi Madiani yaaba, ki diedi ba ke baa go fidi ki fiini bi yula. Mi yanduanma den tieni mi diema nni, hali bina piinaa, Gedeon miali dana nni kuli.

²⁹ Wani Yoasi bijua Yerubaali den kuni ki ban ye o diegu nni.

³⁰ Wani Gedeon den pia bijaba piilele yaaba n tie o bimadimu, kelima o puoba den yabi.

³¹ O puonanbangu yua n den ye Sikemi dogu mo den mali o po bonjaga, ke bi yini o Abimeleki.

³² Yoasi bijua Gedeon den podi bonŋanla, ki kpe ke bi piini o Abieseri buolu dogu Ofiri nni, o baa Yoasi kuli nni.

³³ Gedeon n den kpe, Isidayeli yaaba didi go den guani ki ŋoadi i buli Baali. Bi den gandi o bulo Baali-Beliti, ki ŋua wani.

³⁴ Isidayeli yaaba naa go den tiadi o Diedo bi Tienu po, wani yua n den gaa ba yaa yibalinba n lindi ba kuli nuu nni.

³⁵ Baa den guani Yerubaali, ban yi yua Gedeon diegu yaaba, wan den tieni bani Isidayeli yaaba yaa ŋanma.