Bi Bujiaba 7 - U TIENU MAAMA TILI 2013

Gedeon paadi Madiani yaaba

¹ Yerubaali, lani n tie Gedeon leni yaa toatieba n den ye leni o kuli den fii ku tiŋaapanpangu, ki gedi ki ban kpaa bi toanagili Harodi ñinbunli kani. Madiani yaaba toanagili den ye Gedeon yaali jienu po ku joaloangu nni, ki kuu leni Mole juali.

² O Diedo den yedi Gedeon: «Yaaba n ye leni a yabi ki kandi leni min baa taa Madiani yaaba ki tieni bi nuu nni. Li fidi Isidayeli yaaba n ti yedi ke bi nuceli n faabi ba, ki kpiagi bi yula, ki ŋaa nni.

³ Lanwani, ŋan gedi ki kpaani ki yedi bi toatieba yaa maama n tie ne: ‹Ti jawaandi n pia yua ke o jie kuli, wan lebidi ki tagini Galaadi juali na, ki kuni.› » Bi toatieba siiga, piilie n niba tudalie (22 000) n den lebidi ki kuni, ki sieni niba tuda piiga (10 000).

⁴ O Diedo den yedi Gedeon: «Bi toatieba nan da baa ki yabi ki kandi. Ŋan teni ban gedi mi ñima kani. N baa gandi ba a po lankane. N yaa yedi a: ‹Yua n tie ne n yegi leni a,› wan yegi leni a. N yaa yedi a: ‹One n da yegi leni a,› wan da yegi leni a.»

⁵ Gedeon den teni ke bi toatieba gedi mi ñima kani. O Diedo den yedi o: «Yaaba n baa ño nani o sangbanlo n lakiti maama, ŋan paadi ba leni yaaba n baa gbaani ki ño.»

⁶ Yaaba n den kabi mi ñima leni bi nii ki ñuni yeni den pundi niba kobitaa, ama yaaba n den sieni kuli den gbaane ki ñuni.

⁷ O Diedo den yedi Gedeon: «N baa faabi yi leni yaa toatiekobitaadi n kabi ki ñuni yene, ki taa Madiani yaaba ki tieni a nuu nni. Ŋan cabi yaaba n sieni yeni kuli n guani ki kuni bi denpo.»

⁸ Gedeon den kubi i toatiekobitaadi o kani, ki gaa yaaba n sieni jiema leni bi naatuntuna, ki cabi ba ke bi kuni. Bi den ye li juali jiidima, ke Madiani yaaba toanagili mo ye bi tinga, ku joaloangu nni.

⁹ Laa ñiagu, o Diedo den yedi Gedeon: «Fii ki jiidi ki kua a yibalinba toanagili nni, kelima n taa li ki tieni a nuu nni.

¹⁰ Ama a yaa jie ki jiidi ki baa li, ŋan taa a naacemo Pura ki jiidi li niinni,

¹¹ ki cengi ban yieni yaala. Yeni, a baa baa li papaali ki gedi ki baa li.» Gedeon den jiidi leni o naacemo Pura, ki pundi Madiani yaaba toaguuda yaaba n den se ki guu li toanagili kani.

¹² Madiani yaaba, Amaleki yaaba leni puoli po yaaba kuli den wuli ki ladi ku joaloangu nni, nani i naaci yeni. Bi yuoyuodi den yabi kaa pia coali nani mi ñincianma kunu tanbiima yeni.

¹³ Gedeon n den pundi yaa yogunu, li den sua ke Madiani yaaba toatielo yendo togidi o lielo wan den dangi yaala, ki yedi: «N dangi ke li ciecieli bilini tinba Madiani yaaba toanagili nni, ki ban cua ki pua gbandieyenli ke li baa ki lebidi lebidi.»

¹⁴ O lielo den guani ki yedi o: «Li bundima ki tie bontoala kuli, se Isidayeli yua Yoasi bijua Gedeon jugisiega. U Tienu taa tinba Madiani yaaba leni ti toagoli kuli, ki tieni o nuu nni.»

¹⁵ Gedeon n den gbadi ti dangidi togida leni ti bundima, o den gbaani ki tuondi o Diedo, ki fii ki guani Isidayeli yaaba toanagili po, ki yedi: «Fii mani, kelima o Diedo taa Madiani yaaba toagoli ki tieni yi nuu nni.»

¹⁶ Gedeon den boagidi toatieba kobitaa yeni cagataa, ki teni nilo kuli naatuntunli leni cuakuonli leni u mukaanu ke u ye li cuakuonli nni.

¹⁷ O den yedi ba: «Yin yaa diidi nni, ki tieni min baa tieni maama. N yaa pundi bi toanagili kunu yaa yogunu, yin tieni mani min baa tieni yaala.

¹⁸ Min ye leni yaaba, ti yaa piebi li naatuntunli yaa yogunu, yimo n piebi yi naatuntuna li toanagili lindima, ki kpaani ki yedi: ‹O Diedo po leni Gedeon po.› »

¹⁹ Madiani yaaba n den lebidi bi toaguuda ku yoagisiigu ke laa waagi, Gedeon leni yaa nikobiga n den ye leni o den pundi li toanagili kunu. Bi den piebi a naatuntuna, ki mudi ban den kubi yaa cuana.

²⁰ Lani, a cagitaada yeni kuli den piebi a naatuntuna, ki mudi a cuana. Bi den yugidi i mukaani leni bi gani, ki muubi a naatuntuna bi jieni mi piebima po. Bi den kpaani ki yedi: «Ki jugisiega o Diedo po leni Gedeon po.»

²¹ Bi den se li toanagili lindima, yuakuli o kaanbuoli nni. Madiani yaaba toatieba kuli den fii ki tiini. Bi den mua ki tiini ki bua ki cia.

²² Toatieba kobitaa yeni go den piebi a naatuntuna, ke o Diedo teni ke Madiani yaaba toatieba pe ki kpaani biyaba. Bi den sani ki pundi Beti-Sita dogu, ki goa Tiselela po leni Abeli-Mehola dogu boanjaali, ki kuu Tabati dogu.

²³ Isidayeli yaaba, yaaba n den tie Nefitali buolu, Aseri buolu leni Manase buolu den taani ki ŋoadi ki deli Madiani yaaba.

²⁴ Gedeon den soani a tonda Efrayimi juana kuli nni, ki yedi: «Yin jiidi ki tuogi Madiani yaaba, ki liidi ba a duona kani, ki yaa caa hali Beti-Bara dogu leni Jurden yaa duonli kani.» Lanwani, Efrayimi buolu jaba kuli den taani ki gedi ki ban liidi Madiani yaaba a duona kani, ki yaa caa hali Beti-Bara dogu leni Jurden yaa duonli kani.

²⁵ Bi den cuo Madiani yaaba badiba bonbilie: Orebi leni Sebi. Bi den kpa Orebi yaa tangu n yi Orebi tangu kani, Sebi mo yaa duvenŋanbikaanu n yi Sebi duvenŋanbikaanu kani. Bi den suagi ki ŋua ki deli Madiani yaaba. Bi den jia ki jendi Orebi leni Sebi yula, ki gedini a Gedeon po, Jurden boanduoli kani.