Bi Bujiaba 6 - U TIENU MAAMA TILI 2013

Madiani yaaba faligidi Isidayeli

¹ Isidayeli yaaba den tieni yaala n ki mani o Diedo, ke o taa ba ki tieni Madiani yaaba nuu nni, ke bi diedi ba hali binalele.

² Madiani yaaba den mabindi Isidayeli yaaba hali boncianla. Isidayeli yaaba den tiini Madiani yaaba, ki caa ki ban wuondi ti tanmabidi nni, ti tanlondi nni leni yaa wuonkaani n pa ki ye a juana nni.

³ Isidayeli yaaba yaa den coagi bi kuani yaama kuli, Madiani yaaba, Amaleki yaaba leni puoli po yaaba yen cua ki baa ba.

⁴ Bi yen kpaa bi toanagili ki nagini Isidayeli yaaba, ki yaa ban caa hali Gasa. Baa yen ŋaa Isidayeli yaaba po pienmiba kuli. Baa den ŋaani pia, nua ki buali ŋunbo.

⁵ Bi yen cua leni bi yangola leni bi gbandiena. Bi yen cua nani i naaci yeni, kelima bani leni bi yuoyuodi n yabi kaa pia coali maama po. Bi yen kua mi diema nni, ki koadi yaala n ye lienni kuli.

⁶ Yeni, Madiani yaaba den teni ke Isidayeli yaaba ye leni fala boncianla. Lane ke bani Isidayeli yaaba den mua ki mia o Diedo ke wan gaa ba.

⁷ Nani Isidayeli yaaba n den mua ki mia o Diedo ke wan gaa ba Madiani yaaba nuu nni yeni,

⁸ o den soani bi po o saawalipualo ke o yedi ba: «O Diedo Isidayeli Tienu yedi: N den ñani yi Ejipiti, yin den tie yonbi naani.

⁹ N den faabi yi Ejipiti yaaba nuu nni leni yaaba n den mabindi yi kuli yaa nuu nni. N den deli ba yi po, ki puni yi bi diema.

¹⁰ N den yedi yi: N tie Li Miali Diedo yi Tienu. Yin da jie Amoriti yaaba, yin ye bani yaaba yaa diema nni yeni tieni. Ama yii den tuo min yedi yaala.»

O Diedo puogi Gedeon wan faabi Isidayeli yaaba

¹¹ O Diedo maleki den cua Abieseri buolu yua Yoasi dogu Ofiri nni, ki kali yaa ticianbu n yi telebinti tinga. Yoasi bijua Gedeon den ye duven tiidi bonluonkaala daama ŋmaakaanu kani, ki pua ŋalikama ki baa wuoni ke Madiani yaaba n da le.

¹² O Diedo maleki den doagidi o kani, ki yedi o: «O Diedo ye leni a, fini o jakoandiciamo.»

¹³ Gedeon den yedi o: «Ŋain, n yonbidaano, o Diedo yaa ye leni ti, be yaa po ke yaa yebiadima n tie ne kuli cuo ti? Ti yaajanba n den togidi ti yaa bancianma togida ki tua ke U Tienu den ñani ba Ejipiti diema nni yeni kuli ye le? Moala O Diedo ŋaa ti, ki taa ti ki tieni Madiani yaaba nuu nni.»

¹⁴ O Diedo den gbegi ki diidi o, ki yedi o: «Mini ka soani a? Fii ki gedi leni ŋan pia yaa fidu, ki ban faabi Isidayeli yaaba Madiani yaaba nuu nni.»

¹⁵ Gedeon den yedi o: «Ŋain, n yonbidaano, n baa faabi Isidayeli yaaba lede? Diidi, n baadiegu yaaba tie Manase buolu siiga, yaaba n tadi ki cie. Nmo, mini n tie n baadiegu yaaba siiga ku bijuogu.»

¹⁶ O Diedo den yedi o: «N baa yaa ye leni a, lanwani a baa paadi Madiani yaaba nani bi tie jayendo yeni.»

¹⁷ Gedeon den yedi o: «A pali yaa mani n po, ŋan tieni n po yaa maalima n baa doagidi ke fini n maadi leni nni.

¹⁸ N mia ŋa, ŋan da ña ne hali min goa ki cuani n paabu ki bili a nintuali.» O Diedo den yedi o: «N baa guudi hali ŋan guani ki cua.»

¹⁹ Gedeon den kua o deni ki kodi ŋuabiga, ki taa mi yoma kilo piitaa, ki pua yaa dupen n ki pia dabinli. O den kpieni ti nandi ku baabuogu nni, ki tieni mi nankpinñima li sanli nni, ki gedi ki ban teni maleki telebinti tinga.

²⁰ O Diedo maleki den yedi o: «Ŋan taa ti nandi leni yaa dupen n ki pia dabinli yeni, ki maani yaa tangu n tie ne yuli po, ki wuli lipo mi nankpinñima.» O den tieni yeni.

²¹ Lane o Diedo maleki den tandi wan muubi yaa gbiamu, ki sii ti nandi leni yaa dupen n ki pia dabinli leni o gbajuoga. U mu den ñani ku tangu yeni niinni, ki buoni ti nandi leni yaa dupen n ki pia dabinli. Li yaa puoli, o Diedo maleki den yindi ke Gedeon naa go laa o.

²² Gedeon n den bandi ke li tie o Diedo maleki, o den yedi: «Ŋain! N bia n yeni! Li Miali Diedo U Tienu, n laa o Diedo maleki ki nunga leni kiyaga.»

²³ O Diedo den yedi o: «Ŋan duani a yama, ŋan da jie, a kan kpe.»

²⁴ Gedeon den maa li padibinbinli likani o Diedo po, ki yini li yaa yeli n tie ne: “o Diedo tie mi yanduanma.” Hali dinla li baa ki ye Abieseri yaaba dogu Ofiri nni.

Gedeon mudi o bulo Baali padibinbinli

²⁵ Landaali ñiagu liga, o Diedo den yedi Gedeon: «Ŋan taa a baa naatonli leni naatontoali yaali n pia binalele. Ŋan mudi a baa n pia Baali padibinbinli yaali yeni, ki pedi o bulo Akera daagu yaagu n caa likani yeni mo.

²⁶ Li yaa puoli, ŋan maa padibinbintoali mini Li Miali Diedo a Tienu po yaa juaga n tie ne yuli po, ki ŋanbi li bonŋanla. Ŋan taa li naatonlieli yeni, ki padi li li padijuukaali, ki juu leni ŋan baa pedi Akera daagu yaagu yeni.»

²⁷ Gedeon den taa o naacenba siiga naacenba piiga, ki tieni o Diedo n den yedi o yaala. Ama waa den tieni la yensiinu. O den tieni la ñiagoe kelima o den jie o baadeni yaaba leni u dogu yaaba.

²⁸ U dogu yaaba n den faa ki fii ku tiŋaapanpangu, bi den sua ke o bulo Baali padibinbinli mudi, ke bi pedi o bulo Akera dafoagidigu yaagu n den caa ki kuu leni li. Bi go den sua ke bi padi li naatonlieli li padijuukaali, Gedeon leni o naacenba n den yuandi ki maa yaa padibinbinli po.

²⁹ Lanwani, u dogu yaaba den buali biyaba: «Ŋme n tieni nanda?» Bi den lingi, ki buali buali, ki ban bandi ke Yoasi bijua Gedeon n tieni laa bonla.

³⁰ Lanwani, u dogu yaaba den yedi Yoasi: «Ŋan ñani a bijua ne tin kpa o, kelima o mudi Baali padibinbinli, ki go pedi Akera dafoagidigu, yaagu n den caa likani yeni.»

³¹ Yoasi den yedi yaaba n cua o kani ki fu leni o kuli: «Naani yinba n baa koani ki gaa Baali? Naani yinba n baa todi o? Yua n koani ki baa gaa Baali baa kpe ke li daa faa. Baali yaa tie Tienu, wan koani ki gaa o yuli, kelima bi tudi ki luni, ki mudi o yaa padibinbinle.»

³² Landaali, bi den cili Gedeon yeli Yerubaali, ki yedi ke Baali n koani leni Gedeon, kelima wan den tudi ki luni ki mudi o padibinbinli yeni po.

Gedeon mia o Diedo sinankeeni

³³ Madiani yaaba, Amaleki yaaba leni puoli po yaaba kuli den taani. Bi den duodi Jurden, ki kpaa bi toanagili Jisireyeli joaloangu nni.

³⁴ O Diedo Fuoma den kua Gedeon nni, ke o piebi li naatuntunli, ke Abieseri yaaba taani ki ŋoadi o puoli.

³⁵ O den soani a tonda Manase buolu diema nni kuli, ki yini ba ke bimoko taani ki ŋoadi o puoli. O go den soani a tonda Aseri buolu diema nni, Sabuloni buolu diema nni leni Nefitali buolu diema nni, ke bimoko den gedi ki ban taani leni o.

³⁶ Gedeon den yedi o Diedo: «Li yaa tie ke a bua ki faabi Isidayeli yaaba leni n yaa nuu nani ŋan yedi maama,

³⁷ diidi ki le, n baa bili ku pegbangu u jalu nni. Ku mangu yaa loni ku pegbangu bebe, ke ku lindima kuli tie tinkuonga, lani n baa bandi ke a baa faabi Isidayeli yaaba leni n nuu, nani ŋan yedi maama.»

³⁸ Li den tua yeni. Wan den fii ku tiŋaapanpangu ki ŋmia ku pegbangu, o den ñani kun den loni yaa mangu ke li gbie tadiñokaaga.

³⁹ Lanwani, Gedeon den yedi o Diedo: «N mia ŋa, ŋan da bieni a pali n po, n go baa mia bonyenla ki kan go pugini toama: N go bua ki biigi leni ku pegbangu yenma. Ŋan cedi ku pegbangu bebe n yaa kuoni, ke yaa tinga n lindi ku kuli n luoni ku mangu.»

⁴⁰ O Diedo den tieni yeni laa ñiagu. Ku pegbangu bebe den kuoni, ke yaa tinga n lindi kuli den loni ku mangu.