Bi Bujiaba 5 - U TIENU MAAMA TILI 2013

Debora yanbu

¹ Landaali Debora leni Abinoami bijua Baraki den yini yaa yanbu n tie ne, ki yedi:

² «Jaandi ki kpiagi mani Li Miali Diedo, Kelima Isidayeli yaaba puni bi yula cain, Ki bogini bu toabu po bonŋanla. Ki puni bi yula, ki baa tieni bu toabu.

³ Yinba bi badiba, cengi mani! Yinba a koanbala, diadi mani yi tuba! N baa yiini o Diedo po. N baa yiini ki pagi o Diedo, Isidayeli Tienu.

⁴ O Diedo, ŋan den ñani Seyiiri po, Ŋan den ñani Edomi diema nni, Ki tinga den digibi, Tanpoli den cuudi mi ñima boncianla, Ti tawadi den fii ke ki taaga mini boncianla.

⁵ A juana den digibi o Diedo nintuali, Sinayi juali moko den digibi, Wani o Diedo, Isidayeli Tienu nintuali.

⁶ Anati bijua Samigari jamaano nni Leni Yayeli jamaano nni, Bi niba den ŋaani i sansiedi, Bi sancenba den taani i sanlagidike.

⁷ A dobila den tie diegbendi Isidayeli diema nni, Hali mini Debora yua n tie Nani binaa Isidayeli po yeni, N ban cua yaa yogunu.

⁸ Isidayeli yaaba yaa den ŋoadi i bucaani yaa yogunu, Lanyogunu yo, bu toabu mo yen fii bi diema nni. A kan den le gbankoandigu bi kpaanli niba tuda piinaa (40 000) siiga Isidayeli nni.

⁹ N pali mani Isidayeli yaaba toatieba yudanba po, Leni Isidayeli yaaba siiga yaaba n den puni bi yula bu toabu po. Pagi mani o Diedo!

¹⁰ Yinba yaaba n jagi i ŋunñuapieni, Yinba yaaba n kaa a cabiladikaana po, Yinba yaaba n cuoni i sani nni, kpaagi mani.

¹¹ Yaaba n boagidi mi ñima a caana kani, Yiini ki togidi o Diedo n den ŋanbi bi po yaa ŋanbili, Wan den ŋanbi Isidayeli yaaba yudanba po yaa ŋanbili. Lanwani, o Diedo niba den gedi Ki sedi bi yibalinba dociamu bilinciamu buliñoana kani.

¹² Fundi, Debora, fundi! Fundi ki yiini bu yanbu, Fini Abinoami bijua Baraki! Fii ki gedini a yonbi.

¹³ Lanwani, yaa nitianga n sieni den ŋoadi bi yudanba, O Diedo niba den taani n kani nani a jakoanda yeni.

¹⁴ Bi den ñani Efrayimi ki cua Amaleki yaaba diema nni, Benjamen buolu den ŋoadi ba, Ki taani leni bi toagoli. Bi yudanba den ñani Makiri buolu nni ki cua, Bi toatieba yudanba den ñani Sabuloni buolu nni, ki cua.

¹⁵ Isakari buolu koanbala den taani leni Debora, Bani Isakari buolu den ŋoadi Baraki. Bi den ŋua o puoli, ki jaligi ki jiidi ku joaloangu nni. Ama Rubeni buolu den se leni mi niama leni biyaba.

¹⁶ Be yaa po ke yi den se a yanlola kani, Ki cengi bi yankpaaba ke bi piebi ki yi bi yandi? Yeni de! Rubeni buolu den se leni mi niama leni biyaba.

¹⁷ Jurden duoli po, Galaadi yaaba naa den fii ki ñani bi deni. Be n teni ke Dan yaaba den kaa bi ñinbiadi nni? Aseri yaaba moko den kaa mi ñincianma kunu kunu, Ti ñinbiadi n se naankani.

¹⁸ Sabuloni buolu leni Nefitali buolu Tie yaa nibuoli n den tuogi leni mi kuuma bu toabu nni.

¹⁹ Bi badiba den cua ki tieni bu toabu, Bani Kanana badiba den tieni bu toabu Taanaki dogu nni, ki baali Megido dogu ñinsanu. Ama baa den baa fagidi, baa baa ligi.

²⁰ A ŋmabila ya n ye tanpoli den kua bu toabu nni, A den ŋua a sani ki tuogi leni Sisera bu toabu.

²¹ Kisoni kpenu, wuni yuu n ye hali yogu ñingola den koadi yibalinba. N den maadi leni n yuli ki yedi: Ŋmaa a jakoanda leni u fidu.

²² I taami taawoga den mua, Bi toatieba yaaba n jagi ba n den tiini ki bua ki ciadi.

²³ O Diedo maleki yedi: ‹Soli mani Melosi dogu, Soli mani, soli mani u niba, Kelima baa den cua ki todi o Diedo bu toabu nni, Baa den cua ki taani leni o Diedo jakoandi-papaadanba, ki todi ba.›

²⁴ Li seli n yaa ye leni Yayeli Kena joa Heberi pua bi puoba kuli siiga, Li seli n yaa ye leni o yaa puoba n ye a gbandiena kuli nni siiga.

²⁵ Sisera den mia o mi ñima ke o puni o mi naaŋanma, O den cuani o po li naaŋanguoli yaa tadiñokaaga n ŋani yaa niinni.

²⁶ O den tandi o nuu ki taa li gbandieli kpakpaali, Ki taa o jienu po mo bi tuonsoanba toatoali. O den kpaa ki mudi Sisera yuli, Ki mudi o kpianu, ki cibi u.

²⁷ O den yoaligi ki baa, o den baa ki bili Yayeli taana kani. O den yoaligi ki baa, o den baa o taana kani. Wan den baa naani, o den kpe ki bili lankane.

²⁸ Sisera naa den diegi ki nuali i kugandi nni li diebonli kani, Ki tiani ki yedi: ‹Be n teni ke o toateligu waagi mi kpenma nanda? Be n teni ke o toateliti ki jaligi?›

²⁹ O den guani ki maadi leni o yuli, Yaa puoyanfuodanba n den ye leni o n den tundi o yaala ki tua:

³⁰ ‹Baa baa ti fagidi ka? Baa boagidi tini ka? Toatielo kuli jafanyendo bi bilie, Yaa fagidi n tie kpaliŋmadikaadi tie Sisera yaade. Yeni de! Yua n paadi baa baa yaa kpaliŋmadikaadi n ŋali ki wuli i gaali Bu kpaliŋmadikayenbu, Yaa kpaliti n hali ki kpa mo, bondilie ki fini o tulu nni.›

³¹ O Diedo, a yibalinba n bodi yeni! Ama yaaba n bua ŋa, ban yaa tie nani u yienu yeni, Wun kpadi yaa yogunu.» Mi yanduanma den tieni mi diema nni, hali bina piinaa.