Bi Bujiaba 4 - U TIENU MAAMA TILI 2013

Debora leni Baraki

¹ Ehudi n den kpe, Isidayeli yaaba didi go den tieni yaala n ki mani o Diedo.

² Lani, o Diedo den taa ba ki tieni Kanana bado Yabini nuu nni, yua n den kaa Hatisori dociamu nni. O toatieba yudaano den yi Sisera, ki kaa Haroseti-Goyim dogu nni.

³ Isidayeli yaaba den mua ki mia o Diedo, kelima Yabini den pia toateliti kobiyia yaadi n tie kudi, ki mabindi Isidayeli yaaba leni u paabiadu hali bina piilie.

⁴ Lanyogunu, Lapidoti pua Debora yua n den tie saawalipualo n den ja ti buudi Isidayeli diema nni.

⁵ O den kaa bu kpakpalibu, ban den ti yi yaabu Debora kpakpalibu soangu nni, Efrayimi juana nni, Rama dogu leni Begela siiga. Isidayeli yaaba den caa o po ke o ja bi po ti buudi.

⁶ Debora den soani ke bi ban yini Abinoami bijua Baraki. O den kaa Kadesi dogu, yuu n ye Nefitali yaaba diema nni. O den cua ke Debora yedi o: «O Diedo Isidayeli Tienu yedi: ‹Ŋan fii ki taa Nefitali buolu siiga leni Sabuloni buolu siiga, toatieba tuda piiga (10 000), ki gedi Tabori juali po.

⁷ N baa dadi Sisera yama, wani Yabini toatieba yudaano yeni, ki teni wan fii ki cua leni o toateliti leni o toagola kuli, ki tuogi leni a bu toabu Kisoni kpenu kani. N baa taa o ki tieni a nuu nni.› »

⁸ Baraki den yedi o: «A yaa baa yegi leni nni, n baa gedi. Ama a yaa kan yegi leni nni wani, n kan gedi.»

⁹ Debora den yedi: «N baa yegi leni a, ama a kan baa kpiagidi ŋan tagi yaa sanu nni, kelima o Diedo baa taa Sisera ki tieni pua yaa nuu nne.» Lane, Debora den fii ki yegi leni Baraki ki gedi Kadesi.

¹⁰ Baraki den yini Sabuloni buolu leni Nefitali buolu ke bi cua Kesesi. Jaba tuda piiga den taani ki ŋoadi Baraki puoli. Debora moko den yegi leni o.

¹¹ Li den sua ke Kena yua Heberi kaa ki kuu Kadesi. O den tie Musa cuado Hobabi yaabili, ki den paadi leni Kena yaaba, yaaba n sieni, ki ban caani o gbandieli ki kuu seni tibu, ki ye Saanayim dogu.

Isidayeli yaaba paadi Sisera

¹² Bi den waani Sisera ke Abinoami bijua Baraki doni Tabori juali.

¹³ Lani, Sisera den taani o toatelikobiyiadi yaadi n tie kudi leni yaa toatieba n den ye leni o kuli. Bi den fii Haroseti-Goyim, ki gedi Kisoni kpenu po.

¹⁴ Lani, Debora den yedi Baraki: «Ŋan fii, kelima dinla n tie o Diedo n taa Sisera ki tieni a nuu nni yaa daali. O Diedo ye a liiga.» Lanwani, Baraki den jiidi Tabori juali, ke o nitudipiiga yeni ŋua o puoli.

¹⁵ O Diedo den teni ke Sisera, o toateliti leni o toanagili yaaba kuli sani ki yadi yadi, kelima Baraki leni o toatieba n den pedi ba leni bi jugisiemu maama po. Sisera den jiidi ki ŋaa o toateligu ki sani leni o taana.

¹⁶ Baraki den ŋua ki deli bi yibalinba toateliti leni bi toagoli, hali ki ban pundi Haroseti-Goyim. Bi den kpa Sisera toatieba kuli leni mu jugisiemu, ba yendo ki den sieni.

¹⁷ Sisera den sani leni o taana ki ban kua Kena yua Heberi pua Yayeli gbandieli nni. O den kua o gbandieli nni, kelima Hatisori bado Yabini leni Kena yua Heberi diegu yaaba den mani leni biyaba.

¹⁸ Yayeli den ñani ki tuogi Sisera ki yedi o: «N yonbidaano, ŋan kua ne! Ŋan kua n deni ki da jie liba kuli.» O den kua o gbandieli nni, ke o taa bu kpalibu ki pini o.

¹⁹ O den yedi Yayeli: «Pa nni mi ñima waamu min ño, kelima u ñuñuunu gbadi nni.» O den biidi ku dayuagu ki ñani mi naaŋanma ki puni o ke o ñuni, ki guani ki pini o.

²⁰ O go den yedi Yayeli: «Ŋan sedi li gbandieli buliñoabu kani, niloba yaa ti cua ki buali a nilo yàá ye ne, ŋan yedi o: ‹Aa-a.› »

²¹ Sisera den guani boncianla kelima o den coagi. Heberi pua Yayeli den taa li gbandieli kpakpaayenli leni li toatoali, ki tieni dindini ki gedi o kani ki kpaa li kpakpaali o kpianu nni, hali lin ban lundi ki kua ki tinga nni. O den kpe.

²² Baraki den ŋua Sisera ke Yayeli ñani ki tuogi o ki yedi o: «Ŋan cua ne, n baa waani a ŋan lingi yaa joa yeni.» O den kua Yayeli gbandieli nni, ki sua ke Sisera bili ki kpe, ke li kpakpaali caa o kpianu.

²³ Landaali, o Diedo den teni ke Isidayeli yaaba paadi Kanana bado Yabini.

²⁴ Isidayeli yaaba den mabindi o ki pugidi, hali ki ban bolini o.