Bi Bujiaba 3 - U TIENU MAAMA TILI 2013

¹ O Diedo den ŋaa i nilanbuoli ke bi ye mi diema nni, ki baa yaa biigidi Isidayeli, yaaba n ki den bandi Kanana diema toabu kuli.

² O den li bua mi nifiipanma yaama n daa den bani toabu yeni, n bangi bu toabu.

³ Wan den ŋaa yaaba mi diema nni den tie Filisiti badimuudiba, yaaba n den tie Kanana, Sidon leni Hiviti yaaba, yaaba n den ye Liban juana po, ki cili Baali-Herimoni juali, ki yaa caa hali Hamati dogu buliñoabu.

⁴ O Diedo den bua ki taa laa nibuoli, ki biigi Isidayeli yaaba, ki bandi bani Isidayeli yaaba yaa baa tuo ki yaa ŋua wan den teni ke Musa teni bi yaajanba yaa bali maama.

⁵ Li tie lani yaa po yo, ke Isidayeli yaaba den kaa Kanana, Hititi, Amoriti, Perisiti, Hiviti leni Jebusi yaaba siiga.

⁶ Bi den taa i nilanbuoli yeni bisiaba ke bi tua bi puoba, ki puni bi bijaba bi bisiaba, ki ŋoadi bi tieni mo.

Isidayeli diema bujiaba togida 3.7—16.31 Otinieli

⁷ Isidayeli yaaba den tieni yaala n ki mani o Diedo. Bi den sundi o po, ki ŋoadi i buli Baali leni Akera.

⁸ O Diedo pali den beni Isidayeli yaaba po. O den taa ba ki tieni Mesopotami diema bado Kusani-Liseyatayimi nuu nni. Bi den tie o bado yeni yonbi hali binanii.

⁹ Isidayeli yaaba den mua ki mia o Diedo ke o puni ba o faabika, Kalebi waalo Otinieli, Kenasi bijua ke o faabi ba.

¹⁰ O Diedo Fuoma den kua o niinni, ke o tua Isidayeli yaaba gobidika, ki gedi bu toabu. O Diedo den teni ke o paadi o bado Kusani-Liseyatayimi.

¹¹ Mi yanduanma den tieni mi diema nni, hali bina piinaa. Li yaa puoli, Kenasi bijua Otinieli den kpe.

Ehudi

¹² Isidayeli yaaba go den tieni yaala n ki mani o Diedo. Lani n cedi ke o den teni ke Moabi bado Egilon sedi bi po.

¹³ Egilon den taani Anmoni yaaba leni Amaleki yaaba, ke bikuli gedi ki ban baa Isidayeli yaaba, ki paadi ba. Bi den fie Jeriko, i kpakpalidi dogu.

¹⁴ Moabi bado Egilon den diedi Isidayeli yaaba, hali piiga n binanii.

¹⁵ Isidayeli yaaba den mua ki mia o Diedo ke o puni ba o faabika Benjamen buolu yua, Gera bijua Ehudi ke o faabi ba. O den tie ganbo. Isidayeli yaaba den soani wani Ehudi, ke wan ban pa Moabi bado bu paabu.

¹⁶ Ehudi den maa wani o ba o jugisiega, ke ki pia ñoanalie, ke ki foaginu pundi nukpandunli. O den yie ka o ciaga nni, ki guani ka o jiencakpigili ki yie o tiadi ki maani ki po.

¹⁷ O den gedi ki ban puni Egilon bu paabu yeni. Egilon den gbengi hali boncianla.

¹⁸ Wani Ehudi n den teni bu paabu yeni, wani leni yaaba n den tugi bu paabu ki cuani kuli den lebidi ki kuni.

¹⁹ Wan den ban pundi yaa buli n tie tana kani, ki kuu leni Giligali dogu, o den lebidi ki guani o bado kani, ki yedi o: «O bado, n pia ŋasiilimaama ki baa yedi a.» O bado den yedi o naacenba n ña. Bikuli den ñani.

²⁰ O den kaa o tanpodieli nni, ki pua mi fawaama. Ehudi den nagini o ki yedi: «Min pia yaa maama ki baa yedi a ñani o Diedo kane.» O bado den fii ki sedi.

²¹ Ehudi den tandi o ganu, ki noadi o jugisiega o jienu po, ki muu o bado tugu nni.

²² Ki jugisiega kuli den kua ki taani leni li baali. Mi kpama den guani ki mundi ki jugisiega, kelima Ehudi naa den guani ki ñani ka. O den ñani li bonli.

²³ Wan den ñani, o den luoni li tanpodieli buliñoana leni ki sendabiga, ki tagini bu buliñoajabu, ki ban caa.

²⁴ Wan den ñani ki ban kuni, o bado naacenba den cua ki diidi ki sua ke a buliñoana lo. Bi den tama ke o bado da ye ki ñanmuage li fawaapuadieli nni.

²⁵ Bi den guudi ke li waagi. Ban den ti sua ke waa luodi, bi den taa ki sendabiga ki luodi ki sua ke bi canbaa bili ki kpe.

²⁶ Ban den se likani ki jilini, Ehudi den sani ki pendi yaa buli n tie tana, ki gedi Seyiiri dogu.

²⁷ Wan den ban pundi likani, o den piebi kakaci Efrayimi juana nni, ki taani Isidayeli yaaba. O den gaa bi liiga ke bi jiidi li juali.

²⁸ O den yedi ba: «Ŋoadi nni mani, kelima o Diedo taa yi yibalinba Moabi yaaba, ki tieni yi nuu nni.» Bi den ŋoadi o ki ban jia Moabi yaaba u kpenciamu Jurden duona kani, kaa cedi ke ba niyendo duodi u kpenu.

²⁹ Landaali, bi den kpa Moabi yaaba ke bi bua ki pundi niba tuda piiga (10 000), bikuli gbanmandanba leni jakoanda. Ba niyendo naa den cia.

³⁰ Hali landaali, Isidayeli yaaba den paadi Moabi yaaba, ki diedi ba. Lani, mi yanduanma den tieni mi diema nni hali bina piinii.

Samigari

³¹ Anati bijua Samigari den ŋoadi Ehudi puoli. O den kpa Filisiti yaaba niba kobiluoba leni ban deli i naakpakpaadi leni yaala. Omoko den tua Isidayeli yaaba po faabika.