Bi Bujiaba 2 - U TIENU MAAMA TILI 2013

O Diedo jaligi Isidayeli yaaba

¹ O Diedo maleki den ñani Giligali ki cua Bokim, ki yedi Isidayeli yaaba: «N den ñani yi Ejipiti, ki cuani yi min den poli ki niani yi yaajanba ke n baa pa ba yaa diema niinni. N den yedi ke n kan miidi min kuani yaa ŋantaado leni yi abada.

² Ama n den yedi yi mo, yin da baa ŋantaadoba leni mi naa diema yaaba, yin mudi bi padibinbina. Ama yii tuo ki ŋua min den yedi yaala. Be yaa po ke yi tieni yeni?

³ Li tie lani yaa po, ke nmo yedi ke n kan deli ba yi po. Bi baa yaa taa ki ye leni yi, bi buli mo baa yaa tie yi po diagu.»

⁴ O Diedo maleki n den maadi Isidayeli yaaba laa maama, bikuli den tiani ki buudi.

⁵ Bi den yini laa kaanu Bokim. Lani, n bua ki yedi yaaba n buudi. Bi den padi a pada likani o Diedo po.

Josue kuuma

⁶ Josue den cabi ku niligu. Bani Isidayeli yaaba den lebidi ki kuni yuakuli wan den baa yaa tinga po, ki diedi mi diema.

⁷ Josue miali dana nni kuli, Isidayeli yaaba den ŋua o Diedo. O kuuma puoli, bi den ŋoadi o Diedo yaa nikpela n den laa o Diedo ŋanbicianli kuli Isidayeli yaaba po, yaa miana dana nni kuli.

⁸ Nun bijua Josue, o Diedo naacemo, den kpe ki pia kobiga n bina piiga.

⁹ Bi den piini o wan den baa yaa tinga ke ki tie o faali yaa niinni, Timinati-Helesi dogu nni, Efrayimi juana nni, Gaasi juali jienu po.

¹⁰ Yaaba n den taa fiima leni Josue kuli moko den kpe ke nifiitoama yuandi ki ŋoadi bi puoli, yaama n kaa den bani o Diedo leni wan den ŋanbi Isidayeli yaaba po maama.

Isidayeli yaaba yaadi ki ŋaa o Diedo

¹¹ Lani, Isidayeli yaaba den tieni yaala n ki mani Li Miali Diedo, ki ŋoadi yaa buli n yi Baali.

¹² Bi den ŋaa Li Miali Diedo bi yaajanba Tienu, yua n den ñani ba Ejipiti nni. Bi den ŋaa o, ki ŋoadi yaa nibuoli n den lindi ba n den ŋua yaa tieni. Bi den padi bani, ki fiini Li Miali Diedo pali.

¹³ Bi den ŋaa Li Miali Diedo, ki ŋoadi yaa buli n yi Baali leni Asitate.

¹⁴ Lani yaa po, o Diedo pali den beni Isidayeli yaaba po, ke o den taa ba ki teni yaa toagola n yen fenli, ke a den fenli ba. O den taa ba ki teni bi yibalinba yaaba n lindi ba, ke baa go den fidi ki togidi leni ba, ke li caa kaanu.

¹⁵ Bi yaa den gedi bu toabu naankani kuli, o Diedo den se bi po, ki tiendi ba yaala n bia nani wan den waani ba maama, nani wan den poli maama. Bi den ye leni o falabiado.

¹⁶ Lani, o Diedo den puni ba bi gobidikaaba ke bi faabi ba yaaba n den fenli ba nuu nni.

¹⁷ Ama baa den cengi bi gobidikaaba yeni. Bi den ŋaa U Tienu, ki ŋoadi i buli, ki padi yini. Bi den yaadi tontoni ki ŋaa bi yaajanba yaaba n den tuo ki tiendi o Diedo ñoamabona n den ŋua yaa sanu. Baa den tuo ki ŋua o Diedo ñoamabona nani bi yaajanba n den tuo ki ŋua maama.

¹⁸ O Diedo yaa den puni ba gobidika yaama kuli, o yen ye leni laa gobidika, ki gaani Isidayeli yaaba bi yibalinba nuu nni wani o gobidika yeni miali dana nni kuli. Yaaba n den mabindi ba yaa den wangi ba fala ke bi buudi, o Diedo den gba bi po mi ninñima.

¹⁹ Ama o gobidika yeni yaa ti kpe, se ban guani ki biagi ki cie bi yaajanba, ki ŋaa o Diedo, ki ŋoadi tientoe, ki yaa tuuni yi po, ki pugi yi. Bi yen suagi liiga leni laa tagu leni laa pajuaga.

O Diedo biigi Isidayeli yaaba

²⁰ O Diedo pali den beni Isidayeli yaaba po, ke o yedi: «Bi niba ne biidi n ŋantaado, min den kuani yua leni bi yaajanba. Baa tuo ki ŋua min yedi ba yaala.

²¹ Lani yaa po, n kan go deli bi po Josue n den kpe ki ŋaa yaa nibuoli, ba buoyendu.

²² N baa yaa biigidi Isidayeli yaaba leni laa nibuoli, ki le bi yaa baa tuo, bi bi yaa kan tuo n yanbuama ki yaa tiendi min yedi yaala, nani bi yaajanba n den tuo maama.»

²³ Lani, o Diedo den ŋaa laa nibuoli, wan daa den taa yaaba ki tieni Josue nuu nni yeni, ke bi ye mi diema nni leni mi yanduanma. Waa den jaligi ki deli ba tontoni.