Bi Bujiaba 17 - U TIENU MAAMA TILI 2013

Dan buolu togida 17—18 Mika baa o kopadiciamo o diegu nni

¹ O joa den ye Efrayimi juana nni, ke bi yi o Mika.

² Dayenli o den yedi o naa: «Ban den suni a ligi tudili n kujapiena kobiga, a den solini yua n taa yi ke n gba. Diidi, mini n kubi yi. Mini n den taa yi.» Lanwani, o naa den yedi: «N bijua, o Diedo n seligi a.»

³ Mika den guani o naa tudili n kujapiena kobiga yeni. O naa den yedi: «N baa gagidi laa ligi mini n ba o Diedo po, ki teni ban kpiedi li nannanli, ki go duadi line n bijua po. Lanwani, n baa guani ki teni a a kujapiena yeni.»

⁴ O den guani ki teni o naa a kujapiena yeni. O naa den taa kujapiena kobilie ki teni yua n duadi ti kudi, ke o kpiedi li nannanli ki go duadi line. Bi den taa ŋa ki sieni Mika dieli nni.

⁵ Wani Mika den pia u jaankaanu o diegu nni. O den tieni o bulo yaa nannanli leni yaa buli n yi terafimi, ki gagidi o bijua yendo ke o tua o po kopadiciamo.

⁶ Lanyogunu, bado ki den ye Isidayeli nni. Yuakuli den tiendi wan bua yaale.

⁷ O jawaalo den ye ki tie Juda diegu yua, ki cua ki ye Betelemi, Juda diema nni. O den tie Levi buolu yua.

⁸ O den fii ki ñani Betelemi, ki baa n lingi wan baa yaa ye naani ke li dagidi o po. O den cuoni ki ban pundi Mika deni, Efrayimi juana nni.

⁹ Mika den buali o: «A ñani le?» O den guani ki yedi o: «N tie Levi buolu yua, ki ñani Betelemi, Juda diema nni. N gaandi ki lingi yaa yekaanu n dagidi n po, min yaa ye.»

¹⁰ Mika den yedi o: «Kali n deni ki tua n tundika leni n kopadiciamo. N baa yaa pa ŋa binli kuli kujapiena piiga leni yaa tiayiekaadi leni yaa jiema n baa dagidi a.» Levi buolu yua yeni den kua ki kali.

¹¹ O den tuo ke o baa yaa ye Mika yeni kani. Omo den nua o nani o bijua yene.

¹² Mika den gagidi o jawaalo yeni ke o tie o po kopadiciamo ki ye o diegu nni.

¹³ Mika den yedi: «Moala n bani ke o Diedo baa ŋanbi n po, kelima n pia Levi buolu yua ke o tie n kopadiciamo.»