Bi Bujiaba 13 - U TIENU MAAMA TILI 2013

Samison madi

¹ Isidayeli yaaba didi go den tieni yaala n ki mani o Diedo, ke o taa ba ki tieni Filisiti yaaba nuu nni hali bina piinaa.

² O joa den ye Tisoreya dogu nni, ki tie Dan buolu yua, ki yi Manoa. O pua den tie ŋoaliga, kaa pia biga.

³ O Diedo maleki den doagidi o pua yeni kani, ki yedi o: «Diidi, ŋaa pia biga kelima a tie ŋoaliga. Ama a baa punbi ki maa bonjaga.

⁴ Lani, ŋan fangi a yuli ki da go ño duven bi dabiadima, ki didi da je o Diedo n kuani yi yaala ke li joagini mo,

⁵ kelima a baa punbi ki maa bonjaga. Pengu kan maani o yuli po, kelima laa biga baa gagidi o Diedo po hali ke o naa da punbi o. Wani n baa cili ki faabi Isidayeli yaaba Filisiti yaaba nuu nni.»

⁶ O pua yeni den gedi ki ban yedi o calo: «U Tienu nilo cua n kani. O tie nani U Tienu maleki yene. Wan tie maama pia i jeje. Mii buali o wan ñani naani, omo ki waani nni o yeli.

⁷ Ama o yedi nni ke n baa punbi ki maa bonjaga. O yedi ke min da go ño duven bi dabiadimiba kuli, ki didi da je U Tienu n kuani ti yaala ke li joagini mo, kelima ki biga yeni baa gagidi U Tienu po, ki cili o naa tugu nni, ki yaa caa hali o kuuma.»

⁸ Manoa den jaandi ki mia o Diedo ki yedi: «O Diedo, n mia ŋa ŋan bi soani U Tienu nilo yua yeni, n guani ki cua ne, ki waani ti tin baa tieni yaala tin baa maa yaa biga yeni po.»

⁹ U Tienu den gaa Manoa jaandi. U Tienu maleki yeni go den guani ki cua o pua yeni kani, ke o kaa u kuanu nni. O calo Manoa ki den ye likani.

¹⁰ O den sani tontoni ki ban yedi o calo: «O joa yua n den cua n kani landaali yeni didi doagidi n kani.»

¹¹ Manoa den fii ki ŋoadi o pua ki gedi o joa yeni po, ki buali o: «Fini n maadi leni o pua ne?» O den guani ki yedi: «Mine!»

¹² Manoa den yedi: «Ŋan den yedi yaala yeni yaa ban tieni daa, ti baa kubi ki biga yeni lede? Ti baa tieni o po be?»

¹³ O Diedo maleki den yedi Manoa: «A pua n cedi ki da je min kuani o yaala kuli.

¹⁴ Wan da leni duventiidi bonla liba kuli, wan da ño duven bi dabiadima, ki da je o Diedo n kuani yi yaala ke li joagini mo. Wan yaa kubi, ki tiendi min yedi o yaala.»

¹⁵ Manoa den yedi o Diedo maleki: «Ti mia ŋa ŋan tuo ki sedi tin ŋanbi a po ki ŋuabiga ŋan je.»

¹⁶ O Diedo maleki den guani ki yedi Manoa: «Ba n yaa sedi, n kan je a jiema. Ama a yaa bua ki padi li padijuukaali, ŋan padi o Diedo po.» Manoa naa den bani ke o tie o Diedo maleki.

¹⁷ Manoa den yedi o: «Waani ti ŋan yi maama, ke ŋan waani ti yaala yaa ti tieni, tin fidi ki kpiagi a.»

¹⁸ O Diedo maleki den guani ki yedi o: «Be yaa po ke a buali n yeli? Li tie yaa yeli n ŋani boncianla.»

¹⁹ Manoa den taa ki ŋuabiga leni mi pienma, ki padi o Diedo po ku tangu po. Li bonpakikaala den tieni Manoa leni o pua n den nua yaa yogunu.

²⁰ U mupienu den ñani li padibinbinli po, ki liebi ki do tanpoli. O Diedo maleki den doni u mupienu nni ki ban caa tanpoli. Manoa leni o pua n den laa lani, bi den baa ki labini.

²¹ Manoa leni o pua ki go den laa o Diedo maleki. Lane Manoa den bandi ke li tie o Diedo maleke.

²² O den yedi o pua: «Laa pia kuli tama, ti baa kpe kelima ti laa o Diedo.»

²³ Ama o pua den yedi o: «O Diedo yaa bi bua ki kpa ti, o kan bi gaa li padijuukaali leni mi pienma padili ti nuu nni. O kan bi waani ti tin gbadi yaala ne kuli.»

²⁴ Li yaa puoli, Manoa pua den mali bonjaga, ki yini o Samison. Bi biga yeni den fandi, ke o Diedo mo seligi o.

²⁵ O Diedo Fuoma den cili ki fiini o gbanu wan den ye Dan-Mahasane dogu nni, Tisoreya leni Esitaoli siiga.