Bi Bujiaba 11 - U TIENU MAAMA TILI 2013

Jefite tua Isidayeli yaaba gobidika

¹ Galaadi yua Jefite den tie jakoandiciamo. Puoconconli n den mali o. O baa mo den yi Galaadi.

² Galaadi pua moko den mali o po a bonjala. Ban den fandi, bi den deli Jefite ki yedi o: «A kan je faali ti baadiegu nni, kelima a tie puotoa yaa bige.»

³ Lanwani Jefite den sani ki foagidi leni o naataani, ki ban kali Tobi diema nni. Ti niyuogidi den taani ki ye leni o, ki cangi o o goada nni.

⁴ Lan den waagi waamu, Anmoni buolu den tuogi leni Isidayeli yaaba bu toabu.

⁵ Anmoni yaaba n den baa Isidayeli yaaba bu toabu, Galaadi yaaba nikpela den gedi Tobi, ki ban woli Jefite.

⁶ Bi den yedi o: «Cua ne ki tugi ti toatieba yuli, tin tuogi leni Anmoni buolu.»

⁷ Jefite den guani ki yedi ba: «Yii den nani nni, ki deli ki ñani nni n baadiegu nni te? Be yaa po yo ke moala yin ji ye fala nni yeni, yii cua ki woli nni?»

⁸ Galaadi diema nikpela den guani ki yedi o: «Ti cua ki woli a moala, ke ŋan cua ki todi ti tin tuogi leni Anmoni buolu, ki go tua ti yudaano, tinba leni Galaadi yaaba kuli yaa yudaano.»

⁹ Jefite den guani ki yedi bani Galaadi nikpela yeni: «Yi yaa taa nni ki guani ke n ban tuogi leni Anmoni buolu bu toabu, ke o Diedo taa ba ki tieni n nuu nni, lani, n baa tua yi yudaano.»

¹⁰ Galaadi nikpela den yedi o: «O Diedo tie siedi, ti baa tieni ŋan yedi yaala.»

¹¹ Lanwani, Jefite den yegi leni Galaadi nikpela. Isidayeli yaaba den kuani o bi liiga, ki go tuni o bi toatieba yuli. Misipa dogu kani, Jefite den guani ki togidi o Diedo nintuali, wan den kpa yedi yaala yeni kuli.

Jefite soani u tondu Anmoni yaaba kani

¹² Jefite den soani a tonda ban ban yedi Anmoni bado: «Be n ye mini leni fini siiga, ke a cua ki baa n diema?»

¹³ Anmoni bado den soani a tonda yeni, ban ban yedi o: «Li tie ke Isidayeli yaaba n den ñani Ejipiti, bi den gaa n diema, ki cili Arinoni kpenu, ki yaa caa hali Yaboki kpenu leni Jurden yaa kpenu. Moala, ŋan goa ki ŋmiani laa diema leni mi yanduanma.»

¹⁴ Jefite go den soani a tonda Anmoni bado kani,

¹⁵ ki yedi o: «Isidayeli yaaba ki gaa Moabi yaaba diema, baa den gaa Anmoni buolu mo yaa diema.

¹⁶ Ban den ñani Ejipiti, bi den poandi mi fanpienma nne, ki ban ñani mi Ñincianmoanma, ki gedi Kadesi.

¹⁷ Ban den pundi lankani, bi den soani a tonda ban ban mia Edomi diema bado, wan pa ba u sanu ban poandi o diema nni. Ama waa den tuo. Bi den soani Moabi yaa bado moko yaa kani, ke omoko yie. Lanwani, bi da den kali Kadesi.

¹⁸ Li yaa puoli, bi den fii ki guani ki tagini mi fanpienma nni, ki lagidi Edomi leni Moabi diema, ki ban pundi Moabi puoli. Bi den kpaa bi nagili Arinoni duoli, kaa kua Moabi diema nni, kelima Arinoni n den tie u tinbianu.

¹⁹ Bi den soani a tonda Amoriti bado Sihoni yua n den kaa Hesibon kani, ki mia o wan pa ba u sanu ban poandi o diema nni, ki gedi ban caa naani.

²⁰ Ama Sihoni ki den pia Isidayeli yaaba po dugidi, ki baa cedi ban poandi o diema nni. O den taani o toatieba kuli, ki gedi ki kpaa o toanagili Jatisi ki tuogi leni Isidayeli yaaba bu toabu.

²¹ O Diedo, Isidayeli Tienu den taa Sihoni leni o toatieba kuli, ki tieni Isidayeli yaaba nuu nni, ki teni ke bi paadi ba. Isidayeli yaaba den diedi Amoriti yaaba, yaaba n den kaa laa diema nni kuli.

²² Bi den diedi Amoriti yaaba diema kuli, ki cili Arinoni ki yaa caa hali Yaboki, ki guani ki taa mi fanpienma kani, ki yaa caa hali Jurden.

²³ Li Miali Diedo, Isidayeli Tienu n gaa Amoriti yaaba diema ki teni tinba o niba, a mo n ti yedi ke a baa fie ma ti kani?

²⁴ A bulo Kemosi n puni a ŋan yaa die yaala, ŋaa die la? Lanwani, timoko, Li Miali Diedo ti Tienu n puni ti yaala yeni, ti kan yaa die la?

²⁵ Naani a tama ke fini n cie Tisipori bijua Balaki, Moabi diema bado? O den nia leni Isidayeli yaaba, ki tuogi leni ba bu toabu.

²⁶ Dunla n tie bina kobitaa, ke Isidayeli yaaba kaa Hesibon leni Aroyeeri dogi nni leni yi gaanma leni yaa dogi n ye Arinoni balinma kuli. Be yaa po ke yii fie bi kani laa diema laa bina kuli?

²⁷ Mini ka tudi a po, fini n tieni nni yaala n bia, ki tuogi leni nni bu toabu. O Diedo yua n tie o bujialo n jia ti buudi dinla Isidayeli yaaba leni Anmoni buolu siiga.»

²⁸ Anmoni bado ki den cengi Jefite n den soani ke bi yedi o yaala.

Jefite n den niani yaa nianli

²⁹ O Diedo Fuoma den kua Jefite niinni. O den gaani Galaadi leni Manase diema nni. O den guani ki tagini Galaadi yaa Misipa, ki kua Anmoni diema nni.

³⁰ Jefite den niani o Diedo li nianli, ki yedi: «A yaa taa Anmoni buolu ki tieni n nuu nni,

³¹ n yaa paadi ba, ki goa, yua n kpa ñani n diegu nni ki tuogi kuli nni, n baa pa ŋa o, ki taa o ki padi li padijuukaali.»

³² Jefite den tuogi leni Anmoni buolu bu toabu, ke U Tienu taa ba ki tieni o nuu nni.

³³ O den paadi ba cain, ki cili Aroyeeri dogu, ki yaa caa hali Miniti dogu, ki fie dogi piilie. O den paadi ba, ki ban pundi Abeli-Keramim dogu. Isidayeli yaaba den paadi Anmoni buolu cain, ki diedi ba.

³⁴ Jefite n den lebidi ki kuni o denpo Misipa, o bisalo n den ñani ki tuogi o ke a gangaana pua ke o jeli. Wani n den tie o biyenga, waa den pia bonjaga bi bonpuoga, kaa tie wani.

³⁵ Jefite n den laa o, o den padi o tiadi ki yedi: «Ŋain n bisalo! A kuani nni u nufanu nni, a tie yaaba n kpendinni n paboanli siiga yendo. N ñoabu kua n liiga o Diedo nintuali, n kan go fidi ki lebidi maama mo.»

³⁶ O bisalo den guani ki yedi: «N baa, a yaa maadi ki kandi o Diedo kani, ŋan soani nni nani ŋan niani o maama, kelima o tuu a po li panli a yibalinba Anmoni buolu kani.»

³⁷ O go den yedi: «Ama ŋan pa nni ŋmaalilie, min gedi a juana po mini leni n danlinba, ki ban mua min baa kpe kaa kuni joa yeni yaa po.»

³⁸ Jefite den puni o ŋmaalilie. Lanwani, o den gedi a juana po wani leni o danlinba, ki ban mua wan baa kpe kaa kuni joa yeni yaa po.

³⁹ Ŋmaalilie n den pendi, o den guani o baa kani, ke o taa o ki kuani wan den niani yaa ñoanianu. O den kpe kaa bandi joa. Hali mani, li den bili Isidayeli nni,

⁴⁰ ke binli kuli Isidayeli jafanba baa yaa mua Jefite bisalo po, hali dananaa.