Bi Bujiaba 10 - U TIENU MAAMA TILI 2013

Tola leni Yayiiri moko gobidi Isidayeli yaaba

¹ Abimeleki n den kpe, Dodo yaabili Tola, Puwa bijua, den fii ke o baa faabi Isidayeli yaaba. O den tie Isakari buolu yua, ki ye Samiri dogu, Efrayimi juana nni.

² O den tua Isidayeli yaaba gobidika, hali piilie n binataa. O den kpe ke bi piini o Samiri.

³ O yaa puoli, Galaadi yua Yayiiri den tua Isidayeli yaaba gobidika, hali piilie n binalie.

⁴ O den pia bijaba piitaa. Bi den jagi ŋunbi piitaa, ki die dogi piitaa Galaadi diema nni. Hali dinla, bi yi laa dogi Yayiiri dogi.

⁵ Yayiiri den kpe ke bi piini o Kamoni dogu nni.

Anmoni yaaba baa Isidayeli yaaba

⁶ Isidayeli yaaba didi go den tieni yaala n ki mani Li Miali Diedo. Bi den ŋoadi i buli Baali leni Asitate, Siiri diema buli, Sidon diema buli, Moabi diema buli, Anmoni buolu buli leni Filisiti yaaba buli. Bi den ŋaa Li Miali Diedo, kaa go ŋua o.

⁷ O Diedo pali den beni Isidayeli yaaba po, ke o taa ba ki tieni Filisiti yaaba leni Anmoni buolu nuu nni.

⁸ Ki cili laa binli ki yaa caa hali piiga n binanii, bi den mabini ki faligi Isidayeli yaaba, yaaba n den ye Jurden puoli, Amoriti yaaba diema Galaadi nni.

⁹ Anmoni buolu den duodi Jurden, ki baa tuogi bu toabu leni Juda buolu, Benjamen buolu leni Efrayimi buolu. Isidayeli yaaba den ye falaciamo nni.

¹⁰ Isidayeli yaaba den mua ki mia o Diedo, ki yedi: «Ti tieni a po ti tuonbiadi, kelima ti ŋaa fini ti Tienu, ki ŋoadi i buli Baali.»

¹¹ O Diedo den guani ki yedi ba: «Ejipiti yaaba, Amoriti yaaba, Anmoni buolu, Filisiti yaaba,

¹² Sidon yaaba, Amaleki buolu leni Mayona buolu n den faligidi yi, yi den mua ki mia nni. Naani mii den gaa yi bi nuu nni?

¹³ Ama yinba, yi ŋaa nni ki ŋoadi tientoe. Li tie lani yaa po yo, ke n kan go faabi yi.

¹⁴ Yin gedi mani ki ban mia yin gandi yaa tieni, yin faabi yi leni yi fala.»

¹⁵ Isidayeli yaaba den yedi o Diedo: «Ti tieni ti tuonbiadi. Soani ti ŋan bua maama. Ama ŋan go faabi ti dinla.»

¹⁶ Lani, bi den ñani i buli bi siiga ki guani ki ŋoadi Li Miali Diedo. Ban den ye leni yaa fala den cuo o Diedo mi ninñima.

¹⁷ Anmoni buolu den taani ki gedi ki kpaa bi toanagili Galaadi diema nni. Isidayeli yaaba mo den taani ki kpaa bi yaa toanagili Misipa dogu nni.

¹⁸ Lanwani, Galaadi yaaba leni bi yudanba den buali biyaba: «Ŋme n baa kpa gedi ki tuogi leni Anmoni buolu bu toabu? Yua n kpa gedi, wani n baa tua Galaadi yaaba kuli yudaano.»