Bi Bujiaba 1 - U TIENU MAAMA TILI 2013

Isidayeli yaaba yema tiadima Josue puoli 1.1—3.6 Isidayeli kali Kanana diema nni

¹ Josue n den kpe, Isidayeli yaaba den mia o Diedo ke wan waani ba bi buoli siiga yaa buolu n baa kpa gedi ki tuogi Kanana yaaba bu toabu.

² O Diedo den guani ki yedi: «Juda buolu n kpa gedi. N taa mi diema ki teni ba.»

³ Juda buolu den yedi Juda naataanu Simeon buolu: «Ciani ti mani ban den boagidi ki teni ti yaa diema po. Tin ban taani ki tuogi Kanana yaaba bu toabu. Timoko baa ti ciani yi, yi yaa diema po.» Simeon yaaba den ciani ba.

⁴ Bi den gedi ke o Diedo den taa Kanana yaaba leni Perisiti yaaba, ki teni ba bi nuu nni. Bi den kpa niba tuda piiga (10 000) Beseki dogu nni.

⁵ Bi den sua ke o bado Adoni-Beseki ye u dogu yeni niinni. Bi den tuogi leni o bu toabu. Bi den paadi Kanana yaaba leni Perisiti yaaba.

⁶ O bado Adoni-Beseki den sani. Ama bi den ŋoadi ki ban cuo o ki jia o nibijala leni o taajenbijala.

⁷ O den yedi: «Badiba piilele, ban den jia yaaba yaa nibijala leni bi taajenbijala den gandi ti jejoagidi n saajekaanu kani. O Diedo guani nni min den tieni yaala.» Bi den gedini o Jerusalemi, ke o ban kpe lipo.

⁸ Juda buolu den baa Jerusalemi dogu, ki paadi u. Bi den kpa u niba, ki juu u dogu mo.

⁹ Li yaa puoli, bi den gedi ki baa n tuogi leni Kanana yaaba, yaaba n den kaa a juana nni, nuganu po yaa diema nni leni u tialu nni.

¹⁰ Bi den tuogi leni yaaba n den ye Hebiron, ban den kpa yi yaa dogu Kiriyati-Arba. Bi den paadi Sesayi leni Ahimani leni Talimayi buolu.

¹¹ Bi den ñani lankani, ki gedi ki ban baa Debiri dogu yaaba. Debiri den kpa yi Kiriyati-Seferi.

¹² Kalebi den yedi: «Yua n fidi ki paadi Kiriyati-Seferi, n baa pa o n bisalo Akisa wan tua o pua.»

¹³ Kalebi waalo Kenasi bijua Otinieli den paadi u dogu yeni, ke Kalebi puni o o bisalo Akisa ke o tua o pua.

¹⁴ Wan den pundi Otinieli kani, o den tundi wani Otinieli ke wan mia o baa u kuanu. Wani Akisa n den pundi o baa kani ki jiidi o ŋunbo po, o baa den buali o wan bua yaala.

¹⁵ O den guani ki yedi o: «N cua miaboe. Pa nni naani n pia a ñinbuna moko, kelima ŋan puni nni yaa tinga nuganu po yeni tie tinkuonge, ñima ki ye.» Lanwani, Kalebi den puni o yaa ñinbuna n ye naanpo n duobi leni naanpo n jiidi.

¹⁶ Musa cuadibaa puoliŋuani Kena yaaba den ñani Jeriko, i kpakpalidi dogu, ki yegi leni Juda yaaba ki gedi ki ban kali Juda fanpienma nni, Aradi dogu ganu po. Bi den ban kali Amaleki yaaba siiga.

¹⁷ Juda buolu leni wani Juda waalo Simeon yaa buolu den fii ki ban baa Kanana yaaba, yaaba n den ye Tisefati dogu, ki paadi ba. Bi den bolini u dogu yeni cain, ke bi ji yi u Horima. Lani n tie ku diegbengu.

¹⁸ Juda buolu go den paadi yaa dogi n yi Gasa, Asikalon, Ekron leni laa dogi dobila.

¹⁹ O Diedo den ye leni Juda buolu, ke bi paadi yaa diema n ye li juali nni. Ama baa den fidi ki deli u tialu nni yaaba wani, kelima bi den pia ti toateliti ke ti tie kudi.

²⁰ Bi den teni Kalebi Hebiron dogu nani Musa n den yedi maama. O den deli ki ñani Anaki buotaadi lienni.

Isidayeli yaaba n kaa deli yaa nibuoli bi siiga

²¹ Benjamen buolu ki den deli Jebusi yaaba, yaaba n ye Jerusalemi. Bi baa ki taa ki ye leni Benjamen buolu laa dogu nni hali dinla.

²² Josefi puoliŋuani mo den gedi ki baa Beteli, ke U Tienu den ye leni ba, ki todi ba.

²³ Bi den soani bi niba ban ban goandi Beteli dogu, ban go den yi yuu Lusi.

²⁴ Ban den soani yaaba den laa o joa ke o ña u dogu yeni niinni. Bi den yedi o: «Waani ti tin baa tagini naani ki kua u dogu nni, lani ti baa ŋanbi a po.»

²⁵ O joa yeni den waani ba. Lanwani, bi den bolini u dogu yaaba. Ama bi den cedi o joa yeni leni o diegu yaaba kuli, kaa kpa ba.

²⁶ O den gedi ki ban kua Hititi yaaba diema nni, ki maa u dogu lienni ki yini u Lusi. U baa ki yi yene hali dinla.

²⁷ Manase buolu ki den deli Beti-Seyani yaaba, Taanaki, Dori, Ibileam, Megido leni laa dogi dobila yaaba. Lanwani, Kanana yaaba den suagi ki ye laa dogi nni.

²⁸ Isidayeli yaaba n den ti baa u paalu ki pugini, bi den teni ke bi tuuni bi po a tuona leni u paalu. Ama baa den deli ba.

²⁹ Efrayimi buolu ki den deli Kanana yaaba, yaaba n den ye Geseeri dogu nni. Lanwani, Kanana yaaba den ye Geseeri yeni, Efrayimi buolu siiga.

³⁰ Sabuloni buolu ki den deli Kanana yaaba, yaaba n den ye Kitiloni leni Nahaloli dogi. Lanwani, bi den ye Sabuloni buolu siiga, ama bani Sabuloni buolu den teni ke bi tuuni bi po a tuona leni u paalu.

³¹ Aseri buolu ki den deli yaaba n ye yaa dogi n tie ne: Ako, Sidon, Akilabi, Akisibi, Heliba, Afiki leni Rehobi.

³² Li tie lani yaa po yo, ke bani Aseri buolu den kaa Kanana diema yaaba siiga, kelima baa den deli ba.

³³ Nefitali buolu ki den deli Kanana yaaba, yaaba n den ye Beti-Semesi leni Beti-Anati. Bani Nefitali buolu den kali bi siiga, ki teni ke bi tuuni bi po leni u paalu.

³⁴ Amoriti buolu den deli Dan buolu ki kuani ba li juali nni. Baa den tuo ke bi jiidi u tialu nni.

³⁵ Lanwani, Amoriti yaaba den suagi ki ye yaa dogi n tie ne: Hadi-Helesi, Ayaloni leni Salibimi. Ama Josefi puoliŋuani den yuandi ki diedi ba, ki teni ke bi tuuni bi po a tuona leni u paalu.

³⁶ Amoriti yaaba diema banlu den cili i Nami gbangbanli kani, ki tagini Sela dogu kani, ki pendi ki do ki ban caa.