Amosi 9 - U TIENU MAAMA TILI 2013

Li bonlekamuula

¹ N den laa o Diedo ke o se li padibinbinli po. O den yedi: «Pua U Tienu diegu bunbunnaada yula po, Hali a tanpuuna n begibi, Pua ki mudi a, Ŋan baa yaaba n ye U Tienu diegu nni kuli yula po, Ki kpa ba. Yaaba n sieni, n baa kpa ba leni ki jugisiega. Bi siiga nni, oba kuli kan fidi ki sani ki cia. Yeni de! Oba kuli kan sani ki cia.

² Bi yaa kua bi tinkpiba yekaanu nni, N nuu baa dadi ki noadi ba likani. Bi yaa doni hali tanpoli, N baa jiini ba.

³ Bi yaa wuoni Karimeli juali yuli po, N baa lingi ba likani ki cuo ba. Bi yaa wuoni hali mi ñincianma tiipo ke min da le ba, N baa teni o wa n ñidi ba lienni.

⁴ Bi yibalinba yaa cuo ba ki gedini ti yonbidi, N baa teni ban kpa ba lipo leni ki jugisiega. N baa maani n nuni bi po, Ki kan yaa tiendi yaala n ŋani, se yaala n bia.»

⁵ Li Miali Diedo U Tienu, U Paaciamu Kuli Daano Sii ki tinga ke ki digibi, Ki fiidi ki goa ki ñuandi nani Ejipiti kpenu yeni. Yaaba n ye ki po kuli ye li paboanli nni.

⁶ U Tienu maa o yekaanu tanpoli. O teni ke a tawala yiini ki tinga po, O yen teni ke mi ñincianma ñima yugi ki caa tanpoli, Ke o goa ki wuliti ma ki tinga po. O yeli tie Li Miali Diedo.

U Tienu baa jia i tagili danba buudi

⁷ O Diedo yedi: «Yinba Isidayeli yaaba, yii tie n po yenma leni Etiopi yaaba ka yo? N den ñani yinba Isidayeli yaaba Ejipiti diema nni, Nani min den ñani Filisiti yaaba Kafitori diema nni maama, Nani min go den ñani Siiri yaaba mo Kili diema nni maama yeni. Naani yii bani lipo?»

⁸ Diidi, mini o Diedo U Tienu maani n nuni Yinba, yaa diema n pia ti tuonbiadi po. N baa bolini ma, man da go ye ki tinga nni.

⁹ Ama ba yeni, n kan bolini Jakob puoliŋuani cain. O Diedo n yedi yeni. Diidi, n baa ñani n ñoamabona, ki yedi: «Ban gbedi Isidayeli yaaba i nilanbuoli kuli siiga, Nani ban yen gbedi i di ki ñandi a fiada maama yeni. N kan tuo ba dibiyenma n baa tiipo.

¹⁰ Bu toabu baa je n niba siiga ti tuonbiadi danba kuli, Bani yaaba n tua: ‹A kan teni fala n nagini ti, A kan teni fala n baa ti.›

Isidayeli yaaba yema baa lebidi 9.11-15 U Tienu baa guani ki ŋanbi Juda diema

¹¹ Lanyogunu, n go baa sieni Davidi diegu, Yaagu n baa yeni. N baa maa ki fiini ku diegbenbuona. N go baa ŋanbi ku kun tua Nani kun den kpa tie maama hali yogu.

¹² Davidi puoliŋuani go baa diedi Edomi yaaba, yaaba n sieni leni i nilanbuoli kuli, Ban den kpa diedi yaaba, ki yedi ke bani moko tie n yaa nibe. O Diedo, yua n baa teni lani kuli n tieni ki dudi, n yedi yeni.»

¹³ O Diedo go yedi: «Diidi, u yogunu kpendi, Ke ti kpaandi baa yaa yabi hali ki kandi maama Ke bi yaa yendi ki gbeni, ban go cili li coagili. Bi baa yaa tuodi duven tiidi daama, Ke bine mo ŋuu duven tiidi. Lanwani, o duvenpaano baa yaa puubi a joaciama po, Hali yaala a joabila kuli n moagidi.

¹⁴ N baa ñani n niba Isidayeli yaaba ti yonbidi nni, Ki go cuani ba ne. Bi go baa maa bi yibalinba n den bolini yaa dogi, Ki yaa ye i niinni. Bi baa ŋuu duven tiidi, ki yaa ñu i duven. Bi go baa yaa ko i kuani, ki yaa di yi bonluonkaala.

¹⁵ N go baa kaani ba bi diema nni. Yeni, n kan go teni bi yibalinba n ñani ba min den puni ba yaa diema nni. O Diedo, yi Tienu n yedi yeni.»