Amosi 8 - U TIENU MAAMA TILI 2013

Li bonlekanaala: yaa baabuogu n pia li bonluonkaala

¹ Li Miali Diedo U Tienu, den doagidi n po yaala n tie ne: N den laa yaa baabuogu n pia yaa bonluonkaala n beni.

² O den buali nni: «Amosi, a nua be?» N den guani ki yedi o: «N nua baabuogu ke ku pia yaa bonluonkaala n beni.» O Diedo den guani ki yedi nni: «N niba, Isidayeli yaaba juodima pundi, N kan go tieni bi po sugili.»

³ Mini, o Diedo U Tienu yedi line: «Landaali yaa pundi, ban yiini badidiegu yaa yani Baa lebidi ki tua moe. A tinkpila baa yaa yabi. Bi niba baa yaa tugi a tinkpila yeni ki ban lu i kaani kuli. Li baa yaa tie ŋminma bebe.»

A kpenda bonbuakaala baa guli u dogu

⁴ Cengi mani line, yinba a kpenda, Yaaba n mabindi a luoda, Ki bolindi bi ninñindanba mi diema nni.

⁵ Yi tua: «O ŋmapaano jaanma daali baa pendi u laa yogune, Ke tin baa ki kuadi ti ŋalikama? Mi fuodima daali baa gbeni u laa yogune, Ke tin baa ki luodi ti buabuana? Ti baa wadi ku tiabiigikaagu. Ti baa pugini ki dunga. Ti baa ŋmiagi li bonbiigikaala, ki yaa janbidi bi niba.

⁶ Ti baa daa taliginba leni i ligi, Ki daa o luodo leni cacaapiliyenma. Ti ba kuadi ba ti ŋalikama fiada.»

⁷ Mini o Diedo n poli hali Jakob puoliŋuani N jigini yaa tinga yeni po, ki yedi: «N kan sundi yi tuonbiadi siiga ba bonyendi.»

⁸ Lani yaa po, mi diema kuli baa digibi, Mi diema yaaba kuli baa mua i kumoe, Mi diema kuli baa yaa fiidi ki goa ki ñuandi nani Ejipiti kpenciamu yeni.

⁹ Li Miali Diedo U Tienu yedi: «Li daali kpendi ke n baa teni u yienu n kua u yensiinu, Ki teni ki tinga n biigi u yensiicocolu.

¹⁰ N baa lebidi yi badi dana, ŋan tua paboanli dana, Ki lebidi yi yani kuli mo, yin tua kumoe. N baa teni bi niba kuli n la li paboanli tiadi, Ki doagidi bi paboanli. N baa kuo ba yubima, Ki teni li paboanli n cuo mi diema yaaba kuli, Nani bonjayenga kuuma yeni. Landaali cilima hali li juodima baa yaa tie paboanli daali.»

¹¹ Li Miali Diedo U Tienu yedi: «A dana kpendi ke n baa soani mi koma mi diema nni, Laa tie mi jiema yaa koma ka, Laa tie mi ñima yaa ñuñuunu moko ka. Ama li baa yaa tie o Diedo maama gbadima Yaa koma leni mi yaa ñuñuunu yo.

¹² Bi niba baa yaa puagi mi diema nni kuli, Ki ña nujienu ki teli nuganu, Ki ña puoli ki teli nintuali, Bi baa yaa puagi laa kaani kuli, ki lingi Ki bua ki gbadi mini o Diedo maama, Ama bi nan kan gbadi ma.

¹³ A dana kpendi ke bi jafanŋanba leni bi jawaaba kuli baa kpe u ñuñuunu.

¹⁴ Isidayeli yaaba baa yaa taagi Samari buli yeli, Ki polini ki tua: ‹Hali Dan buolu bulo po, Bi hali Beri-Seba tienu po.› Bani yaaba n polini yeni kuli baa baa, Ki kan go fii abada.»