Amosi 7 - U TIENU MAAMA TILI 2013

Amosi bonlekaala 7.1—9.10 Li bonlekakpiala: i naaci

¹ Li Miali Diedo U Tienu den doagidi n po yaala n tie ne: N den laa ke wani o Diedo tagi i naaci, Li muabunli n den cili ki kpedi yaa yogunu. Laa muabunli den tie ban den ceni o bado po ti muadi, Ke yaala n go yuandi ki bundi.

² I naaci yeni n den ŋmani yaa moasoangidi n ye ki tinga nni kuli. N den yedi: «Li Miali Diedo U Tienu, tieni a niba po sugili, Lani yaa ka, Jakob puoliŋuani baa tieni lede ki yaa ye, Kelima bi wa hali boncianla?»

³ O Diedo den lebidi o yama laa bonla po, Ki yedi ke li kan tieni.

Li bonlekaliela: u mu

⁴ O Diedo n Tienu den doagidi n po yaala n tie ne: N den laa wani o Diedo ke o ki kpaani ki tua Ke o baa jia o niba buudi leni u mu. U mu yeni den teni Ke yaa ñincianma n ye ki tinga tiipo ñuudi, U den cili ki buondi mi diema.

⁵ N den yedi: «O Diedo n Tienu, Cedi ki da tieni laa bonla. Lani yaa ka, Jakob puoliŋuani Baa tieni lede ki yaa ye, Kelima bi wa hali boncianla.»

⁶ O Diedo den lebidi o yama laa bonla po. O den yedi ke lani moko kan tieni.

Li bonlekataala: u baabibiigiko

⁷ O Diedo den doagidi n po yaala n tie ne: N den laa wani o Diedo ke o se u bilinu po, Ban maa yuu leni u baabibiigiko, O den muubi o nuu nni u baabibiigiko.

⁸ O Diedo den buali nni: «A nua be?» N den guani ki yedi o: «Baabibiigiko.» Lani, o Diedo den yedi: «N biigidi n niba Isidayeli yaaba leni laa baabu yo. N kan go tieni bi po sugili.

⁹ Isaaka puoliŋuani padibinbina ya n ye a juana yula po baa bodi. Isidayeli yaaba n gagidi yaa kaani kuli baa bodi. N baa fiini ki sedi o bado Jeroboami puoliŋuani po leni ki jugisiemu.»

Amosi leni Amasia

¹⁰ Beteli kopadiciamo Amasia den soani ke bi waani Isidayeli diema bado Jeroboami, yaa maama n tie ne: «Amosi fiindi a po mi yiema Isidayeli yaaba siiga. Mi diema yaaba kan fidi ki juuni o maama yeni kuli po.

¹¹ Cengi wan ŋua ki maadi yaala: ‹Bi baa kpa Jeroboami leni ki jugisiega, ki gedini Isidayeli yaaba mo ti yonbidi yaa kaanu n foagi leni bi diema.› »

¹² Amasia go den yedi Amosi mo: «Fini, li bonlekaala daano, a caa! Guani a diema nni Juda po, ki yaa ban pua saawali lanpo, ki baadi a bonjekaala.

¹³ Ama ŋan da go pua saawali Beteli na, kelima nekanba tie o bado n gagidi yaa kaanu, ki go tie o bado jaandi kaanu.»

¹⁴ Amosi den guani ki yedi Amasia: «Mii tie saawalipualo, mii didi tie bi saawalipuaba cagili yua mo. Ama n tie yankpaalo, ki ŋuu sikomori tiidi.

¹⁵ O Diedo den ñani nni n yankulu puole, ki yedi nni ke min cua ki pua saawali o niba Isidayeli yaaba po.

¹⁶ Moala, ŋan cengi, fini yua n yedi ke min da pua saawali Isidayeli yaaba po, ke min da maadi U Tienu n yedi yaala Isaaka puoliŋuani po.

¹⁷ Ŋan tieni laa bonla yeni, o Diedo n yedi yaala ne: ‹A pua baa tua puoconconli u dogu nni, Bi baa kpa a bijaba leni a bisiaba leni mu jugisiemu. Bi baa biigi a kuani leni u baabu ki boagidi, Fini a ba mo baa n kpe mi nilandiema nni. Bi baa gedini Isidayeli yaaba ti yonbidi yaa kaanu n foagi leni bi diema.› »