Amosi 6 - U TIENU MAAMA TILI 2013

Yanduanma ki ye

¹ Fala baa baa yaaba n ye Siyon leni mi yanduanma, Ki go baa yaaba n ye Samari juali po kaa bangi liba po. Fala baa baa laa paatieba, Yaaba n tie i nibuoli kuli siiga yaa nibuolu n tugi li yuli, Isidayeli yaaba n caa bani yaaba yaa kani, ke bi todi ba.

² Gedi mani ki ban diidi Kaline dogu, Ki ña lankani ki gedi hali Hamati u dociamu, Li yaa puoli, yin gedi Filisiti yaaba dogu Gati po. Naani laa dociami pia mi piama ki cie mi dieliedima ne? Naani bi diema yabi ki cie yi yaama yo?

³ Yi tama ke yi foagidi fala daali, Ama yi tiendi yaala n teni ke u paabiadu diema nagindi.

⁴ Yi dua ban tabini yaa duani a luonñina, Yi dua yaa cabiladikaana n dingi bonŋanla po, Yi ŋmani i yankuli pebila Leni a naatonbiwubida.

⁵ Yi pua ti gogiditi, Ki tama ke bi bani mi baantiama nani Davidi yeni.

⁶ Yi ñu duven yaa tadibuomu n pia yaa niinni, Yi sogini yaa kpama n ŋani ki cie, Ama yi pala ki yia Josefi puoliŋuani bodima po.

⁷ Li tie lani yaa po yo, ke yi baa kua ban baa gedini yaaba ti yonbidi liiga, Yin mangidi yi pala yaa badi nni mo baa gbeni.

Samari bolinma

⁸ Li Miali Diedo U Tienu taa wani o ba yeli ki poli, Li Miali Diedo U Tienu, U Paaciamu Kuli Daano yedi yaa maama n tie ne: «N nani Jakob puoliŋuani japaadi, Ki nani bi dieŋama mo. N baa taa bi dogu Samari leni yaala n ye u niinni, Ki teni bi yibalinba.

⁹ Ba niba piiga yaa sieni diegu nni, bimoko baa kpe.

¹⁰ Yua n kpe kpiilo yaa cua ki taa o yaa yogunu ki baa n juu, O yaa ñani o kpaba li dieli nni yaa yogunu, O baa buali yua n ye li dieli liiga po: ‹Naani nitoa go ye leni a lienni?› O nilo yeni baa guani ki yedi o: ‹Oba kuli ki ye leni nni.› Yua n buali o yeni baa guani ki yedi: ‹Suo! Laa tie yaa yogunu ke ti baa taa Li Miali Diedo yeli.› »

¹¹ O Diedo ñani li ñoamabonli, ki yedi: «N baa teni a dieciama n tua tangbana, N baa teni a diebila n pua i yiani.»

¹² Naani i taami baa sani ku tangu po? Naani nilo baa ko ku tangu po leni i ne? Ama yinba Isidayeli yaaba wani lebidi yaa bujiali n tiegi, Ke li tua loabidi, Ki lebidi mi teginma n mali yaala, Ke li tua loabibiaditi.

¹³ Yi mangidi yi pala kelima yi diedi Lodebari, Yi tua: «Naani tii fidi ki cuo Karnayimi yaaba leni ti paalu ka?»

¹⁴ Li tie lani yaa po yo, ke o Diedo U Tienu, U Paaciamu Kuli Daano yedi: «N baa fiini u nibuolu, wun tuogi leni yinba Isidayeli yaaba bu toabu, Ki waani yi fala, ki cili jienu po, yaa sanu n caa Hamati, Ki ban pundi yaa kpenu n tiini ki ña Araba, ki caa ganu po.»