Amosi 5 - U TIENU MAAMA TILI 2013

I wanli Isidayeli kuuma po

¹ Yinba Isidayeli yaaba, Cengi mani yaa maama n tie ne! Cengi mani min baa wanli yi po yaa wanli!

² Isidayeli yaaba baa nani li puowandiali yeni. O panma nni, o baa ki kan go fii, O baa ki bili tiipo, ke oba kuli kan fiini o.

³ Li Miali Diedo U Tienu yedi yaa maama n tie ne: «Isidayeli yaaba dogi siiga Yuu n bi caani niba tudili bu toabu, Niba kobiga bebe n baa sieni. Yuu n bi caani niba kobiga, Niba piiga bebe n baa sieni.»

⁴ O Diedo yedi Isidayeli yaaba yaa maama n tie ne: «Lingi mani mini, yi baa yaa fo.

⁵ Yin da go lingi nni Beteli, Da go gedi mani Giligali, Da go gedi mani Beri-Seba, Kelima bi baa gedini Giligali yaaba ti yonbidi, Ki bolini Beteli mo.»

⁶ Lingi mani o Diedo, ki baa ki yaa fo. Lani yaa ka, o baa cua nani u mu Josefi puoliŋuani siiga, Ki buoni yaala n ye Beteli kuli, Ke oba kuli kan fidi ki gbindi u.

⁷ Yinba yaaba n lebidi yaa bujiali n tiegi, Ke li tua loabidi, Ki ŋmaadi mi teginma mo tiipo.

⁸ Wani U Tienu n den tagi Ŋmasoali leni bi Naadadiba. O yen teni li biigili n lebidi ki tua yenma, Ki teni u yensiinu n lebidi ki tua ñiagu, O tendi ke mi ñincianma ñima yugi ki caa tanpoli Ke o goa ki wuliti ma ki tinga po. O yeli n tie Li Miali Diedo.

⁹ O yen guliti bi paatieba, Ki bolindi i kaanpaali.

¹⁰ Yinba Isidayeli yaaba, yi nani yua n ye Li bujiali kaanu nni ki tundi yi. Yi nani yua n maadi i moamoani.

¹¹ Yi ŋmaadi o luodo, Ki fenli o kani ŋalikama. Li tie lani yaa po yo, ke yin maa yaa dieŋama Leni a tankpiekaana yeni, Yi kan kua a niinni. Yin ŋuu yaa duventiidi ke yi ŋani hali boncianla yeni, Yi kan ño li duven.

¹² Mini U Tienu bani yi tuonbiadi coali n da maama Leni yi tagili n pugidi maama. Yi mabindi bi niteginkaaba, ki gaani a suuna, Ki yiedi ke ban da jia o luodo po yaa buudi n tiegi.

¹³ Li tie lani yaa po yo, Ke o yanfuodaano ŋmini u yogunu, Kelima li tie yaa yogunu n bia.

¹⁴ Moandi mani ki yaa tiendi yaala n ŋani, Ki cedi yaala n bia. Yeni, yi baa yaa fo. Lanwani, o Diedo U Tienu, U Paaciamu Kuli Daano baa yaa ye leni yi, Nani yin tua ke o ye leni yi maama.

¹⁵ Yin yaa nani yaala n bia, Ki bua yaala n ŋani tienma. Yaa ja mani yaa buudi n tiegi li bujiali kaanu kani. Daalinba, o Diedo, U Tienu, U Paaciamu Kuli Daano, Baa gbadi mi ninñima, Josefi puoliŋuani yii n sieni po.

¹⁶ Lani yaa po, Li Miali Diedo, U Tienu, U Paaciamu Kuli Daano, O Diedo yedi yaa maama n tie ne: «Bi niba baa mua i kumoe u dogu nitaankaani nni Leni i sani nni kuli, ki yedi: ‹Ŋain!› Bi baa yini ba bi kpakpaaba, ban cedi bu kpaabu, Ki cua ki mua i kumoe, Bi baa yini yaaba n bani i wanli, ban cua ki wanli.

¹⁷ Bi niba baa mua i kumoe i duvenkuani nni kuli, Lani kuli baa tieni, kelima n kpendi Ki baa jia yi buudi, ki cuo yi.» O Diedo n yedi yeni.

U Tienu pabienli daali

¹⁸ Fala baa baa yaaba n bua o Diedo pabienli daali n cua. Yi guu ki tama ke li daali yeni baa yaa tie lede? Li baa yaa tie biigili daali, Li kan yaa tie yenma daali ka.

¹⁹ Li baa yaa naani leni yaa nilo n tiini o yangbanlo, Ki tuogi leni ursi, Bi wan sani ki pundi o deni ki ñii o nuu li goanli po, O wa mo n ñidi o.

²⁰ Naani o Diedo pabienli daali tie yenma daali yo? Aa-a, li tie biigile. Li tie biigili daali, lii pia yenma ba waamu.

U Tienu n nani yaa jaanma buolu

²¹ O Diedo yedi: «N sengi ki go nani yi jaanma. Mii bua ki go gbadi yi taana laabaalo mo.

²² Yi yaa cuani yi padijuukaana leni yi paabu, Laa go pia yankualiba kuli. Mii go faami Yi taanyenma pada leni yi naatonbiwubida kuli po.

²³ Foagidi mani n kani leni yi yani fuugu, Mii cengi yi gogiditi puama.

²⁴ Teni mani yaa bujiali n tiegi N yaa puubi yi siiga nani mi ñima yeni. Teni mani mi teginma n yaa ye yi siiga, Nani yaa kpenu n kan ñuudi yeni.

²⁵ Isidayeli yaaba, Yin den ye mi fanpienma nni bina piinaa yeni daa, Naani yi den padi n po a pada?

²⁶ Lanwani, tugi mani yi buli, Yi bulo Sikuti yua n tie yi bado Leni Kiyuni yua n tie yi buli ŋmabili. Lani kuli tie yi nii n tagi yaale.

²⁷ Lani yaa po, n baa gedini yi ti yonbidi hali Damasi dogu liiga. Yua yaa yeli n tie Li Miali Diedo U Tienu, U Paaciamu Kuli Daano, n yedi yeni.»