Amosi 4 - U TIENU MAAMA TILI 2013

U Tienu fu leni Samari puopiada

¹ Yinba yaa puopiada n ye Samari juali po, Ki gbengi nani Basan tialu naañuana yeni, Cengi mani yaa maama n tie ne: «Yi mabindi taliginba, ki ŋmaadi ki midi a luoda, Ki tua yi ciaba: ‹Taa mi daama ki cuani tin ño.› »

² Li Miali Diedo U Tienu poli O gagidiŋanma nni, ki yedi: «A dana kpendi, ke bi baa dadi ki ñani yi ne, Ki taani yi siiga ba yaaba n ban ŋua hali puoli, Nani mu jandiamu n yen cuo i jami ban dadi Ki ñani ba maama yeni.

³ Bi baa ñani yi u dogu bilinciamu bona kani, Yuakuli leni wan nagi yaa bonli kani, Bi baa gedini yi, ki goa yaa juali n yi Hermon po.» O Diedo n yedi yeni.

Isidayeli yaaba pajuaga

⁴ Isidayeli yaaba, gedi mani Beteli Ki ban yaa tiendi ti tuonbiadi! Gedi mani Giligali moko, Ki ban yaa tiendi ti tuonbiadi ki pugidi! Yaa padi mani yi pada tiŋaagu kuli, Ki yaa tendi nni yi diim danataa taa kuli.

⁵ Yaa taani mani ban pua yaa dupen leni li dabinli, Ki padi i tuondi pada. Kpaani mani ki waani yin kpendinni n po yaa paabu yi yama po, Kelima yinba Isidayeli yaaba, yi nan bua yene. Li Miali Diedo U Tienu n yedi yeni.

⁶ Mini mo den tuuni mi koma yi dogi nni kuli, Ki go tendi ke mi jiema poadi yi diedi nni kuli. Ama ba leni lani kuli, yii den lebidi ki guani n kani. O Diedo n yedi yeni.

⁷ N den yie yi po, ki sieni ki taaga Hali ke u jetaagu da sieni ŋmaalitaa. N yen teni ke ki taaga n mi u naa dogu nni Ki lagidi ki ŋaa u naa dogu. N yen teni ki taaga n mi u naa kuanu nni, Ki cedi u naa kuanu mo n luo ka, ki kuodi.

⁸ N den teni ke dogilie bi dogitaa yaaba caa dotogu nni, Ki bua mi ñinñokaama, Bi ñuñuunu naa den gbendi. Ama ba leni lani kuli, yii den lebidi ki guani n kani. O Diedo n yedi yeni.

⁹ N yen teni yi kuani n faani, Ki teni a baayuana mo n kua yi. N den teni ke a sidibila ŋmani yi salidinginba leni duven tiidi, Yi kankanŋuuke leni olivie. Ama ba leni lani kuli, yii den lebidi ki guani n kani. O Diedo n yedi yeni.

¹⁰ N den luni yi siiga u yianbiadipuodiko Yuu n naani leni Ejipiti yuu, Ki teni ke bi kpa yi nipanba leni mu jugisiemu, Ki fie yi taami mo. N den teni ke yi toanagili tinkpila nuulibiadu kua yi. Ama ba leni lani kuli, yii den lebidi ki guani n kani. O Diedo n yedi yeni.

¹¹ N den bolini yi siiga bi tianba, Nani min den bolini Sodomi leni Gomori dogi maama yeni. Yi siiga yaaba n sieni den tie nani ban kuudi Yaa datala u mu nni yeni. Ba leni lani kuli, yii den lebidi ki guani n kani. O Diedo n yedi yeni.

¹² Li tie lani yaa po yo, ke yi baa le Min baa soani yinba Isidayeli yaaba maama. Nani min baa soani yi maama yeni po, Bogini mani ki tuogi yi Tienu, yinba Isidayeli yaaba.

¹³ Diidi mani, U Tienu n tagi a juana leni u faalu. O wangi bi nisaaliba o yantiana. O yen teni mi yenma n lebidi ki tua biigili. O cuoni ki tinga joaciama po. O yeli n tie Li Miali Diedo U Tienu U Paaciamu Kuli Daano.