Amosi 3 - U TIENU MAAMA TILI 2013

Yaa buudi n ye Isidayeli yaaba po 3—6 U Tienu jaligi o niba

¹ Isidayeli yaaba, yinba U Tienu n den ñani yaa nibuolu Ejipiti nni, cengi mani o Diedo n maadi yi po yaala:

² «N den gandi yinba bebe Ki tinga nibuoli kuli siiga. Li tie lani yaa po yo, ke n baa cuo yi u cuonbiadu Yin tieni yaa tudima kuli po.

³ Naani nibilie baa taani ki fii sanu Kaa kpa juogi ki dagini li po?

⁴ Naani o yangbanlo baa buo li fuali nni, Kaa pia wan cuo yaala? Naani o yangbanlo baa yaa laabi ku tuugu nni Ki buoni, kaa pia wan cuo yaala?

⁵ Naani o nuano baa baa ku diagu nni, Kaa laa bonjekaala? Naani ku diagu baa fii ke bonla ki baa lienni?

⁶ Naani bi baa pua li toagangaali u dogu nni, Ke bi niba kan jie? Naani fala baa baa dogu, Ke laa tie o Diedo n cuani la?

⁷ Lanwani, o Diedo U Tienu kan tieni liba kuli, Kaa waani o naacenba bi saawalipuaba o ŋasiili.

⁸ O yangbanlo yaa buo, ŋme kan jie? Li Miali Diedo U Tienu yaa maadi, Ŋme n kan pua saawali?»

U Tienu baa jia Samari yaaba buudi

⁹ Kpaani mani ki yedi yaaba n ye a dieŋama nni, Ki ye Asidodi leni Ejipiti: «Cua mani ki taani Samari juana yula po, Ki diidi ki le yaa janjancianma Leni yaa mabinga n ye lienni.»

¹⁰ O Diedo yedi: «Samari yaaba ki bani ki tieni yaala n tiegi. Bi dogindi bi dieŋama nni ban tiendi u paalu ki fenli yaala.»

¹¹ Lani yaa po, o Diedo, U Tienu yedi yaa maama n tie ne: «Yi yibalinba baa lindi ki cebini yi diema, Ki paadi yi ki fie yaala n ye yi badidiedi nni kuli.»

¹² O Diedo yedi yaa maama n tie ne: «Nani o yangbanlo n yen cuo ki yanga, O yankpaalo n gaa taanalie bi tubijenga maama yeni, Li baa yaa tie yeni Isidayeli yaaba po, Bani yaaba n ye Samari Ki dua i duanŋami leni yaa cabiladikaana n ŋani po. Bi siiga nni, tianba bebe n baa sieni.»

¹³ Cengi mani, ki kpaani ki waani Jakob puoliŋuani Li Miali Diedo U Tienu, U Paaciamu Kuli Daano, N yedi yaala:

¹⁴ «Min baa pa Isidayeli yaaba bi yiema panpaani yaa daali, N go baa bolini yaa padibinbina n ye Beteli moko. A padibinbina yeni yina baa kua ki baa.

¹⁵ N baa mudi ban den maa yaa diena ti wadi yogunu po Leni ban den maa ya ku tontongu yogunu po, Ban den maa yaa dieciama ki tabini tabini a luonñina moko baa bodi. A diena boncianla baa bodi. Mini o Diedo n yedi yeni.»