Amosi 2 - U TIENU MAAMA TILI 2013

Moabi yaaba

¹ O Diedo yedi mi naa maama: «Moabi yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi den juu Edomi bado, ki buoni o kpaba.

² N baa soani u mu Moabi diema nni, Wun je Kelijoti dogu dieŋama, Moabi baa bodi ku fuugu siiga, Bu toabu kuudi siiga leni kakaci piebima siiga.

³ N baa bolini o bado yua n kaa likani, Ki taani leni o koanbala kuli. O Diedo n yedi yeni.»

Juda yaaba

⁴ O Diedo yedi mi naa maama: «Juda yaaba tieni tuongundataa, Li pundi baa bonanaa, Ya n teni ke n kan lebidi min jagi yaala. Bi fali n bali maama, Kaa kubi n ñoamabona mo, Ki ŋoadi i buli, Bi yaajanba n den ŋua yaala.

⁵ N baa soani u mu Juda diema nni, Wun je yaa dieŋama n ye Jerusalemi.»

Isidayeli yaaba

⁶ O Diedo yedi mi naa maama: «Isidayeli yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi kuadi o niteginka ki gaa i ligi, Ki kuadi o luodo kelima ti cacaadi po.

⁷ Bi fiagidi taliginba, Ki muni ba i moamoani li bujiali kaanu. Ki biga leni o baa koa jafanyendo kani, Ki bua ki biidi n yeli yaala n gagidi ki ŋani.

⁸ Bi yaa taani yaa padibinbinli kani kuli ki baa kpiagi nni, Bi yen ladi ban gaa a luoda kani yaa kpaliti Kelima a pana po, ki yaa dua. Bi yaa taani bi budieli nni, bi yen ñu Ban gaani a luoda kani yaa duven kelima a pana po.

⁹ Ama mini n den bolini bi po Amoriti yaaba, Bani yaaba n den kpedi nani sediri tiidi, Ki go pia u fidu nani sene tiidi yeni. N den bolini ba cain.

¹⁰ N den ñani yi Ejipiti diema nni, Ki kubi yi hali bina piinaa mi fanpienma nni, Hali ke yi ban diedi Amoriti yaaba diema.

¹¹ N den fiini yi bijaba siiga bi saawalipuaba, Yi nipanba siiga mo Nasileya yaaba. Bi laa tie yeni ka Isidayeli yaaba? O Diedo n yedi yeni.

¹² Ama yi ñuni li nianli yaaba duven, Yi yedi bi saawalipuaba, Ke ban da go pua saawali.

¹³ Diidi n baa ŋmaa ki midi yi, Nani yaa teligu n tugi ŋalikama baba, N ŋmaadi ki midi maama yeni.

¹⁴ Yua n pa mi nuama kan sani ki cia, O gbanmandaano gbanmanu kan fuoni o, O jakoando kan fidi ki gaa o miali.

¹⁵ O dabantuado kan sedi ki mua jama, Yua yaa taana n yua kan sani ki cia, O tanjagilo kan fidi ki gaa o miali.

¹⁶ Landaali bi toatieba papaadaano, Baa lu o jatiadi ki sani mubima.» O Diedo n yedi yeni.