Amosi 1 - U TIENU MAAMA TILI 2013

Yaa buudi n ye Isidayeli leni o kuantalieba po 1—2

¹ U Tienu den doagidi Amosi yua n den tie Tekoa dogu yankpaaba siiga yendo po. O den baa li bonlekaala yaala n tie Isidayeli diema po. Li den tie Osiasi n den tie Juda bado, ke Yoasi bijua Jeroboami mo tie Isidayeli diema bado yaa yogunu. Li den sua ke li sieni binalie mi tindigibima n tieni.

² Amosi den tua: «O Diedo ye Siyon ki buoni. O ye hali Jerusalemi ki kpaani. A yankpaafuana kuodi, Karimeli juali yuli po kuodi.»

Siiri yaaba

³ O Diedo den yedi mi naa maama: «Damasi yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi den ŋmaa ki midi Galaadi diema yaaba Leni yaa teliti yaa taana n pia ti kudi ke ti sondi.

⁴ N baa soani u mu Wun buoni o bado Asayeli puoliŋuani. U baa je o bado Beni-Adadi diegu.

⁵ N baa mudi Damasi sendabila Ya n luondi u dogu buliñoabu. N baa bolini Bekati Afeni yaaba, Ki bolini yaa bado n kaa Beti-Edeni. Siiri niba mo baa gedi ti yonbidi Kili dogu po. O Diedo n yedi yeni.»

Filisiti yaaba

⁶ O Diedo yedi mi naa maama: «Gasa yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi cuo nibuomunu kuli ki teni Edomi diema.

⁷ N baa soani u mu Gasa dogu bilini nni, U baa je likani dieŋama.

⁸ N baa bolini Asidodi dogu yaaba, Asikalon dogu yeni mo, n baa bolini likani bado, Ki pegidi ki baa Ekiron dogu, Ki bolini Filisiti yaaba, yaaba n sieni. Li Miali Diedo U Tienu n yedi yeni.»

Tiiri leni Fenisi yaaba

⁹ O Diedo yedi mi naa maama: «Tiiri yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi cuo nibuomunu kuli ki teni Edomi yaaba, Ki naa tiadi Tiiri yaaba n den loli yaa ŋantaado Leni bi kpiiba Isidayeli yaaba.

¹⁰ N baa soani u mu Tiiri dogu bilini nni, Wun je likani dieŋama.»

Edomi yaaba

¹¹ O Diedo yedi mi naa maama: «Edomi yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi den ŋoadi ki deli bi kpiiba leni ki jugisiega, Kaa gbadi bi po ninñimiba kuli. Bi pala yaa fii, ŋaa pia ke a jiidi, Baa pia sugili.

¹² Lani yaa po, n baa soani u mu bi dogu Tema nni, Wun je Botisira dogu dieŋama.»

Anmoni yaaba

¹³ O Diedo yedi mi naa maama: «Anmoni yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi den lidi a puotugupunba Galaadi diema nni, Kelima bi bua ki diadi bi diema.

¹⁴ Lani yaa po, n baa soani u mu Raba dogu bilini nni, Wun je likani dieŋama mi janjanma daali, Bu toabu kuudi siiga, Li baa yaa tie nani ku tafaabiadigu siiga yeni.

¹⁵ Bi bado mo baa gedi ti yonbidi, Wani leni o koanbala. O Diedo n yedi yeni.»