Abidiasi 1 - U TIENU MAAMA TILI 2013

Yaa fala n jagi Edomi yuli po 1.1-14 O Diedo waani ke Edomi baa bodi

¹ Abidiasi bonlekaala. Li Miali Diedo U Tienu den maadi Edomi yaaba po ki yedi: «Ti gaa laabaali ke u tondu ñani o Diedo kani, Ke o soani o tondo mo i nilanbuoli siiga ke o yedi: ‹Fii mani tin tuogi leni Edomi yaaba bu toabu.› »

² O Diedo yedi Edomi yaaba: «N baa teni yin tadigi, Ki cie i nibuoli kuli. Bi niba kuli baa fali yi.

³ Yi japaaciandi biani yi, Yinba yaaba n kaa ti tanlondi nni, Yaa kaani n kpedi boncianla, Ki tua yi yama nni: ‹Ŋme n baa fidi ki pieni ki ñani ti likani?›

⁴ Ba yi yaa ban ye naani n kpedi Nani jiebani tiali yeni, Ba yi yaa ban tieni yi yekaanu Hali a ŋmabila siiga, N baa pieni ki ñani yi likani, ki lu yi. Mini o Diedo n yedi yeni.

⁵ A suuda yaa cua ku ñiagu, U nufanu pua ŋa n yeni! Naani bi kan su yaala n pia Bi po mi fuoma te? Yaaba n cenli duven tiidi Bonluonkaala yaa kua a kuanu nni, Naani baa baa suodi likuli ka?

⁶ Diidi ki le ban fidi yi tiadi maama, Yinba Edomi yaaba, Bi wuodi ba yin den wuoni yaa ŋalimano.

⁷ Yin den danli leni yaaba deli yi, Ki ñani yi yi diema nni, Ki janbi yi. Yin danli leni yaaba diedi yi. Yaaba n den taagi ki di leni yi, Dia yi ti dadi. Bi maadi yi maama ki tua: ‹Diidi mani ban luo mi yama maama!›

⁸ Naani landaali ka ke n baa teni Bi yanfuodanba n bodi Edomi diema nni, Ki teni mi yanfuoma n bodi Esayu juana nni? Mini o Diedo n yedi yeni.

⁹ Fini Temani dogu, ti jawaanciandi Baa cuo a jakoanda, Joa mo kuli kan go yaa ye Edomi juana nni.

Edomi yaaba tagili

¹⁰ Yinba Edomi yaaba den tieni Yi kpiiba Jakob puoliŋuani mi biadima. Lani n teni ke yi baa le i fe, Ki bodi cain hali yaa yogunu kuli po!

¹¹ Yibalinba n den kua bi dogu nni, Ki paadi yi kpiiba toagola, Ki gedini ba ti yonbidi yaa daali, Yimoko den ye likani. Ban den toani tiatia ki baa boagidi Jerusalemi dogu ŋalimano, Yimoko den tie yenma leni bani bi nilanba yeni.

¹² Edomi yaaba, yi kan bi mangi yi pala, Yi kpiiba Juda yaaba fala daali, Yi kan bi mangi yi pala u nufanu N pua ba yaa daali, Bi ki sugi ba bi paboanli daali.

¹³ Yi kan bi kua n niba dogu nni Bi bodima daali. Yi kan bi nuali bi fala bi bodima daali. Yi kan bi fie yi kpiiba piama Bi bodima daali.

¹⁴ Yi kan bi jia a sankada nni Ki yi baa yaa kpaani Yaaba n tiini ki bua ki cia. Yi kan bi yaa co yaaba n tiini Ki bua ki ciadi, Ki guani ki teni ba bi yibalinba Bi paboanli daali.

O Diedo daali 1.15-21

¹⁵ Mini o Diedo pabienli daali nagini, Ke n baa jia i buoli kuli buudi. N baa soani yi, Nani yin den soani nitoaba maama. Yi tuonbiada baa guani ki jiidi yi yula po.

Isidayeli yaaba baa tuu Edomi yaaba bi panli

¹⁶ Yinba Isidayeli yaaba, Yi ñuni n joagagidikaali po. Yeni, yaa nibuoli n sieni moko Baa ño yogunu kuli. Bi baa ño, bi baa nali ki guo Ki yuandi ki bodi cain nani bi yàá bi mali ba yeni.

¹⁷ Ama yaaba n ciadi baa yaa ye Siyon juali po. Min go baa guani ki diedi yaali cain. N niba Jakob puoliŋuani mo baa guani Ki diedi mi diema.

¹⁸ N niba Jakob puoliŋuani baa yaa tie Nani u mu yeni, Josefi puoliŋuani mo baa yaa tie Nani mi mupienu yeni. Ama Esayu puoliŋuani baa tua Nani mi fenma yeni. Bi baa bolini Esayu puoliŋuani Nani u mu N yen buoni mi fenma maama yeni. Oba kuli kan cia Esayu puoliŋuani siiga. Mini o Diedo n yedi yeni.»

Isidayeli baa diedi o yibalinba

¹⁹ N niba, Juda yaaba, baa diedi Edomi diema nuganu po. Yaaba n ye Sefela baa diedi Filisiti yaaba diema. Bi baa diedi Efrayimi buolu diema Leni mi dociamu Samari. Benjamen buolu baa diedi Galaadi diema.

²⁰ Bi nilanba n den cuo yaaba Ti yonbidi Isidayeli yaaba siiga, Baa diedi Kanana yaaba diema Ki pundi hali Sarepita dogu. Ban den cuo yaaba Jerusalemi Ki gedini ti yonbidi Sefaradi dogu nni, Bani mo baa diedi ganu po yaa dogi.

²¹ Bi faabikaaba baa do Siyon juali po, Ki diedi Edomi juali. O Diedo wani o ba n baa tua o bado!