3 Jan 1 - U TIENU MAAMA TILI 2013

I fuondi

¹ Mini o nikpelo n diani li tili fini n buado Gayusi po, min bua fini yua leni i moamoani.

² N buado, n sugini a yema kuli n dagidi a po, ŋan yaa pia laafia a gbanandi nni, nani ŋan pia laafia a naano po maama.

³ Ti kpiiba n den cua yaa yogunu kuli ki tieni siedi ke a tie moamoandaano, ki cuoni i moamoani yaa yenma nni, n pali yen mangi hali boncianla.

⁴ Yaala n mangi n pali ki cie tie, min yaa gba ke n bila ŋua i moamoani.

Gayusi tie nidugika

⁵ N buado, a doagidi ke a tie nidugika leni ŋan tiendi yaala ti kpiiba po, ba yaaba n tie bi canba po.

⁶ Bi den togidi Kilisiti Nitaanli siiga, ŋan pia yaa buama. Li baa yaa ŋani ŋan todi ba ban suagi liiga bi sancenli po, nani lan dagidi U Tienu po maama.

⁷ Bi den fii ki gedi Jesu yeli po, ki naa gaa liba bi nilanba kani.

⁸ Lani yaa po, li pundi tin yaa gaani laa nibuolu cangu, ke timo n taani leni ba i moamoani wangima tuonli nni.

Diotrefi yiema, Demetriwusi ŋanma

⁹ N den diani mi maama waamu Kilisiti Nitaanli po. Ama Diotrefi, yua n bua ki yaa tugi li yuli bi siiga yeni naa tuo ti po.

¹⁰ Lani yaa po, n yaa cua, n baa togidi wan tiendi yaala, wan maadi ti po yaa mabiadima leni yaa faama kuli. Laa tie lani bebe ka. O go yie, waa gaani ti kpiiba cangu. Ba yaaba n bi bua ki gaa bi cangu mo, waa tuo bi po, ki go deli ki ñani ba Kilisiti Nitaanli nni.

¹¹ N buado, ŋan da togidi yaala n bia, ama ŋan yaa togidi yaala n ŋani. Yua n tiendi yaala n ŋani tie U Tienu yua, ama yua n tiendi yaala n bia daa laa U Tienu.

¹² Bi niba kuli tiendi Demetriwusi po o siediŋamo. I moamoani yini iba moko tiendi o po siediŋamo. Timoko tiendi o po laa siedo yo.

I fuondijuodike

¹³ N pia mi maama boncianla ki bua ki diani a po, ama mii bua ki diani leni mi tidianñima leni u tidianmuanu ka.

¹⁴ N sugini ki le ŋa ke li daa waagi, tin boe.

¹⁵ Mi yanduanma n yaa ye leni a. A danlinba fuondi a. Ŋan fuondi ti danlinba kuli yendo yendo.