2 Timote 4 - U TIENU MAAMA TILI 2013

Ŋan yaa wangi U Tienu Maama

¹ N teni a yaa ñoamabonli n tie ne U Tienu nintuali leni Jesu Kilisiti yua n baa jia ti buudi leni yaaba n fo leni yaaba n kpe kuli nintuali, ki puogi a kelima o cuama leni o diema kuli po,

² ŋan yaa wangi U Tienu Maama. Ŋan tieni ania, ki yaa moandi lan pa leni lan dingi kuli. Ŋan maadi ki guli yaaba n pia mi niama, ki fu leni yaaba n tudi, ki yaa tundi bi niba, ki go bangi ba leni li juunmoanli.

³ U yogunu baa ti cua ke bi niba kan go tuo ki yaa ŋua mi bangiŋanma. Ama bi baa yaa bua yaala n mani bi po bebe, ki lingi bi bangikaaba ki pugidi, yaaba n baa bangi ba ban bua ki yaa gba yaala.

⁴ Bi go baa lebidi ki ŋaa i moamoani cengima, ki yaa cengi a togidifana.

⁵ Ama fini wani, ŋan kubi a yuli li bonla kuli nni, ki tuo ki yaa laadi fala ki juuni lienni. Ŋan yaa tuuni o Laabaaliŋamo wangika tuonli, ki soani a tuonli bonŋanla.

Poli yema leni o fuondijuodike 4.6-22

⁶ Mini yaa po, bi wuli nni nani mi padiñima yeni, n kuuma yogunu pundi.

⁷ N moani li muaŋanli ki gbeni. N sani mi nuama ki gbeni. N kubi li dandanli.

⁸ Ba moala bi bili n po mi teginma badifogiliga, o Diedo yua n tie o bujiateginka n baa pa nni yaaga o guacuama daali. O kan pa mini nbebe ka, ama yaaba n den bua o guacuama kuli.

Poli leni Timote n pia yaa ŋantaado

⁹ Ŋan moandi ki cua n kani tontoni.

¹⁰ Demasi den ŋaa nni ki gedi Tesaloniki po, kelima o bua yaa jamaano n tie na yaa bonla. Kilesensi fii ki gedi Galati, Titi mo fii ki gedi Dalimati diema nni.

¹¹ Luki bebe n ye leni nni. A yaa kpendi, ŋan taa Marki wan yegi leni a, kelima o baa yaa pia n po mi fuoma boncianla li tuonli po.

¹² N den soani Tikika Efesi.

¹³ A yaa kpendi, ŋan cuani n po min den ŋaa yaa kpalibu Troasi dogu nni, Karipusi deni. Ŋan cuani n po a tila moko, min bua ya ki cie tie ti gbandi ya.

¹⁴ O maano Alekisandri den tieni nni mi biadima boncianla. O Diedo baa guani o nani o tuona n tie maama.

¹⁵ Amoko n fangi a yuli leni o, kelima o den yie ti maama boncianla.

¹⁶ Min den kpa sedi ki baa maadi ki gaa n yuli li bujiali kaanu kani, oba kuli ki den todi nni, bikuli den ŋaa nni. O Diedo n da guani ba la.

¹⁷ Wani o Diedo den todi nni ki puni nni u fidu ke n fidi ki waani o Laabaaliŋamo kuli cain, ke bi nilanba kuli n gbadi. O den gaa nni o yangbanlo ñoabu nni.

¹⁸ Wani o Diedo n go baa gaa nni leni bonbiadila kuli, ki faabi nni, ki kuani nni o diema nni, tanpoli po. Wani n yaa baadi ti kpiagidi hali yaa yogunu kuli. Amina!

I fuondijuodike

¹⁹ Ŋan fuondi Pilisika, Akilasi leni Onesifori deni yaaba.

²⁰ Erasiti sedi Korenti dogu nni. Tirofimi yia, ke n ŋaa o Mile dogu nni.

²¹ Ŋan moandi ki cua n kani ke ku fawaagu daa pundi. Ebulusi, Puda, Linusi, Kilodia leni ti kpiiba yaaba n sieni kuli fuondi a.

²² O Diedo n yaa ye leni a. U Tienu ŋanbili n yaa ye leni yikuli. Amina!