2 Timote 3 - U TIENU MAAMA TILI 2013

Mi juodima yogunu bi niyiekaaba baa yabidi

¹ N bua ŋan bandi ke a juodidana yaa nagidi, yaa yogini n pa baa cua.

² Bi niba baa yaa bua bi yula ŋamu bebe, ki tua i ligi buakaaba. Bi baa yaa tie ñoakpalidanba leni japaadanba, nisugida, danyiekaaba leni ŋanwaadanba, ki go tie yaaba n kaa fangi U Tienu.

³ Bi go baa yaa tie yaaba n bia ki naa gba ninñima, ki tie tuotabigu danba, yaaba n kaa kubi bi yula leni tugutongu danba, ki tie bi niŋanba kuli yibalinba,

⁴ janbi danba, yanjegibidanba leni bi yusiedanba, ki bua yaala n mani bi po ki cie U Tienu.

⁵ Bi baa yaa pia U Tienu tuoma nannanli, ama bi nia yaala n tie li paalu. Ŋan foagidi leni laa nibuolu.

⁶ Bi siiga bi jatianba wuondi ki caa ti diedi nni, ki boandi yaa puoba n tadi, ki tugi ti tuonbiadi ke li bonbuaka-biadila buoli kuli die ba.

⁷ Bi ŋua mi bangima yogunu kuli, ki naa fidi ki pundi i moamoani yaa bandima.

⁸ Nani Janesi leni Jamibilesi n den yie Musa maama, laa niba moko yie i moamoani yene. Bi tie yaa niba yaa yantiana n joagini ki biidi, bi dandanli mo ki fidi ki sedi mi biigima nni.

⁹ Ama bi kan suagi liiga bi boandi bangima nni, kelima bi yanluoma baa doagidi bi niba kuli po, nani laa niliediba yaama n den doagidi maama.

Poli tundijuodike Timote po

¹⁰ Ama fini, a den ŋoadi n bangima, n tagu, n jaga, n dandanli, n dingima, n buama, n juunli,

¹¹ ban den wangi nni yaa fala leni min den ye yaa yepaama nni kuli. Be yaa fala yo ke mii den laa Antiosi, Ikoniyumi leni Lisitri dogi nni? Baa den waani nni o laa fala yo? Ama o Diedo den faabi ki ñani nni likuli nni.

¹² Moamoani yaaba n bua ki yaa cuoni ke li tiegi Jesu Kilisiti nni kuli, bi baa yaa wangi ba fala.

¹³ Ama bi nibiadiba leni i boandi danba baa suagi liiga mi biadima nni, ki yaadi biba ki go yaa yaandi nitoaba.

¹⁴ Ama fini wani, ŋan yaa se ke li pa ŋan den bandi yaala, ki go daani la nni. A bani ŋan den bandi la yua yaa kani.

¹⁵ Hali a biwaama nni a bani i Diani. I baa fidi ki pa ŋa mi yanfuoma, yaama n baa ciani a mi tindima nni, kelima a daani Jesu Kilisiti.

¹⁶ I Diani kuli den diani U Tienu gobidima yaa niinni. I pia mi fuoma mi bangima po, ki maadi ki co bi niba, ki tundi ba mi tudima nni, ki go bangi ba mi teginma nni.

¹⁷ Lani n tie U Tienu nilo n ŋanbi cain, ki bogini ki fidi ki yaa tiendi a tuonŋama kuli.