2 Timote 2 - U TIENU MAAMA TILI 2013

Jesu Kilisiti minteelidugika

¹ Lanwani, fini n biga, yaa paagidi a pali yaa ŋanbili n ye Jesu Kilisiti niinni.

² Ŋan den gbadi n kani yaala siedinba boncianla nintuali, amo n piani la bi nidugikaaba, yaaba mo n baa fidi ki yaa bangi nitoaba.

³ Ŋan tuo ki gaa fala leni nni, nani Jesu Kilisiti minteeliŋanli yeni.

⁴ Yua n tie minteeli, ki bua ki mangi o toagoli yudaano pali, kan pa o yuli mi yema bonbuakaala po.

⁵ Yua n tiini mi nuama kan baa panpaani, se wan sani nani ban bili maama.

⁶ O kpakpaalo yua n tuuni o tuonli leni fala, n tie yua n baa kpa baa o tuonli ñuadi.

⁷ Ŋan gaa min yedi a yaala na, kelima o Diedo baa pa ŋa mi yanfuoma, ŋan fidi ki bandi likuli.

⁸ Ŋan yaa tiani Jesu Kilisiti po, yua n den fii bi tinkpiba siiga, wani yua n tie Davidi puoliŋuanu, nani min wangi yaa Laabaaliŋamo n yedi maama.

⁹ Laa Laabaaliŋamo yaa po yo, ke n laadi fala hali ke bi kpaa nni ti kpaadi, nani n tie o nibiado yeni. Ama baa kpaa U Tienu maama wani.

¹⁰ Lani yaa po, n tuo likuli, kelima bi nigandikaaba po, ke bani moko n baa yaa tindima n ye Jesu Kilisiti nni leni yaa kpiagidi n kan gbeni.

¹¹ Mine n tie mi madugikaama: Ti yaa kpe leni o, Ti baa yaa ye ki fo leni o.

¹² Ti yaa juuni fala nni, Ti baa diedi leni o. Ti yaa nia o, Omo baa nia ti.

¹³ Ti yàá tie wan baa fidi ki dugi yaaba yaa po, Wani wani tie tin fidi ki dugi yua yaa po, Kelima o kan tieni yaala n baa nia wan tie maama.

U Tienu n baa pagi yaa tuonsoanba

¹⁴ Ŋan yaa tiadi ba laa maama kuli, ki tundi ba U Tienu nintuali ke ban da nia leni biyaba mi maama bundima po, kelima laa pia todima ba waamu. Ama li baa bolini yaaba n gbadi ma bebe.

¹⁵ Ŋan moandi ki doagidi U Tienu nintuali ke a tie ban biigi ki pagi yaa nilo, nani yaa tuonsoanlo n kaa jie i fe o tuonli po, ama ki wangi i moamoani maama ke li tiegi.

¹⁶ Ŋan sani ki foagidi leni mi mafanma, yaama n nia li dandanli. Yaaba n kubi ma baa suagi liiga U Tienu yiema nni yogunu kuli.

¹⁷ Bi maama tie nani yaa nabiadili n lugi ti gbanandi yeni. Imene leni Fileti tie bi siiga yaaba.

¹⁸ Bi den yaadi ki ŋaa i moamoani, ki yedi ke bi tinkpiba fiima pendi, ki guliti bi tianba dandanli.

¹⁹ Ba yeni, U Tienu n puu yaa tanpuuli se bonŋanla, ki ñii mi naa maama po: «O Diedo bani o yaaba.» Li go yedi: «Yua n yedi ke o tie o Diedo yua kuli, n sani ki ŋaa mi biadima.»

²⁰ Li diecianli nni, a kan le yaa tadimu n tie wula leni ŋanjilifa bebe ka, a go baa le yaamu n tie ti daadi leni ti tandi moko. Mu taditianmu ye yaa tuona n pia ti kpiagidi po, mu tianmu mo a tuonfana po.

²¹ Lanwani, o nilo yaa ŋanbi o yuli ki paadi leni min maadi yaa biadima maama na kuli, o baa yaa tie nani yaa tadiga n tie a tuonkpiaga po yeni. O canbaa gagidi laa tadige o tuonli po. Laa tadiga pia mi fuoma, ki bogini ki dagidi yaa tuonli n ŋani kuli po.

²² Ŋan sani ki ŋaa bi nipanba bonbuaka-biadila, ki yaa lingi mi teginma, li dandanli, mi buama, mi yanduanma, ki taani leni yaaba n jaandi o Diedo leni li papienli.

²³ Ŋan yie yaa niama n ŋua mi yanluoma, kelima a bani ke mi fiindi a koana.

²⁴ Laa ŋani o Diedo naacemo n yaa pia a koana, ama wan yaa tie yua yaa yama n dingi bi niba kuli po, ki yaa pia mi bangima paabu, ki go yaa pia li juunli.

²⁵ Wan go yaa tie yua n tundi yaaba n yiedi o po leni mi dingima, ki yaa sugini U Tienu n pa ba ban lebidi bi pala, ki fidi ki bandi i moamoani.

²⁶ Lani n tie ban go guani ki baa bi yama ki ña Sutaani jogidi nni, yii n den cuo ba ki teni ke bi tiendi o yanbuama.