2 Timote 1 - U TIENU MAAMA TILI 2013

Ti pagidi leni i tundi 1.1—4.5 I fuondi

¹ Mini Poli, yua n tie Jesu Kilisiti tondo kelima U Tienu yanbuama po. U Tienu den soani nni, min yaa wangi wan den niani yaa miali Jesu Kilisiti nni yaa maama.

² N diani li tili fini Timote n bibuadiga po. Ti Baa U Tienu leni ti Diedo Jesu Kilisiti n pa ŋa li ŋanbili paabu leni mi yanduanma, ki go gbadi a po mi ninñima.

Poli tuondi U Tienu

³ N tuondi U Tienu min tuuni yua yaa po leni yaa pali siedi n ŋani, nani n yaajanba n den tuuni o po maama. U yensiinu leni ku ñiagu kuli, n yaa jaandi U Tienu, n miadi o a po ki tuondi o kaa cedi.

⁴ N tiadi a nunsiidi ki bua ki le ŋa bonŋanla, n pali n go mangi lan kandi.

⁵ N go tuondi U Tienu kelima n tiadi a dandanmoanli po. N bani cain, ke a naa Yunisa leni a yaa Lowisa n den kpa pia yaa dandanli, fini moko pia laa dandanle.

⁶ Lani yaa po, n bua ki tundi a ŋan yaa tigi nani u mu yeni, U Tienu n den puni a yaa ŋanbili paabu, min den maani a po n nii yaa yogunu.

⁷ U Tienu ki puni ti yaa Fuoma n pia i jeje, o puni ti yaa Fuoma n pia li papaali, mi buama leni li yukubile.

⁸ Lanwani, ŋan da jie i fe ŋan tiendi yaa siedi ti Diedo po leni mini o kpaadili po moko. Ŋan taani leni nni o Laabaaliŋamo fala nni, kelima U Tienu paalu po.

⁹ O den faabi ti ki yini ti yaa yiinu n gagidi ki ŋani. Waa den tieni yeni kelima ti tuonŋama po ka, li tie o yanjagili leni o ŋanbili po, wan den tieni ti po yaala Jesu Kilisiti nni, hali ke ŋanduna daa tagi.

¹⁰ Ti Candaano Jesu Kilisiti cuama ŋanduna nni doagidi ti po laa ŋanbili moala. Wani Jesu den paadi mi kuuma paalu, ki doagidi ti po li miali, yaali n baa ye, hali yaa yogunu kuli, kelima o Laabaaliŋamo wangima po.

¹¹ U Tienu den puogi nni ke min tua laa Laabaaliŋamo wangika, o tondo leni o bangika.

¹² Li tie lani yaa po ke n laadi yaa fala n tie ne moala, ama mii jie i fe li po ba waamu, kelima n bani min daani yua, ki go bani ke o pia u paalu ki baa fidi ki kubi n pianli, hali li daali n pundi.

¹³ Ŋan den gbadi n kani yaa mamoanma baa yaa tie a po li bontogidikaala. Ŋan yaa ŋua ma, ki se ke li pa li dandanli leni mi buama nni, tin pia yaala Jesu Kilisiti nni.

¹⁴ Ŋan yaa kubi U Tienu n den piani a yaa pianmoanli, kelima U Tienu Fuoma Yua yua n ye ti niinni yaa paalu po.

¹⁵ A bani ke yaaba n ye Asi diema nni, lebidi ki ŋaa nni. Fijeli leni Elimojeni tie bi siiga yaaba.

¹⁶ O Diedo n yaa gba Onesifori leni o deni yaaba po mi ninñima, kelima o yen duandi n yama, ki mangidi n pali. Waa jie i fe n kpaadi po.

¹⁷ Wan den cua Loma yaa yogunu, o den tieni ania ki lingi nni hali ki laa nni.

¹⁸ O Diedo n gbadi o po mi ninñima o guacuama daali. A bani ki cie nilo kuli wan den todi nni yaa todima kuli, min den ye Efesi dogu nni ya yogunu.