2 Samueli 9 - U TIENU MAAMA TILI 2013

Davidi ŋanbi Jonatan bijua Mefiboseti po

¹ Davidi den buali: «Naani niloba go sieni Sayuli buolu siiga bi? N bua ki ŋanbi o po kelima Jonatan po.»

² Li den sua ke naacenyendo sieni Sayuli naacenba siiga, ke bi yi o Tisiba. Bi den yini o ke o cua Davidi kani. Wani o bado den buali o: «Fini n tie Tisiba bi?» O den yedi: «N daano, mine.»

³ O bado den yedi o: «Naani Sayuli nilo ba niyendo ki go ye, ke min ŋanbi o po nani U Tienu n bua maama?» Tisiba den guani ki yedi o bado: «Jonatan bijua yendo sieni ki tie wabo.»

⁴ O bado den buali o: «O ye le?» Tisiba den guani ki yedi: «O ye Lodebari dogu nni, Amieli bijua Makiri diegu nni.»

⁵ O bado Davidi den soani ke bi ban yini o Lodebari, Amieli bijua Makiri diegu nni.

⁶ Lanwani, Sayuli bijua Jonatan bijua Mefiboseti den cua Davidi kani ki labini ki pugi o. Davidi den yedi: «Mefiboseti!» O den guani ki yedi: «Mini a naacemo nne.»

⁷ Davidi den yedi o: «Ŋan da jie liba, n bua ki ŋanbi a po kelima a baa Jonatan yaa po. N baa go guani a a yaaja Sayuli kuani kuli. A baa yaa di n saajekaanu kani yogunu kuli.»

⁸ Mefiboseti den pugi o ki yedi: «Mini a naacemo tie be ke a nuali ki laa n po, mini yua n tie nani o sangbankpiemo yeni?»

⁹ O bado den yini Tisiba, Sayuli naacemo yeni ki yedi o: «N puni a canbaa Sayuli yaabili, Sayuli leni o diegu yaaba kuli n die yaala.

¹⁰ Ŋan yaa ko o po i kuani yeni kuli, fini leni a bijaba leni a naacenba, ki yaa taagi o po o jiema kuli ke a canbaa yaabili Mefiboseti n yaa pia li bonjekaala ki di. Wani Mefiboseti baa yaa di n yaa saajekaanu kani yaa yogunu kuli.» Tisiba den pia piiga n bonjalamuu leni naacenba piilie.

¹¹ O den yedi o bado: «Mini a naacemo baa tieni fini n daano o bado n teni nni yaa ñoamabona kuli.» Mefiboseti den di Davidi saajekaanu nani o bado bijaba yeni.

¹² Mefiboseti den pia bonjadagidinkaaga ke bi yi ka Mika. Tisiba deni yaaba kuli den tua Mefiboseti naacenba.

¹³ Mefiboseti den ye Jerusalemi kelima o den di o bado saajekaanu kani. O den tie wabo.