2 Samueli 8 - U TIENU MAAMA TILI 2013

Davidi n tieni yaa toabu 8—10 Davidi paadi yaa nibuoli n lindi o

¹ Li yaa puoli, Davidi den paadi Filisiti yaaba ki miidi ba. O den fie bi bali ke baa go pia bali bi diema nni.

² O go den paadi Moabi yaaba moko. O den teni ke bi duani tiipo, ke o kpa nibitaa siiga kuli nibilie. Nibitaa siiga kuli o den ŋaa niyendo leni li miali. Davidi den diedi ba ki teni ke bi pa o li lubili.

³ Davidi go den paadi Siiri diema yaa diebiga Tisoba yaa bado Rehobi bijua Hadadeseri. O den paadi o, wani Hadadeseri n den moandi ke o baa guani ki diedi u kpenciamu Efrati yaa yogunu.

⁴ Davidi den fie o kani tandanba tudili n kobilele (1 700) leni taacenda tuda piilie (20 000). O den jia yaa taami n sieni gadibanjiini ki ŋaa taami kobiga bebe ki kubi bani o yuli po.

⁵ Siiri yaaba, yaaba n den ye Damasi dogu den cua ke bi baa todi Tisoba bado Hadadeseri. Davidi den paadi ba ki kpa bi siiga piilie n tudalie (22 000).

⁶ O den kaani a koanbala Damasi, Siiri diema nni. Siiri yaaba mo den tua Davidi naacenba, ki den pa o li lubili. O Diedo den puuni Davidi mi paadima wan gedi naankani kuli.

⁷ Davidi den gaa Hadadeseri naacenba n den kubi yaa wula gbankoanditi, ki gedini a Jerusalemi.

⁸ O go den taa ti kumoandi boncianla Hadadeseri dogi Betaki leni Belotayi niinni.

⁹ Hamati bado Toyi den gbadi ke Davidi paadi Hadadeseri toagoli kuli.

¹⁰ O den soani o bijua Jorami o bado Davidi kani wan fuondi o ki jaandi o leni wan paadi Hadadeseri, kelima wani Toyi leni Hadadeseri den tie yibalinbe leni biyaba. Jorami den gedini wula tiadi, ŋanjilifa leni ti kumoandi yaa tiadi kuli ki ban teni Davidi.

¹¹ O bado Davidi den gaa li kuli ki puni o Diedo nani wan den puni wan den paadi i nilanbuoli ki gaa bi kani yaa ŋanjilifa leni yaa wula maama.

¹² I nilanbuoli yeni tie Siiri yaaba, Moabi yaaba, Anmoni bijaba, Filisiti yaaba leni Amaleki yaaba. Wan den fagi Tisoba bado Rehobi bijua Hadadeseri kani yaa fagidi moko, o den puni ti U Tienu.

¹³ Davidi yeli go den ñani ki pugini wan den gedi ki ban paadi Siiri yaaba yaa joaloangu n yi mi yaama joaloangu nni, ki kpa bi siiga piiga n tudanii (18 000).

¹⁴ O den kaani o koanbala Edomi diema nni, ke bi die Edomi yaaba. O den diedi Edomi diema kuli. O Diedo den puuni Davidi mi paadima wan gedi naankani kuli.

Davidi paatiecianba yela

¹⁵ Davidi den diedi Isidayeli yaaba kuli. O den ja ti buudi o niba kuli po ke li tiegi.

¹⁶ Tiseruya bijua Joabi den tie li toagoli yudaano, Ahiludi bijua Josafati den tie o bado soagindo.

¹⁷ Ahitubi bijua Sadoki leni Abiatari bijua Ahimeleki den tie bi kopadicianba.

¹⁸ Seraya den kubi a tila tuonli. Yeoyada bijua Benaya den tugi Keleti leni Peleti yaaba yuli. Davidi bijaba mo den tie wani Davidi todikaaba.