2 Samueli 7 - U TIENU MAAMA TILI 2013

U Tienu ñoanianu Davidi leni o puoliŋuani po

¹ O bado Davidi n den kua ki ye o dieciangu nni, o Diedo den faabi o leni o yibalinba yaaba n lindi o kuli, ki fuoni o leni bu toabu.

² Dayenli wani Davidi den yedi o saawalipualo Natan: «Diidi ki le, n ye ban ŋanbi yaa diegu leni sediri tiidi daadi yaa niinni, ke U Tienu kpaku mo nan ye li gbandieli nni.»

³ Natan den guani ki yedi o bado: «Ŋan tieni yaala n ye a yama kuli nni, kelima o Diedo ye leni a.»

⁴ Landaali ñiagu, o Diedo den maadi leni Natan ki yedi o:

⁵ «Gedi ki ban yedi n naacemo Davidi ke mini o Diedo yedi mi naa maama: ‹Naani fini n baa maa n po min baa yaa ye yaa diegu nni?

⁶ Ki cili hali min ñani Isidayeli yaaba Ejipiti nni, ki pundi hali dinla, mii ye diegu nni. N li ye gbandieli nne ki cuoni leni ba.

⁷ Min den yegi leni Isidayeli yaaba naankani kuli, n den pia min puogi yaaba ban yaa gobidi n niba Isidayeli yaaba. Mii buali bi siiga oba kuli: Be n teni ke yii maa n po diegu ki ŋanbi ku leni sediri tiidi daadi?›

⁸ Lanwani, moala ŋan yedi n naacemo Davidi: ‹Li Miali Diedo U Paaciamu Kuli Daano yedi mine: N den ñani a u yankpaakaanu kani ŋan den kpaa i pe naani, ki teni ke a tua n niba Isidayeli yaaba yudaano.

⁹ N den ye leni a ŋan den goadi naani kuli, n den bolini a yibalinba kuli a nintuali, ki teni ke a yeli kpedi ki yabidi nani ŋanduna nicianba yaa yela n yabi maama yeni.

¹⁰ N puni n niba Isidayeli yaaba u yekaanu, ki kaani ba ke ban yaa kaa ki da go goadi ki liani, ke bi nibiadiba n da go mabini ba nani kpiama,

¹¹ min den teni ke bi bujiaba gobidi n niba yaa yogunu. N faabi a leni a yibalinba ki puni a mi fuodima. Mini o Diedo, n yedi a ke n baa sieni a diegu mo.

¹² A dana bianu yaa tuoni ke a guani, n baa gandi a bila siiga yendo ki dini o li bali wan gaa a kaanu. N baa teni o bali n yaa ye ki pa.

¹³ Wani n baa ti maa ku diegu n yeli nni. N baa pugini o bali paalu mo hali yaa yogunu kuli po.

¹⁴ N baa tua o baa, omo n tua n bijua. O yaa tieni yaala n bia, n baa tundi o leni u fibu, nani bibaa n yen tundi o biga maama yeni.

¹⁵ Die n kan ñani n seli o kani, nani min den yie Sayuli ki ñani li o kani maama, ki teni ke a gaa o kaanu.

¹⁶ N baa teni a diegu nni yua n yaa kubi li bali ki die hali yaa yogunu kuli, a diegu bali baa yaa ye ki pa hali yaa yogunu kuli.› »

¹⁷ Natan den togidi Davidi laa maama leni laa bonlekaala kuli.

Davidi jaandi

¹⁸ Lane o bado Davidi den kua o Diedo gbandieli nni wani o Diedo kani ki yedi: «O Diedo n Tienu, n tie ŋme? N diegu yaaba tie ŋmenba ke a teni ke n tua min tie yua ne?

¹⁹ Lani kuli daa tie a po liba kuli, o Diedo n Tienu. A go maadi mini a naacemo diegu n baa ti tua maama mo yaa maama, ki da go ban waani mini yua n tie nisaalo laa bonla!

²⁰ Mini Davidi go baa fidi ki yedi be? Kelima o Diedo n Tienu, a bani mini a naacemo.

²¹ A tieni laa boncianŋanla kuli ki waani nni la nani a pali n bua maama, kelima a den niani nni li ñoanianu.

²² A kpiagi hali moamoani, o Diedo U Tienu pia ti kpiagidi hali boncianla, oba kuli ki naani leni a. Nani tin ko li gba maama, tientoa kuli ki ye, se fini.

²³ Naani nibuoto go ye ŋanduna nni ki naani leni a niba Isidayeli yaaba? Fini U Tienu n den cua ki daa ki faabi ba, ki teni ke bi tua a niba ki teni ke a yeli ñani. A den tieni a niba Isidayeli yaaba po leni a diema po kuli mi bancianma leni li bonlidinkaala, lani n tie ke a den deli i nilanbuoli leni bi tieni kuli ki ñani ba a niba Isidayeli yaaba nintuali, bani ŋan den daa ki faabi yaaba Ejipiti nni.

²⁴ A gandi a niba Isidayeli yaaba ki bili ke ban yaa tie a yaa niba yaa yogunu kuli. Fini o Diedo, a mo tua bi Tienu.

²⁵ Moala, o Diedo U Tienu, ŋan tieni ŋan yedi yaala, ŋan teni ke ŋan niani mini a naacemo leni n diegu yaala kuli n yaa ye hali yaa yogunu kuli.

²⁶ A yeli n yaa baadi ti kpiagidi hali yaa yogunu kuli. Bi niba n yaa tua: ‹Li Miali Diedo U Paaciamu Kuli Daano tie Isidayeli Tienu!› Mini a naacemo Davidi diegu n yaa se a nintuali ki pa,

²⁷ kelima fini Li Miali Diedo, U Paaciamu Kuli Daano, Isidayeli Tienu, a den doagidi ki waani mini a naacemo ke a baa sieni n diegu. Li tie lani yaa po ke n paagi n pali ki mia laa miabu.

²⁸ Lanwani moala, o Diedo U Tienu, fini n tie U Tienu, a maama tie moamoani, ki niani nni mo ke a baa tieni n po laa ŋanbili.

²⁹ Lanwani, n mia ŋa, ŋan yaa seligidi mini a naacemo diegu, kun yaa se a nintuali hali yaa yogunu kuli, kelima fini o Diedo n Tienu n maadi yeni. Li tie ke a seli yaa po ke mini a naacemo diegu baa baa li seli hali yaa yogunu kuli.»