2 Samueli 5 - U TIENU MAAMA TILI 2013

U Tienu pugini Davidi bali u paalu 5—7 Bi dini Davidi Isidayeli bali

¹ Isidayeli buoli kuli den cua Hebiron, Davidi kani ki yedi o: «Ti taa leni a gbanandi, ti kuli tie soayenma yaabe.

² Ba hali yogu, Sayuli n den tie ti bado yaa yogunu, fini n den gobidi Isidayeli toagola. O Diedo den yedi a: ‹A baa yaa gobidi n niba Isidayeli yaaba, ki yaa tugi bi yuli.› »

³ Isidayeli nikpela kuli den cua Hebiron, o bado Davidi kani ke o juogi leni ba likani o Diedo nintuali. Bi den wuli o po mi gagidima kpama, ki dini o li bali Isidayeli diema kuli po.

⁴ Davidi den pia bina piitaa wan den tua bado yaa yogunu, ki tieni li bali nni bina piinaa.

⁵ O den tieni Hebiron binalele leni ŋmaaliluoba ki die Juda yaaba. Jerusalemi mo o den tieni piitaa n binataa ki die Isidayeli leni Juda yaaba kuli.

Davidi koani ki paadi Jerusalemi

⁶ Davidi leni o toatieba den gedi ki baa Jerusalemi, ki tuogi Jebusi yaaba, yaaba n den ye laa diema nni. Bi den yedi Davidi: «A kan kua ne, kelima ba a juama leni a waba baa deli a.» Lani n den bua ki yedi: «Davidi kan fidi ki kua ne abada.»

⁷ Ama Davidi den cuo Jerusalemi kaanpaalu Siyon, ki diedi u ke u tua Davidi dogu.

⁸ Landaali Davidi den yedi: «Yua n bua ki paadi Jebusi yaaba, se wan moandi ki pundi u ñinsanu kani. Ama mii bua ki le a juama leni a waba yeni!» Li tie lani yaa po ke bi tua: «A juama leni a waba kan kua o Diedo diegu nni.»

⁹ Davidi den kua ki ye u kaanpaalu yeni niinni, ki yini u Davidi dogu. O den maa u bilinciamu ki cili u kaanpaalu kani, Milo kani yeni ki lindi u dogu, ki go maa tugu nni kelima bu toabu po.

¹⁰ Davidi paalu den pugidi, kelima o Diedo U Tienu, U Paaciamu Kuli Daano den ye leni o.

¹¹ Tiiri bado Iram den soani Davidi kani a tonda, ki go soani sediri tiidi daadi, bi kpagikpieba leni a tankpieda, ke bi maa Davidi po ku diegu.

¹² Davidi den bandi ke o Diedo dini o li bali ke o tie Isidayeli bado, ki go kpiagi o diema kelima o niba Isidayeli yaaba po.

Davidi n mali yaa bila ki ye Jerusalemi

¹³ Davidi n den ñani Hebiron ki cua Jerusalemi, o go den taa likani puoba leni ti puonanbandi, ki go mali a bonjala leni a bonpola.

¹⁴ Diidi ki le ban den mali o po yaaba Jerusalemi nni yela: Samua, Sobabi, Natan, Salomon,

¹⁵ Yibari, Elisuwa, Nefegi, Yafia,

¹⁶ Elisama, Eliyada leni Elifeleti.

Davidi paadi Filisiti yaaba

¹⁷ Filisiti yaaba n den gbadi ke bi dini Davidi li bali ke o tua Isidayeli bado, bi den taani ki gedi ke bi baa cuo o. Davidi n den gbadi lani, o den jiidi ki kua u kaanpaalu nni.

¹⁸ Filisiti yaaba den pundi ki yadi ki gbie Refayimi yaaba joaloangu nni.

¹⁹ Davidi den buali o Diedo: «Min tuogi leni Filisiti yaaba bu toabu bi? A baa taa ba ki teni nni?» O Diedo den yedi o: «Gedi, kelima n baa taa Filisiti yaaba ki teni a.»

²⁰ Davidi den gedi Baali-Pelatisimi dobiga nni, ki tuogi leni Filisiti toatieba yeni ki paadi ba. Lani, o den yedi: «O Diedo deli ki yadi n yibalinba n nintuali nani yaa ñinpuubikaama n padi bu tiabu yeni.» Lani yaa po yo, ke bi yini laa kaanu Baali-Pelatisimi.

²¹ Filisiti yaaba den ŋaa bi buli likani ke Davidi leni o niba den taa yi.

²² Filisiti yaaba go den guani ki gedi ki yadi yadi Refayimi yaaba joaloangu nni.

²³ Davidi den buali o Diedo o yaa baa gedi ki tuogi leni ba bu toabu. O Diedo den yedi o: «Ŋan da teli ki tuogi ba. Ama, lindi bi puoli po, ki ban baa ba i tiidi kani.

²⁴ A yaa gbadi a taana cenli i tiidi yeni po, ŋan jaligi kelima mini o Diedo n ye a liiga ki baa paadi Filisiti yaaba toagoli.»

²⁵ Davidi den tieni o Diedo n den yedi maama, ki paadi Filisiti yaaba ki deli ki ñani ba Geba dogu, ki ban pundi hali Geseeri dogu buliñoabu kani.