2 Samueli 3 - U TIENU MAAMA TILI 2013

¹ Bu toabu den waagi ki ye Sayuli niba leni Davidi yaa niba siiga. Davidi paalu den pugidi ke Sayuli yaa niba mo tadigidi.

Davidi n mali yaa bila Hebiron

² Davidi den mali a bonjala Hebiron. O bijakpelo den yi Aminoni. O naa den tie Ahinoami, Yisireyeli dogu yua.

³ O lielo mo den yi Kileyabi, Nabali kpepuoli Abigayili, yua n den ñani Karimeli dogu, n den mali yua. O taalo mo den yi Abisalomi. O naa den tie Gesuri bado Talimayi bisalo Maaka.

⁴ O naalo den yi Adonija, Hagiti n den mali yua. O muulo den yi Sefatia, Abitali n den mali yua.

⁵ O luobilo Yitireami mo den tie Egila yaa biga. Wani Egila moko den tie Davidi pua. Bani n tie Davidi n den ye Hebiron ki mali yaaba.

Abineri goa ki mangi leni Davidi

⁶ Sayuli niba leni Davidi yaa niba janjanma nni, Abineri den se Sayuli niba puoli ke li pa.

⁷ Li den sua ke Sayuli pia ku puonanbangu ke bi yi ku Litisipa, Aya bisalo. Isi-Boseti den yedi Abineri: «Be yaa po ke a kua n baa puonanbangu kani?»

⁸ Abineri pali den beni boncianla laa maama po. O den guani ki yedi: «Naani n tie sangbanyule ki tuuni Juda yaaba po? Hali dinla n doagidi ke n bua a baa Sayuli diegu, o kpiiba leni o danlinba kuli. N moandi min fidi maama kuli, ke ŋaa baa Davidi nuu nni. Ama amo jaligi nni laa pua po dinla!

⁹ N yàá tieni Davidi po o Diedo n niani o yaala, U Tienu n cuo mini Abineri o cuonbiadu.

¹⁰ Abineri den poli ke o baa fie li bali Sayuli diegu yaaba kani, ki pugini Davidi bali u paalu, wan yaa die Isidayeli leni Juda yaaba kuli, ki cili Dan diema bianu, ki yaa caa hali Beri-Seba bianu.»

¹¹ Isi-Boseti ki den tuo ki yedi liba, kelima o den jie Abineri.

¹² Li yaa puoli, Abineri den soani a tonda Davidi kani ban ban yedi o: «Mi diema tie ŋme yaa yaame? Tin tieni u juogu, lanwani n baa teni Isidayeli yaaba kuli n pegidi ki ŋoadi a.»

¹³ Davidi den guani ki yedi: «To, n tuo tin juogi. Ama bonyenla bebe, ŋan da ŋmaa n kani ke n pua Mikali, Sayuli bisalo, ki ye a liiga.»

¹⁴ Davidi den soani a tonda Sayuli bijua Isi-Boseti kani, ki yedi o: «Teni nni n pua Mikali, min den pani yua yaa po Filisiti yaaba punjuodi kobiga ki taa o yeni.»

¹⁵ Isi-Boseti den teni ke bi ban gaa Mikali o calo Layisi bijua Palitieli kani.

¹⁶ O calo den ŋua ki buudi ki pundi hali Bahurimi dogu nni, lankani Abineri den yedi o: «Lebidi ki yaa goa.» O den lebidi.

¹⁷ Li den sua ke Abineri maadi leni Isidayeli yaaba nikpela. O den yedi ba: «Hali yogu yi den bua Davidi n tua yi bado.

¹⁸ Yin ji dini o mani moala, kelima o Diedo den maadi o maama ki yedi: ‹N baa taa n naacemo Davidi yo, ki faabi n niba Isidayeli yaaba Filisiti yaaba leni bi yibalinba kuli nuu nni.› »

¹⁹ Abineri den maadi leni Benjamen buolu moko. Li yaa puole o den gedi Hebiron, ki baa n waani Davidi Isidayeli yaaba leni Benjamen buolu kuli n jagi yaala.

²⁰ O den pundi Hebiron, Davidi kani ki yegi leni jaba piilie. Davidi den ŋanbi mi jaanjiema Abineri leni yaaba n yegi leni o kuli po.

²¹ Abineri den yedi Davidi: «N baa fii ki kuni ki ban taani Isidayeli yaaba kuli, ban ŋoadi fini n daano o bado. Bi baa tuo a bali, a baa diedi bikuli nani ŋan bua maama.» Davidi den cabi Abineri ke o kuni leni mi yanduanma.

Joabi kpa Abineri

²² Davidi n den cabi Abineri ke li tieni waamu, Joabi leni yaaba n ŋua Davidi den ñani bu toabu po ki kpeni. Bi den cuani ti fagidi boncianla. Abineri naa go den ye Hebiron Davidi kani, kelima wani Davidi den cabi o ke o kuni leni mi yanduanma.

²³ Joabi leni o toagoli n den pundi, bi den waani Joabi ke Neri bijua Abineri bi cua ki laa o bado, ke omo cedi ke o guani ki kuni leni mi yanduanma.

²⁴ Joabi den kua o bado kani ki yedi o: «Ŋan tieni yaala ne mo te? Abineri cua a kani ke a mo cedi ke o lebidi ki kuni?

²⁵ A bani Neri bijua Abineri po. Wan cua yeni, o bua ki boandi a, ki bandi ŋan jagi yaala, ki le ŋan tiendi yaale.»

²⁶ Joabi n den ñani Davidi kani, o den soani a tonda ke bi ŋoadi ki ban nandi Abineri Sila caali kani. Bi den guani o. Davidi ki den bani lipo.

²⁷ Abineri n den lebidi ki guani Hebiron, Joabi den taa o ke bi piadi ki gedi u dogu bilinciamu buliñoabu kani, nani o bua ki maadi leni o ŋasiili nni yeni. Lankani, o den muu o tugu nni ki kpa o, ki tuu o waalo Asayeli kuuma panli.

²⁸ Davidi den ti yuandi ki gbadi yaala n tieni, ki yedi: «O Diedo bani ke Neri bijua Abineri soama ki jagi n yuli po, bi n diema po.

²⁹ Laa soama n guani ki baa Joabi leni o baadiegu yaaba po. Joabi diegu nni n da luo yua yaa soama n wuliti, bi yua n pia mi gbaadima, yaa ka yua ñii u gbiamu. Lan da luo jugisiega n pedi ki kpa yua, bi mi jiema n poadi yua.»

³⁰ Li den tie yene ke Joabi leni o waalo Abisayi den kpa Abineri, kelima o den kpa bi waalo Asayeli bu toabu nni, Gabaon po.

³¹ Davidi den yedi Joabi leni yaa niba n den yegi leni o kuli: «Padi mani yi tiadi, la mani li paboanli tiadi, ki buudi Abineri po.» O bado Davidi wani o ba den cuoni ki ŋua yaaba n tugi mi kuuma kpaku puoli.

³² Bi den piini Abineri Hebiron. O bado den buudi ki kpaani Abineri kuli yuli po. Bi niba kuli den buudi.

³³ Li yaa puoli, Davidi den yini Abineri po yaa kuyanbu n tie ne: «Abineri bi baa kpe nani o yanluodaano yeni yo?

³⁴ A nii ki den luo, a taana mo ki den ye kpaadi nni. Ba yeni a nan baa ki kpe Nani bi nibiadiba n ludi yua yeni.» Bi niba kuli den mua ki pugini Abineri po.

³⁵ Li yaa puoli, bi den nagini Davidi kani ki baa teni o wan je hali ke li daa bii. Ama o bado den poli ki yedi: «U Tienu n cuo nni o cuonbiadu, n yaa ŋmani dupen bi ki dini jiemiba kuli ke u yienu daa baa.»

³⁶ Bi niba kuli den gbadi ki saa li po moamoani, nani ban den saagi moamoani, ke Davidi n tiendi yaala kuli ŋani maama.

³⁷ Juda yaaba leni Isidayeli yaaba kuli den bandi ke Davidi ka teni ke bi kpa Neri bijua Abineri.

³⁸ O bado den yedi o badibaanba: «Yii bani ke badija-yudanciamo n kpe dinla Isidayeli diema nni?

³⁹ Mini, ba ke bi dini nni li bali, n tadi, Tiseruya bijaba yaa paalu cie n yuu. O Diedo n guani yua n tieni mi biadima o biadima panpaani.»