2 Samueli 24 - U TIENU MAAMA TILI 2013

Davidi coadi Isidayeli yaaba

¹ O Diedo pali go den beni leni Isidayeli yaaba ke o den tigini Davidi ke wan tieni yaala n baa cuani bi po yaala n bia, ki yedi ke wan coadi Isidayeli leni Juda yaaba.

² O bado Davidi den yedi bi toatieba yudaano Joabi yua n den ye o kani: «Gaani Isidayeli nibuoli kuli niinni i kaani kuli ki cili Dan, ki yaa caa hali Beri-Seba, ki teni ban coadi bi niba min bandi ban da maama.»

³ Joabi den guani ki yedi o bado: «O Diedo a Tienu n teni ke bi niba coali n pugini taalima kobiga, ke fini n daano n baa ki le ba leni a nuni mo. Ama, be yaa po ke a bua ki coadi ba?»

⁴ Die o bado den sedi ke se Joabi leni bi toatieba yudanba kuli tieni wan yedi yaala. Lanwani, bi den fii o bado kani ki gedi ki baa n coadi Isidayeli yaaba.

⁵ Bi den duodi Jurden ki gedi ki cili Aroyeeri, Gadi dogu joaloangu jienu ki nagi leni Yaseri.

⁶ Lanwani, bi den gedi Galaadi diema nni leni Takita-Odisa diema nni, ki go gedi Dan-Jaani leni Sidon dobila nni.

⁷ Bi den suagi ki gedi Tiiri kaanpaalu leni Hiviti yaaba leni Kanana yaaba yaa dogi nni kuli. Bi den juodi leni Beri-Seba, yaa dogu n ye Juda diema ganu po.

⁸ Bi den gaani mi diema kuli nni ki gbeni ŋmaaliyia leni dana piilie siiga, ki guani ki kpeni Jerusalemi.

⁹ Joabi den waani o bado bi niba coali n da maama. Isidayeli diema nni den pia jaba tuda kobinii (800 000) yaaba n pundi ki gedi bu toabu, Juda diema nni mo jaba tuda kobimuu (500 000).

U Tienu faligi Davidi kelima o tagili po

¹⁰ Davidi tugusoama den sani wan coadi bi niba yeni po. O den yedi o Diedo: «Min tieni maama ne, n tudi hali boncianla. Moala n mia ŋa ŋan tieni mini a yonbo po sugili, kelima n tieni nani o yanluodaano yene.»

^11-12 U Tienu den maadi leni o saawalipualo Gadi, yua n den nua Davidi po saala bonla, ki yedi o: «Gedi ki ban waani Davidi ke mini o Diedo yedi mi naa maama: ‹N bili a po falacianbuolitaa, gandi i siiga nni yendu.› » Lan den fii ki faa ke Davidi fundi,

¹³ Gadi den cua o kani ki caa o U Tienu tondu ki yedi: «A bua mi koma n tieni a diema nni binalele bi, bi a yibalinba n yaa deli a ŋmaalitaa, bi u yianbiadipuodiko yo n baa a diema nni danataa? Ŋan kpaagi ki waani nni min baa guani yua n soani nni yaala.»

¹⁴ Davidi den guani ki yedi Gadi: «N ye paboancianli nni. N yaa baa o Diedo yaa nuu nni, li cie kelima o ninñingbadima yabi. Ama min da baa bi nisaaliba yaa nuu nni wani.»

¹⁵ Lanwani, o Diedo den luni Isidayeli diema yaaba u yianbiadipuodiko. U den cili ku tiŋaagu ki pundi hali wan den bili yaa yogunu. Ki cili Dan, jienu po yaa dogu, ki yaa caa hali Beri-Seba, ganu po yaa dogu, niba tuda piilele (70 000) den kpe.

¹⁶ Maleki n den tandi o nuu ki baa bolini Jerusalemi, o Diedo yama den lebidi ke o jagi ke o kan go pugini laa biadima. O den yedi yaa maleki n bolindi bi niba yeni: «Li dagidi, jiini a nuu.» O Diedo maleki den ye Jebusi yua Aravina jalu kani.

¹⁷ Davidi n den laa maleki ke o lu bi niba u yianbiadu, o den yedi o Diedo: «Diidi ki le, n tudi! Mini n tieni ti tuonbiadi. Yaa niba n tie ne naa tieni liba kuli. N mia ŋa, a nuu n cuo mini leni n baadiegu yaaba.»

Davidi maa li padibinbinli o Diedo po

¹⁸ Landaali Gadi go den cua Davidi kani ki yedi o: «Ŋan gedi ki ban maa li padibinbinli o Diedo po Jebusi yua Aravina jalu nni.»

¹⁹ Davidi den tieni o Diedo ñoamabonli ki gedi nani Gadi n den yedi o maama.

²⁰ Aravina n den nuali ki laa ke o bado leni o badibaanba nagidi o deni, o den ñani ki labini ki pugi o bado,

²¹ ki yedi o: «Be yaa po ke fini n daano cua mini a naacemo kani?» Davidi den guani ki yedi o: «Li tie ke n bua ki da a jalu ki maa li padibinbinli o Diedo po, ke u yianbiadipuodiko n sedi ki da go puodi bi niba.»

²² Aravina den yedi Davidi: «Ŋan taa u jalu ki padi ŋan bua ki padi yaa pada kuli. N ne yaaba n tie ne n tua a padiyandi, teliti leni ti dadoalikaadi mo n tua ti daadi li padijuukaali po.

²³ N puni a li kuli. O Diedo a Tienu n gaa a miabu, ki mangi a po o nunga.»

²⁴ Ama o bado den yedi Aravina: «Aa-a, n bua ki daa li kuli ki pa ŋa li ligi. N kan pa o Diedo n Tienu min ki biani yaa pada po liba.» Lanwani, Davidi den daa u jalu leni i ne, ki teni ŋanjilifa kujapiena piimuu.

²⁵ Davidi den maa li padibinbinli lankani o Diedo po, ki padi o po a padijuukaana leni mi taanyenma pada. Lanwani, U Tienu pali den jiidi mi diema po, ke u yianbiadipuodiko sedi ki ñani Isidayeli yaaba siiga.