2 Samueli 23 - U TIENU MAAMA TILI 2013

Davidi majuodikaama

¹ Diidi Davidi n den maadi yaa majuodikaama. «Isayi bijua Davidi o niciamo, Jakob Tienu n den gandi yua Isidayeli yaaba n bua yaa yanyinlo mayedikaama.

² O Diedo U Tienu Fuoma maadi ke n soagini, O maama ye n ñoabu nni.

³ Isidayeli Tienu yedi nni, Wani Isidayeli yaaba Tanciangu maadi nni mine: ‹O die bi niba leni mi teginma, Ki gobidi ba leni U Tienu fangili.

⁴ O naani leni mi tiŋaayenpudima, tawala n ki ye yaa daali, Yaa yienu yaa kpadima n teni ke ki taaga yaa mini ti muadi pudi.›

⁵ N diegu yaaba po li tie yene U Tienu nintuali, Kelima o niani nni yogunu kuli po, Yaa nianli n bogini ki ŋani cain ki kan lebidi, Ki kan bodi mo. U Tienu teni ke n paadi lan tie yaala kuli nni, O tiendi min bua yaala kuli,

⁶ Ama ti niyuogidi tie naani leni ban luni yaa konkoni. Oba kan muubi yi leni o nii.

⁷ Yua n bua ki cuo yi kuli, se wan taa bonliba yo ki cuo yi, Ki juu yi yi buoli nni.»

Davidi jakoanda

⁸ Davidi jakoanda yaaba n den koani mi jama ki cie yela n tie ne: Josebi-Basebeti yua ñani Takemoni n den tie bi jakoanditaadiba yudaano. Wani n den taa o kpaanli ki kpa niba kobinii yenma.

⁹ O yaa puoli Ahohi nilo yaabili Eleasari, Dodo bijua. Wani leni jakoanditoaba bonbilie den yegi leni Davidi ki ban tuogi leni Filisiti yaaba, ban den taani bu toabu po ke Isidayeli yaaba tiini ki do a juana,

¹⁰ wani Eleasari den fii ki pe ki kpaani Filisiti yaaba hali ke o nuu den coagi ki kan go tuo ki poaliti ki ŋaa o jugisiega. O Diedo den puni Isidayeli yaaba mi faabicianma landaali. Bi toatieba den guani ki cua Eleasari kani ki baa taa ti fagidi.

¹¹ O yaa puoli Harari yua Age bijua Sama. Filisiti yaaba den taani Leki kani. U kuanu den ye likani ke yaa tubuolu n yi lantiyi gbie lienni. Isidayeli toatieba den laa Filisiti yaaba ki sani.

¹² Sama den sedi u kuanu yeni siiga ki guudi u, ki paadi Filisiti yaaba. O Diedo go den puni Isidayeli yaaba mi faabicianma.

¹³ U jetaagu yogunu, yaa goli n yi “Niba piitaa” siiga yudanbitaa den cua Adulami dogu yaa tanlongu nni, Davidi kani, Filisiti yaaba toagoli den ye Refayimi yaaba joaloangu nni.

¹⁴ Davidi den ye u wuonkaanpaalu nni, ke Filisiti yaaba toagoli yenli ban ye Betelemi.

¹⁵ Davidi yama den baa li bonla nni ke o yedi: «Ŋme n baa pa nni ban gbiidi yaa buogu Betelemi buliñoabu kani ñima yeni min ño?»

¹⁶ Lanwani, bi jakoanditaadiba yeni den poandi Filisiti yaaba toagoli nni, ki ban ñani mi ñima ban gbiidi yaa buogu Betelemi buliñoabu kani yeni ki guani ki teni Davidi. Ama o den yie ke o kan ño, ki wuli ma o Diedo nintuali

¹⁷ ki yedi: «O Diedo n luoni n po min ño mi naa ñima, kelima mi tie nani yaaba n luni bi miana ki gedi ki ban kabidi ma yeni yaa soame.» Lani yaa po, o den yie ke o kan ño ma. Lani n tie laa jakoanditaadiba n den koani yaa jama.

¹⁸ Joabi naataanu Abisayi, Tiseruya bijua den tugi bi nitaadiba yeni yuli. Wani n den yua o kpaanli niba kobitaa po, ki kpa ba. O yeli mo den ñani bi nitaadiba yeni siiga.

¹⁹ O den tie i nipiitaadi goli yeni niinni yaaba yaa yela n ñani ki cie siiga yendo. O den tugi bi yuli, ama waa den pundi bi nitaadikpiaba.

²⁰ Yeoyada bijua Benaya den tie jakoandimoano yaa yaabili, yua n den bili jama boncianla, ki tie Kabitiseeli domaabiga. Wani n den pua ki paadi Moabi jakoanda nibilie yaaba n yi Arieli. Wani n go den jiidi ku ñinbuogu nni, ki kpa o yangbanlo ti waciandi daali.

²¹ Wani n go den kpa Ejipiti yua ke o tie niciangu ki kubi li kpaanli. O den tuogi leni o leni gbiamu ki fie o kpaanli ki kpa o leni lini.

²² Lani n tie Yeoyada bijua Benaya n den koani yaa jama. Jakoanda piitaa goli yeni niinni, o yeli den ñani.

²³ O den tie “Niba piitaa” goli yeni niinni yaaba yaa yela n ñani ki cie siiga yendo. Ama waa den pundi bi nitaadikpiaba. Davidi den teni ke o tua o guudikaaba yudaano.

²⁴ Niba piitaa goli yeni niinni go den pia yaa niba n tie ne: Joabi naataanu Asayeli, Betelemi yua Dodo bijua Elikana,

²⁵ Arodi dogu yaaba Sama leni Elika,

²⁶ Peleti yua Heletisi, Tekoa dogu yua Ikesi bijua Ira,

²⁷ Anatoti dogu yua Abieseri, Husa yua Mebunnayi,

²⁸ Akoa yua Tisalimoni, Netofa yaaba Mahalayi

²⁹ leni Baana bijua Elebi, Benjamen buolu dogu Gibeya yua Libayi bijua Itayi,

³⁰ Pilatoni yua Benaya, Nahale-Gaasi yua Idayi,

³¹ Araba yua Abi-Aliboni, Barumi yua Asimafeti,

³² Saaliboni yua Eliabi, Bene-Jaseni bijua Jonatan,

³³ Asadadi yua Sama, Alali yua Sadadi bijua Ahiyami,

³⁴ Maaka yua yaa yaabili Elifeleti, Ahasibayi bijua Gilo yua Ahitofeli bijua Eliam,

³⁵ Karimeli yua Etisidayi, Arabi yua Paadayi,

³⁶ Tisoba yua Natan bijua Yigali, Gadi yua Bani,

³⁷ Anmoni buolu yua Tiseleki, Beloti yua Nahalayi, yua n den tugi Tiseruya bijua Joabi toatiadi,

³⁸ Yeteli yaaba Ira leni Galebi

³⁹ leni Hititi yua Uri. Bikuli den taani ki tie piitaa n bilele.