2 Samueli 20 - U TIENU MAAMA TILI 2013

Seba fiini Davidi po mi yiema

¹ O joa den ye Giligali yeni ki tie niyuogu. O den tie Benjamen buolu yua Bikili bijua. O den yi Seba. O den piebi kakaci ki kpaani ki yedi: «Tii pia ŋantaadoba kuli leni Davidi. Ti baga ki ye leni wani Isayi bijua, Isidayeli yaaba, yuakuli n yaa kuni o denpo!»

² Lanwani, Isidayeli yaaba den yadi ki ŋaa Davidi, ki ŋoadi Bikili bijua Seba. Ama Juda yaaba wani den sedi leni Davidi. Bi den ciani o ke o ñani Jurden ki gedi hali Jerusalemi.

³ Davidi den pundi Jerusalemi ki kua o deni. O den teni ke bi taa wan den ŋaa o puonanbandi piiga, yaaba n den guu o diegu yeni, ki kuani ba ban baa yaa guu ba naankani. O den kubi ba bonŋanla, ama waa den taani leni ba. Bi den ye nani a kpepuona yene. Bi den lo hali bi kuuma.

Joabi kpa Amasa

⁴ O bado den yedi Amasa: «Ŋan yini ki taani Juda yaaba toatieba kuli. Ne leni danataa kuli ŋan yaa ye ne.»

⁵ Amasa den gedi ki baa n yini ki taani Juda yaaba. Ama o den waagi ki pendi o bado n bili o yaa daali.

⁶ Lanwani, Davidi den yedi Abisayi: «Moala Bikili bijua Seba baa biagi ti po ki cie Abisalomi. Ŋan taa n yaa toatieba ki ŋoadi o ke wan da ti ban baa wan kua ki wuoni yaa dopaali nni ki bodi ti.»

⁷ Lane Abisayi den fii ki gedi, wani leni Joabi toatieba, Keleti diema yaaba, Peleti diema yaaba leni a jakoanda kuli. Bi den ñani Jerusalemi ki ŋoadi Bikili bijua Seba.

⁸ Ban den pundi Gabaon tancianli kani, bi den tuogi leni Amasa. Joabi den yie ki jugisiega ki ñagini o ciaga. Wani Joabi n den cuoni ki nagidi, ki jugisiega yeni den noadi ki baa.

⁹ Joabi den yedi Amasa: «A paa, n kpiilo?» O den tandi o nujienu ki cuo Amasa langbiadi ki baa muadi o.

¹⁰ Amasa ki den faami wan buani ki taa yaa jugisiega ki muubi ka o ganu po. Joabi den muu o tugu nni. Amasa nuadi den ñani ki wuli tiipo. O den kpe ke ba Joabi ki den pugini miliema. Joabi leni o naataanu Abisayi den suagi liiga ki ŋua Bikili bijua Seba.

Seba n den fiini yaa yiema baa u bianu

¹¹ Joabi toatieba siiga yendo den sedi Amasa n kpe ki dua naani ki yieni: «Yaaba n tie Joabi danlinba leni yaaba n taa Davidi po n yaa ŋua Joabi!»

¹² Amasa o tinkpilo den paagi mi soama nni u sanu siiga. Li minteeli yeni n den laa ke yua n pundi likani kuli yen sedi, o den fuli Amasa ki ñani u sanu nni ki luni u kuanu nni, ki taa bu kpalibu ki maani o po.

¹³ Wan den tieni yeni, bi niba kuli den jigidi ki ŋoadi Joabi ki lingi Bikili bijua Seba.

¹⁴ O den poandi Isidayeli buoli yaaba kuli siiga, ki ban pundi Abeli-Beti-Maaka dogu nni. Belima yaaba kuli den taani ki ŋoadi o.

¹⁵ Joabi leni yaaba n den ŋua o kuli den gedi ki lindi ki cebini Abeli-Beti-Maaka yeni, ke Seba ye lienni. Bi den dogini li tanbinbinli ki ban pundi hali u dogu yeni bilinpaalu kani. Li yaa puoli, bi den pe u bilinu ki bua ki lu u.

¹⁶ O puonunfandaano den tiani u dogu yeni niinni ki yedi: «Cengi mani, cengi mani! Yedi mani Joabi n cua nekanba ne, n bua ki maadi leni o!»

¹⁷ Joabi den nagini. O pua yeni den buali o: «Fini n tie Joabi?» Joabi den guani ki yedi: «Mine.» O pua den yedi o: «N mia ŋa ŋan cengi min baa yedi yaala.» Joabi den yedi: «N cengi.»

¹⁸ O den yedi: «Yogunuba bi den yieni: ‹Gedi ki ban bu Abeli-Beti-Maaka po, mi maama baa dagini.›

¹⁹ Ti dogu ne tie Isidayeli kuli nni yaa dogu n bua mi yanduanma leni yuu n tuo ki ŋua li bali ki cie siiga yendu. Ama a mo bua ki bolini laa dogu, wuni yuu n tie Isidayeli dociami siiga docianyendu! Be yaa po ke a baa bolini o Diedo n die yaala?»

²⁰ Joabi den guani ki yedi: «Kalam! Mii pia yaa yantiali n baa bolini bi ki mudi liba!

²¹ Laa tie yeni ka ba. Efrayimi juana po yaa nilo, yua n yi Seba ki tie Bikili bijua n fiini o bado Davidi po mi yiema. Yin taa o mani ki teni ti, wani o bebe, lanwani ti baa fuadi ki cedi yi dogu.» O pua yeni den yedi Joabi: «To, ti baa lugidi o yuli ki kandi u bilinu ki teni a.»

²² O pua yeni den guani u dogu yaaba, yaaba n sieni po ki waani ba wan jagi yaa yanfuojagili. Lane bi den jia Seba yuli ki kandi ki luni ki teni Joabi. Wani Joabi den piebi kakaci. Bi toatieba kuli den yadi ki ŋaa u dogu yeni, ke yuakuli kuni o denpo. Joabi den lebidi ki guani Jerusalemi o bado po.

Davidi paatiecianba yela

²³ Joabi den tie li toagoli yudaano. Yeoyada bijua Benaya den tugi Keleti leni Peleti yaaba yuli.

²⁴ Adorami den die li lubili yaa maama. Ahiludi bijua Josafati den tie o bado soagindo.

²⁵ Seya den kubi a tila tuonli. Sadoki leni Abiatari den tie kopadicianba.

²⁶ Yayiiri yaabili Ira mo den tie Davidi todika.