2 Samueli 2 - U TIENU MAAMA TILI 2013

Davidi kali Hebiron ki tua Juda diema bado

¹ Laa bonla n pendi, Davidi den buali o Diedo ki yedi: «Min gedi ki ban kua Juda diema dogi doyendu nni bi?» O Diedo den guani ki yedi o: «Gedi.» Davidi den yedi: «Min gedi u laa dogu?» O Diedo den guani ki yedi o: «Hebiron.»

² Lanwani, Davidi den gedi lipo leni o puoliediba, Ahinoami, Yisireyeli dogu yua leni Nabali kpepuoli Abigayili, Karimeli dogu yua.

³ Davidi den gedini yaa niba n ye leni o moko, yuakuli leni o diegu yaaba. Bi den ban kali kali Hebiron dobila nni.

⁴ Juda yaaba den cua likani ki wuli Davidi po mi kpama, ki dini o li bali, ke o tua Juda buolu bado. Bi niba den waani Davidi ke Yabesi dogu, yuu n ye Galaadi diema nni yaaba n piini Sayuli.

⁵ Davidi den soani a tonda Yabesi yaaba kani ki yedi: «O Diedo n seligi yi leni yin doagidi ki waani yi buama yi daano Sayuli po, ki piini o.

⁶ O Diedo n ŋanbi yimo yaa po, ki gbadi yi po mi ninñima. Nmoko baa ŋanbi yi po leni yin tieni la yeni.

⁷ Moala yin paagi yi pala ki yaa tie papaadanba. Yi daano Sayuli kpe, Juda yaaba mo dini mine li bali ke min yaa die ba.»

Isi-Boseti tua Isidayeli diema bado

⁸ Neri bijua Abineri, yua n den tie Sayuli toatieba yudaano, den taa Sayuli bijua Isi-Boseti ki gedini o Mahanayimi dogu nni.

⁹ O den dini o li bali ke o diedi Galaadi, Asuri, Yisireyeli, Efrayimi leni Benjamen, yaala n tie Isidayeli tinmu kuli.

¹⁰ Sayuli bijua Isi-Boseti n den tua Isidayeli diema bado yaa yogunu, o den pia bina piinaa. O den tieni li bali nni binalie. Juda buolu bebe n den tuo ke Davidi die ba.

¹¹ Davidi n den kaa Hebiron ki die Juda buolu yaa bina banlu den tie binalele leni ŋmaaliluoba.

Juda tuogi leni Isidayeli bu toabu Gabaon nni

¹² Neri bijua Abineri leni Sayuli bijua Isi-Boseti toatieba den ñani Mahanayimi, ki teli Gabaon.

¹³ Tiseruya bijua Joabi leni Davidi yaa toatieba moko den fii ki taa u sanu. Bi den tuogi Gabaon boangu kani. Bine den sedi napo yaa jaali, bine mo napo yaa jaali.

¹⁴ Abineri den yedi Joabi: «Bi jawaaba n fii ki tuogi ki pua biyaba ti nintuali.» Joabi den yedi: «Ban fii naa!»

¹⁵ Bi den fii. Benjamen buolu, bani yaaba n taa Sayuli bijua Isi-Boseti po yeni, piiga n nibilie den caadi ki sedi, Davidi yaa niba yaa po mo piiga n nibilie.

¹⁶ Toatielo kuli den cuo o yibali yuli ki muu o loga nni ki jugisiega ke bikuli den taani ki baa ki kpe. Laa kaanu den nagi Gabaon. Bi den yini likani ti Tanciandi Kuanu.

¹⁷ Landaali bu toabu den bia hali ki bia. Davidi toatieba den paadi Abineri leni o yaa toatieba.

¹⁸ Tiseruya bijataadiba Joabi, Abisayi leni Asayeli den ye likani. Asayeli gbanu den yua ke o pa mi nuama nani o pialo yeni.

¹⁹ O den ŋua ki deli Abineri kaa jadi jienu ki bagi ganu.

²⁰ Abineri den gbegi ki diidi o puoli ki yedi: «Fini Asayeli ko liga yo?» O den guani ki yedi: «Mm, mine!»

²¹ Abineri den yedi o: «Jadi jienu bi ganu po ki cuo bi jawaaba siiga yendo, ki fie wan pia yaala.» Ama Asayeli den yie ke o kan ŋuadi o puoli.

²² Abineri go den yedi Asayeli: «Ŋuadi n puoli ke min da ti pua ki kpa ŋa. N yaa pua ki kpa ŋa, n baa noanli a naataanu Joabi lede?»

²³ Asayeli den yie ke o kan ŋuadi. Lanwani, Abineri den muu o tugu nni o kpanmuli. Li kpaanli den ban ñani o puoli po ke o baa ki kpe lankani. Asayeli n den kpe naani yeni, yaaba n den pundi likani kuli yen sedi.

²⁴ Joabi leni Abisayi den ŋoadi ki deli Abineri. U yienu n kua yaa yogunu, bi den pundi Anma joabiga kani, yaaga n ye Giya dogu nni, Gabaon fanpienma sanu nni.

²⁵ Benjamen buolu toatieba den cua Abineri kani, ke bikuli taani ki sedi joabiyenga yuli po.

²⁶ Abineri den yini Joabi ki yedi: «Ti baa yaa baa ki li bolindi tiyaba leni mu jugisiemu yo? Ŋaa bani ke li baa n juodi leni paboanli kaa? U laa yogune ke a baa yedi bi toatieba n cedi ki da go ŋua ki deli bi kpiiba?»

²⁷ Joabi den guani ki yedi: «Hali U Tienu po, a yàá bi yedi liba, n toatieba kan bi sedi hali lan baa n faa.»

²⁸ Lanwani, Joabi den piebi kakaci ke bi toatieba kuli sedi. Baa go den deli Isidayeli yaaba, baa go den suagi ki pua biyaba.

²⁹ Abineri leni o toatieba den dua ki cuoni u tialu nni. Bi den duodi Jurden kpenu ki poandi Bitiloni kuli nni, ki ban pundi Mahanayimi.

³⁰ Joabi den cedi kaa go deli Abineri, ki guani ki taani o toatieba kuli. Bi den sua ke Davidi toatieba siiga piiga n nibiyia n poadi ki pugidi Asayeli po.

³¹ Ama bani Davidi toatieba den kpa niba kobitaa n piiluoba Abineri leni Benjamen buolu yaa toatieba siiga.

³² Bi den taa Asayeli ki ban piini o Betelemi, o baa kuli nni. Joabi leni o toatieba den dua ki cuoni, ki ban pundi Hebiron u yienu n pudi yaa yogunu.